উচ্চতম ন্যায়ালয়ৰ তত্ত্বাৱধানত চলি থকা এন আৰ চিৰ চূড়ান্ত তালিকা অহা ৩১ জুলাই ২০১৯ ধাৰ্য কৰাৰ পাছত চূড়ান্ত খচৰাৰ পৰা বাদ পৰা ৩৬ লাখ লোকৰ শুনানি অহা ১৪ ফেব্ৰুৱাৰিৰ পৰা আৰম্ভ কৰা হ’ব।
এন আৰ চি কৰ্তৃপক্ষই জানিব দিয়া মতে, এই সন্দৰ্ভত ৩৫০০ গৰাকী বিষয়াক নিযুক্তি দিয়া হৈছে। ৩৬ লাখ লোকে দাখিল কৰা নতুন নথিপত্ৰসমূহ প্ৰথমতে পৰীক্ষণ কৰা হ’ব। প্ৰথম পোন্ধৰ দিন ধৰি এই পৰীক্ষণৰ কাম চলিব। আনহাতে, পৰৱৰ্তী পৰ্যায়ৰ বাবে চৰকাৰৰ পৰা উক্ত কামৰ বাবে নিয়োগ কৰা বিষয়াৰ সংখ্যাৰ বিষয়ে নিশ্চিত হোৱাৰ পাছতেই জাননী জাৰি কৰা হ’ব।
এন আৰ চি কৰ্তৃপক্ষই অহা ১৫ জুনৰ ভিতৰত দাবী আৰু আপত্তিৰ পৰীক্ষণ তথা শুনানি সম্পূৰ্ণ কৰি তোলাৰ বাবে প্ৰস্তুতি চলাইছে। উল্লেখ্য যে এন আৰ চিৰ চূড়ান্ত খচৰাৰ পৰা ৪০ লাখ লোকৰ নাম বাদ পৰিছিল। ইয়াৰ ভিতৰত ৩৬ লাখ লোকে নতুনকৈ নথি পত্ৰ দাখিল কৰি পুনৰ আৱেদন জনাইছে। বাকী ৪ লাখ লোকে এই সন্দৰ্ভত কোনো আৱেদন কৰা নাই।
ইপিনে, লোকসভা নিৰ্বাচনৰ বাবে চূড়ান্ত এন আৰ চি প্ৰকাশৰ সময় সীমা বৃদ্ধি কৰিবলৈ উচ্চতম ন্যায়ালয়ে অস্বীকাৰ কৰিছে। যোৱা ৫ ফেব্ৰুৱাৰিত সৰ্বোচ্চ আদালতখনে ইয়াৰ অন্তিম শুনানিত সময়মতে এন আৰ চি প্ৰকাশ কৰিব নোৱাৰাৰ বাবে কেন্দ্ৰ আৰু ৰাজ্য চৰকাৰক ককৰ্থনা কৰিছিল।
বিগত সময়ছোৱাত ৰাজ্য চৰকাৰে বিভিন্ন অজুহাতত নিৰ্দ্ধাৰিত সময়ত এন আৰ চিৰ কামকাজ আগুৱাই নিব নোৱাৰাৰ বাবে উচ্চতম ন্যায়ালয়ত শপতনামা দাখিল কৰিবলগীয়া হৈছিল।
