গুৱাহাটীৰ দেশভক্ত তৰুণৰাম ফুকন ইনড’ৰ ষ্টেডিয়ামত চলি থকা য়’নেক্স-ছানৰাইজ ৮৩ সংখ্যক ৰাষ্ট্ৰীয় ছিনিয়ৰ বেডমিণ্টন প্ৰতিযোগিতাত অংশগ্ৰহণ কৰি বিসংগতিপূৰ্ণ বেডমিন্টন ক’ৰ্টৰ বাবে আপত্তি দৰ্শাই আধাতে খেল সামৰিলে ভাৰতৰ তাৰকা শ্বাটলাৰ চাইনা নেহৱালে।
প্ৰতিযোগিতাৰ এখন খেলত অংশগ্ৰহণ কৰি থকাৰ সময়ত উদ্যোক্তা সমিতিক বাৰে বাৰে ক’ৰ্টৰ বিসংগতি সম্পৰ্কে আঙুলিয়াই দিছিল নেহৱালে। অসম বেডমিণ্টন সংস্থাৰ তৰফৰ পৰা এই ক্ষেত্ৰত কোনো ধৰণৰ ব্যৱস্থা গ্ৰহণ নকৰাত অসন্তুষ্ট হৈ আধাতে নিজৰ খেল সামৰে অলিম্পিক পদক বিজয়ী তাৰকা খেলুৱৈগৰাকীয়ে।
বাতৰি সংগ্ৰহ কৰাৰ সময়লৈ নেহৱালৰ খেলখন অন্য কৰ্টলৈ স্থানান্তৰ কৰিছে নে সম্পূৰ্ণৰূপে বাতিল কৰা হৈছে সঠিক খবৰ লাভ কৰা হোৱা নাই।
চাইনা নেহৱালৰ উপৰি প্ৰতিযোগিতাখনত অংশগ্ৰহণ কৰিছে বিশ্বৰ দ্বিতীয় স্থানৰ শ্বাটলাৰ পি ভি সিন্ধুৱেও(পুছাৰলা ভেংকত সিন্ধু)। সিন্ধুৱে ইতিমধ্যে দুৰন্ত প্ৰদৰ্শনেৰে প্ৰতিযোগিতাখনৰ কোৱাৰ্টাৰ ফাইনেলত নিজৰ স্থান সুৰক্ষিত কৰিছে।
উল্লেখযোগ্য যে, বিগত বৰ্ষত পি ভি সিন্ধুক হৰুৱাই চেম্পিয়নৰ খিতাপ অৰ্জন কৰা চাইনা নেহৱালে চলিত বৰ্ষৰ প্ৰতিযোগিতাখনত ডিফেণ্ডিং চেম্পিয়ন হিচাপে অংশগ্ৰহণ কৰিছে।
সুদীৰ্ঘ ৯ বছৰৰ অন্তত এইবাৰ গুৱাহাটীত অনুষ্ঠিত হোৱা ৰাষ্ট্ৰীয় পৰ্যায়ৰ অতিকৈ সন্মানীয় ছিনিয়ৰ বেডমিণ্টন প্ৰতিযোগিতাখনত দেশৰ বিভিন্ন প্ৰান্তৰ তাৰকা শ্বাটলাৰ সকলে অংশগ্ৰহণ কৰিছে। পুৰুষৰ ছিংগলছ শাখাত প্ৰাক্তন চেম্পিয়ন সমীৰ বাৰ্মা আৰু পাৰুপল্লী কাশ্যপেও প্ৰতিযোগিতাখনত অংশ লৈছে।
