অসম তথা উত্তৰ-পূৰ্বাঞ্চলৰ খিলঞ্জীয়া জনসাধাৰণৰ তীব্ৰ আন্দোলন-প্ৰতিবাদৰ পাছত ৰাজ্যসভাত জাতিধ্বংসী নাগৰিকত্ব বিধেয়ক উত্থাপনত ব্যৰ্থ হোৱা নৰেন্দ্ৰ মোদীৰ চৰকাৰে পুনৰ বিধেয়কখনৰ প্ৰসংগ টানি আনিছে।
শেহতীয়াকৈ বিজেপিৰ ৰাষ্ট্ৰীয় সভাপতি অমিত শ্বাহে অসম ভ্ৰমণৰ সময়ত বিজেপি ক্ষমতালৈ আহিলে বিধেয়কখন গৃহীত কৰিবি বুলি কৰা মন্তব্যৰ বিৰুদ্ধে জাঙুৰ খাই উঠিছে আছু তথা ৩০টা জনগোষ্ঠীয় সংগঠন।
এয়া খিলঞ্জীয়া মানুহৰ স্বাৰ্থ জলাঞ্জলি দি অবৈধ বাংলাদেশীৰ ভোটবেংক সৃষ্টিৰ কচৰৎ বুলি উল্লেখ কৰি ই অসম তথা উত্তৰ-পূৰ্বাঞ্চলৰ খিলঞ্জীয়া মানুহৰ প্ৰতি চূড়ান্ত অপমান হিচাপে অভিহিত কৰিছে সংগঠনকেইটাই।
এই সন্দৰ্ভত আছুৰ সভাপতি দীপাংক কুমাৰ নাথ আৰু সাধাৰণ সম্পাদক লুৰীণজ্যোতি গগৈয়ে কয় যে অবৈধ বাংলাদেশীৰ ভোটবেংক সুৰক্ষিত কৰিবলৈ, অবৈধ বাংলাদেশীক ৰক্ষণাবেক্ষণ দিবলৈ, অসম চুক্তিক উলংঘা কৰি খিলঞ্জীয়া মানুহৰ ওপৰত জাপি দিবলৈ বিচৰা জাতিধ্বংসী নাগৰিকত্ব বিধেয়কখনৰ বিৰুদ্ধে সমগ্ৰ অসম আৰু উত্তৰ-পূৰ্বাঞ্চলৰ ৰাইজে আন্দোলনৰ পথ লৈছে।
অসম আৰু উত্তৰ-পূৰ্বাঞ্চলৰ সাতোখন ৰাজ্যৰ খিলঞ্জীয়া মানুহে নিৰৱচ্ছিন্নভাৱে এই বিধেয়কৰ বিৰুদ্ধে আন্দোলন চলাই আছে। তাৰ পাছতো বিজেপিৰ ৰাষ্ট্ৰীয় সভাপতিগৰাকীৰ মন্তব্য ধিক্কাৰজনক আৰু এনে দৃষ্টিভংগীক অসম আৰু উত্তৰ-পূৰ্বাঞ্চলৰ খিলঞ্জীয়া মানুহে অগ্ৰাহ্য কৰিছে আৰু আগলৈও অগ্ৰাহ্য কৰি যাব।
আনহাতে, এই সন্দৰ্ভত এটা বিবৃতিত নেছ’ৰ অধ্যক্ষ ছেমৱেল বি জেৰৱা আৰু সম্পাদকপ্ৰধান চিনাম প্ৰকাশ সিঙে কয় যে ‘সমগ্ৰ উত্তৰ-পূৰ্বাঞ্চলবাসীৰ প্ৰবল প্ৰতিবাদৰ বাবেই চৰকাৰে ৰাজ্যসভাত বিধেয়কখন উত্থাপন কৰিব নোৱাৰিলে। কিন্তু এতিয়া অমিত শ্বাহে বিধেয়কখন অনাৰ কথা কৈ উত্তৰ-পূৰ্বাঞ্চলৰ ৰাইজৰ ঐক্যবদ্ধ সংগ্ৰাম তথা আৱেগ-অনুভূতিক অপমান কৰিলে।
অমিত শ্বাহৰ মন্তব্যই বিজেপি দলৰ প্ৰকৃত মানসিকতা উদঙাই দিয়া বুলি উল্লেখ কৰি তেওঁলোকে অভিযোগ কৰে যে উত্তৰ-পূৰ্বাঞ্চলৰ খিলঞ্জীয়া জনগণৰ আৱেগৰ প্ৰতি তেওঁলোকৰ কোনো গুৰুত্ব নাই। হিন্দুত্ব প্ৰতিষ্ঠাৰ নামত বিজেপিয়ে অবৈধ বাংলাদেশী আনি উত্তৰ-পূৰ্বাঞ্চলৰ খিলঞ্জীয়াৰ অস্তিত্ব নিঃশেষ কৰিব বিচাৰিছে।
‘’আমি কোনো কাৰণতে জাতিধ্বংসী নাগৰিকত্ব (সংশোধনী) বিধেয়কখন গ্ৰহণ নকৰোঁ। খিলঞ্জীয়াৰ অস্তিত্ব ৰক্ষাৰ সংগ্ৰামত আমি উত্তৰ-পূবৰ জনগণক ঐক্যবদ্ধ হোৱাৰ বাবে আহ্বান জনাইছোঁ,’’-নেতা দুগৰাকীয়ে স্পষ্ট কৰি দিয়ে।
