অৰুণাচল প্ৰদেশত ৰাজ্যখন গঠন হোৱাৰ পূৰ্বৰ পৰা বাস কৰি অহা ৬টা অ-অৰুণাচলী জনগোষ্ঠীক স্থায়ী বাসিন্দাৰ প্ৰমাণপত্ৰ দিবলৈ পেমা খাণ্ডু চৰকাৰে লোৱা সিদ্ধান্ত ব্যাপক হিংসাত্মক প্ৰতিবাদৰ পিছত বাতিল কৰিছে চৰকাৰখনে। যোৱা দুদিনত হোৱা ব্যাপক প্ৰতিবাদৰ ফলত আইন-শৃংখলাৰ পৰিস্থিতি নিয়ন্ত্ৰণৰ বাহিৰলৈ যোৱাৰ পিছতে মুখ্য মন্ত্ৰী খাণ্ডুৱে অনা-অৰুণাচলীক পি আৰ চি দিয়া নহয় বুলি ঘোষণা কৰে।
ইয়াৰ পূৰ্বে ঘাইকৈ অসমৰ মূল বাসিন্দা সোণোৱাল কছাৰী, দেউৰী, মৰাণ, আদিবাসী, মিচিং, গোৰ্খা, এই জনগোষ্ঠীকেইটাক ৰাজ্যখনত স্থায়ী বাসিন্দাৰ প্ৰমাণপত্ৰ দিয়াৰ সিদ্ধান্ত গ্ৰহণ কৰি বিধানসভাত প্ৰতিবেদন গৃহীত কৰিছিল খাণ্ডু চৰকাৰে। এই জনগোষ্ঠীকেইটা অৰুণাচল প্ৰদেশৰ অনুসূচিত জনজাতিৰ তালিকা বহিৰ্ভুক্ত যদিও তেওঁলোক ৰাজ্যখনত অৰুণাচল প্ৰদেশে ৰাজ্য হিচাপে ভূমুকি মৰাৰ পূৰ্বৰ পৰা বসতি কৰি আহিছে আৰু তাৰ ভিত্তিতে স্থায়ী বাসিন্দাৰ প্ৰমাণপত্ৰ দাবী কৰি আহিছিল দীৰ্ঘদিনৰ পৰা।
জানিব পৰামতে, পেমা খাণ্ডু চৰকাৰে বিধানসভাত প্ৰতিবেদন গৃহীত কৰাৰ পূৰ্বে আপছু আৰু আনছুকে ধৰি বিভিন্ন দল-সংগঠনৰ সৈতে আলোচনা কৰিছিল।
তৎসত্ত্বেও চৰকাৰৰ এই সিদ্ধান্তত আপছু, আনছুকে ধৰি ১৮টা জাতীয় জনগোষ্ঠীয় সংগঠনে জাঙুৰ খাই উঠে। চৰকাৰৰ সিদ্ধান্তৰ বিৰোধিতা কৰি কেইবাটাও দল-সংগঠনে ২১ ফেব্ৰুৱাৰিৰ পৰা ৪৮ ঘণ্টীয়া ইটানগৰ বন্ধ দিছিল। কিন্তু এই বন্ধৰ অন্ত পৰাৰ পিছতে হিংসাত্মক প্ৰতিবাদত নামি পৰি সচিবালয়ত প্ৰৱেশৰ চেষ্টা কৰে প্ৰতিবাদকাৰীসকলে।
আৰক্ষী-নিৰাপত্তাৰক্ষীৰ সৈতে হতাহতি লগাৰ পিছত ভালেকেইজন প্ৰতিবাদকাৰীক গ্ৰেপ্তাৰ কৰে আৰক্ষীয়ে। ইয়াৰ পিছতে অধিক ধ্বংসাত্মক ৰূপ লয় প্ৰতিবাদে। যোৱা দুদিনত হোৱা হিংসাত্মক প্ৰতিবাদত ৰাস্তাত থকা যান-বাহন, কাৰ্য্যালয় আদি ভঙাৰ লগতে জ্বলাই দিয়া হয়, শিলগুটি দলিওৱা হয়। প্ৰাক্তন মুখ্য মন্ত্ৰী নবাম টুকীৰ গাড়ীও জ্বলাই দিয়ে প্ৰতিবাদকাৰীসকলে।
এই বিষম পৰিস্থিতিৰ পিছত মুখ্য মন্ত্ৰী পেমা খাণ্ডুৱে এই সিদ্ধান্ত প্ৰত্যাহাৰ কৰা বুলি ঘোষণা কৰে। ইপিনে হিংসাৰ ঘটনা বিয়পি নপৰিবলৈ ইণ্টাৰনেট সেৱা বন্ধ ৰখা হৈছে ৰাজ্যখনত।
