বাংলাদেশ এয়াৰলাইনছৰ এখন বিমান বন্দুকধাৰীয়ে হাইজেক কৰাক লৈ চলি থকা উৎকণ্ঠাৰ সামৰণি পৰিছে। বাংলাদেশ সেনা বাহিনীয়ে বিমানখনৰ ভিতৰত অৱস্থান কৰি থকা বন্দুকধাৰী অপহৰণকাৰীজনক গুলীয়াই নিহত কৰে।বিমানখনত থকা ক্ৰু ৰ সদস্যকে ধৰি ১৪৮ জন যাত্ৰীক নিৰাপদে উদ্ধাৰ কৰা হৈছে।
উল্লেখযোগ্য যে, দেওবাৰে সন্ধিয়া ঢাকাৰ হজৰত শ্বাহজালাল আন্তঃৰাষ্ট্ৰীয় বিমান বন্দৰৰ পৰা ডুবাই অভিমুখে ১৪৮ জন যাত্ৰী সহিতে উৰা মাৰিছিল বিমানখন। উৰণৰ কিছুসময় পাছতে এজন বন্দুকধাৰীয়ে বিমানখনৰ ককপিতত প্ৰবেশ কৰিব খোজাক লৈ সৃষ্টি হোৱা উত্তেজনাময় পৰিবেশৰ বাবে চিতাগঙৰ শ্বাহ আমানত আন্তঃৰাষ্ট্ৰীয় বিমান বন্দৰত জৰুৰীকালীন অৱতৰণ কৰিবলগা হৈছিল বিমানখন।
ঘটনাৰ খবৰ পাই বাংলাদেশ সেনাৰ বিশেষ বাহিনীয়ে অৱতৰণৰ পাছতে বিমানখনক চাৰিওপিনৰ পৰা ঘেৰি ধৰে।বিমানখনৰ ভিতৰত থকা অপৰাধীজনক সেনাই আত্মসমৰ্পণ কৰাৰ নিৰ্দেশ দিয়ে যদিও অপৰাধীজনে ওলোটাই সেনাবাহিনীক উদ্দেশ্যি গুলীচালনা কৰে, প্ৰত্যুত্তৰত সেনাৰ গুলীত নিহত হয় অপৰাধীজন।
বিশেষ সূত্ৰৰ পৰা লাভ কৰা তথ্য অনুসৰি বিমান অপহৰণ কৰিব খোজা অপৰাধীজন মানসিকভাবে অসুস্থ আছিল। নিহত হোৱাৰ পূৰ্বে বাংলাদেশৰ প্ৰধানমন্ত্ৰী শ্বেখ হাছিনাৰ লগতো কথা পাতিব বিছাৰিছিল অপৰাধীজনে।
