গুৱাহাটী পৌৰ নিগমে গুৱাহাটীৰ ২২ নং ৱাৰ্ডৰ শ্বহীদ নগৰৰ স্মৃতি সংঘত ‘ৱাৰ্ডৰ আলোচনা’ শীৰ্ষকেৰে নাগৰিকৰ সৈতে বাৰ্তালাপৰ এটি অনুষ্ঠানৰ আয়োজন কৰে। এই বাৰ্তালাপত অংশগ্ৰহণ কৰে নুনমাটি শোধানাগাৰ আৰু শ্বহীদ নগৰ পাহাৰৰ বাসিন্দাসকলে।
এই বাৰ্তালাপ অনুষ্ঠানত উপস্থিত থাকে ৱাৰ্ড কাউন্সিলৰ ৰাজেন দাস, এৰিয়া সবা সদস্য মনোজ কুমাৰ নাথ, পৌৰনিগমৰ সহকাৰী অভিযন্তা চিত্তৰঞ্জন দত্ত আৰু শংকৰ মেধি আৰু পৌৰনিগমৰ অনাময় ব্যৱস্থা পৰিদৰ্শক সঞ্জয় মালাকাৰ।
অনুষ্ঠানত উপস্থিত থকা পৌৰনিগমৰ বিষয়াসকলে কয় যে সেমেকা পেলনীয়াসমূহ সদায় সংগ্ৰহ কৰা হ’ব আৰু শুকান পেলনীয়াসমূহ প্ৰতি মঙলবাৰ আৰু শুকুৰবাৰে সংগ্ৰহ কৰা হ’ব।
তেওঁলোকে লগতে স্থানীয় লোকসকলক স্বচ্ছতা এপ টো ডাউনলোড কৰিবলৈ অনুৰোধ জনায় যাতে তেওঁলোকে পেলনীয়া সংগ্ৰহৰ ক্ষেত্ৰত গাফিলতি কৰা ছবি তুলি আপলোড কৰাৰ লগতে অন্যান্য বিষয়সমূহো পোনপটীয়াকৈ এপৰ জৰিয়তে জনাব পাৰে।
পৌৰনিগমৰ বিষয়াসকলে বাসিন্দাসকলক এখন উন্নত তথা পৰিচ্ছন্ন গুৱাহাটী গঢ়ি তোলাত সহায় কৰিবলৈ আগন্তুক স্বচ্ছ সৰ্বেক্ষণ ২০১৮’ কাৰ্যসূচীত অংশগ্ৰহণ কৰিবলৈ আহ্বান জনায়।
