জম্মু কাশ্মীৰৰ পুলৱামাত যোৱা ১৪ ফেব্ৰুৱাৰীত পাক সমৰ্থিত সন্ত্রাসবাদীৰ ভয়ংকৰ আত্মঘাতী বোমা বিস্ফোৰণত চহিদ হোৱা অসম তথা তামুলপুৰৰ বীৰপুত্র মনেশ্বৰ বসুমতাৰীৰ আদ্যশ্ৰাদ্ধ আজি ৰাজহুৱাভাবে কলবাৰীৰ বাসগৃহত অনুষ্ঠিত হ’ব। এই উদ্দেশ্যে বীৰ চহিদগৰাকীৰ বাসগৃহত শ্ৰদ্ধাঞ্জলি অনুষ্ঠানৰ বাবে এটা স্মৃতিসৌধ অস্থায়ীভাৱে সাজি উলিওৱা হৈছে।
আজি অনুষ্ঠিত হ’বলগীয়া আদ্যশ্ৰাদ্ধৰ বাবে প্ৰায় ১০-১৫ হাজাৰ লোকৰ বাবে অভ্যৰ্থনাস্থলী সাজি উলিওৱা হৈছে। আদ্যশ্ৰাদ্ধ অনুষ্ঠানত অতিথিৰ আপ্যায়নৰ বাবে প্ৰায় ২০০ স্বেচ্ছাসেৱক যুৱক-যুৱতীক সাজু কৰি তোলা হৈছে।
দেওবাৰে বীৰ চহিদগৰাকীৰ আদ্যশ্ৰাদ্ধত মুখ্য মন্ত্রী সৰ্বানন্দ সোণোৱালো উপস্থিত হ’ব। আজি হেলিকপ্টাৰযোগে মুখ্য মন্ত্ৰী গৰাকী তামুলপুৰলৈ যাব আৰু সেনাবাহিনীৰ হেলিপেডৰ পৰা পোনে পোনে গৈ চহিদ মনেশ্বৰ বসুমতাৰীৰ বাসগৃহত উপস্থিত হৈ শ্ৰদ্ধাঞ্জলি অনুষ্ঠানত অংশ গ্ৰহণ কৰিব।
ইফালে বিটিচি প্ৰধান হাগ্ৰামা মহিলাৰীয়েও এই শ্ৰদ্ধাঞ্জলি অনুষ্ঠানত উপস্থিত থাকিব বুলি প্ৰশাসনৰ পৰা জানিব পৰা গৈছে। তাৰোপৰি কেইবাগৰাকী মন্ত্রী, বিধায়ক, উচ্চ পদস্থ সেনা বিষয়া, চি আৰ পি এফৰ উচ্চ পদস্থ বিষয়া, অসামৰিক প্ৰসাশনৰ বিষয়া-কৰ্মচাৰীকে ধৰি বিভিন্ন ৰাজনৈতিক-অৰাজনৈতিক দলৰ নেতা-কৰ্মী উপস্থিত থাকিব।
