শিৱসাগৰৰ ঐতিহ্যমণ্ডিত শিৱদৌলত অনুষ্ঠিত হোৱা শিৱৰাত্ৰি আৰু অসম চৰকাৰে শিৱৰাত্ৰিৰ লগত সংগতি ৰাখি অনুষ্ঠিত কৰা আন্তঃৰাষ্ট্ৰীয় শিৱ মহোৎসৱক কেন্দ্ৰকৰি ৰাজ্য আৰু অন্যান্য প্ৰান্তৰ লাখ লাখ ভক্তৰ সমাগম হয় শিৱসাগৰ চহৰত। বুধবাৰে সফলভাবে সামৰণি পৰে মহোৎসৱখনিৰ।
উল্লেখযোগ্য যে, বিগত দিনকেইটাত হোৱা ভক্তৰ অগণন ভিৰৰ বাবে শিৱদৌল চৌহদ আৰু ইয়াৰ ওচৰ পাজৰৰ ঠাই সমূহ ফুল, ধুপকে আদি কৰি বিভিন্ন পেলনীয়া সামগ্ৰীৰে ভৰি পৰে। অপৰিষ্কাৰ হৈ থকা ঠাই সমূহ পৰিষ্কাৰ কৰাৰ বাবে প্ৰসাশনলৈ বাট নাচাই আজি ৰাতিপুৱাৰে পৰা শিৱসাগৰৰ টুৰিষ্ট গাইড সমিতিয়ে অপৰিষ্কাৰ হৈ থকা ঠাই সমূহ চাফা কৰাৰ বাবে চাফাই অভিযান চলায়।
টুৰিষ্ট গাইড সমিতিৰ সদস্য সকলে ৰাতিপুৱাৰে পৰা হাতে হাতে ঝাড়ু লৈ মন্দিৰ চৌহদটো পৰিষ্কাৰ কৰি পেলনীয়া সামগ্ৰী সমূহ এঠাইত জমা কৰে। সংস্থাটোৰ এজন সদস্যই চাফাই অভিযানত অংশলৈ এয়া তেওঁলোকৰ দায়বদ্ধতা বুলি মন্তব্য কৰে। শিৱসাগৰৰ পৰ্যটন স্থলী সমূহ চাফ-চিকুণ কৰি ৰখাটো একমাত্ৰ চৰকাৰৰে নহয় ৰাজ্যখনৰ প্ৰতিজন নাগৰিকৰ কৰ্তব্য বুলি সাংবাদিকৰ আগত কয় টুৰিষ্ট গাইড সমিতিৰ আন এজন সদস্যই।
