মিজোৰামৰ ৰাজ্যপাল হিচাপে কাৰ্য্যনিৰ্বাহ কৰি থকা কুম্মানাম ৰাজাশেখৰণে শুকুৰবাৰে ৰাজ্যপাল পদৰ পৰা পদত্যাগ কৰে।
কেৰালা ৰাজ্যিক বিজেপিয়ে আগন্তুক লোকসভা নিৰ্বাচনত থিৰুৱানন্তপুৰম সমষ্টিৰ পৰা কংগ্ৰেছৰ বৰ্তমানৰ সাংসদ শশী থাৰুৰৰ বিৰুদ্ধে প্ৰতিদ্বন্দ্বিতা কৰাৰ বাবে ৰাজাশেখৰণক প্ৰস্তাৱ দিয়াৰ পাছতে ৰাজ্যপালৰ পদৰ পৰা পদত্যাগ কৰে ৰাজাশেখৰণে।
মিজোৰামৰ ৰাজ্যপাল হিচাপে ২০১৮ চনৰ মে’ মাহত দায়িত্বভাৰ গ্ৰহণ কৰাৰ ৯ মাহ পাছতে ৰাজাশেখৰণে পদত্যাগ কৰে। ৰাজ্যপালজনৰ পদত্যাগ পত্ৰ ইতিমধ্যে ৰাষ্ট্ৰপতিয়ে গ্ৰহণ কৰিছে। আনহাতে, ৰাষ্ট্ৰপতি ভৱনৰ পৰা অসমৰ ৰাজ্যপাল জগদীশ মুখীক মিজোৰামৰ ৰাজ্যপাল হিচাপে অতিৰিক্ত দায়িত্ব অৰ্পণ কৰা হয়। জগদীশ মুখীয়ে নিয়মীয়া ৰাজ্যপাল নিযুক্তি নিদিয়া পৰ্যন্ত অসমৰ লগতে মিজোৰামৰো ৰাজ্যপাল হিচাপে কাৰ্য্যনিৰ্বাহ কৰিব।
সূত্ৰৰ পৰা লাভ কৰা খবৰ অনুসৰি, বিজেপিৰ নৈতিক পথ প্ৰদৰ্শক ৰাষ্ট্ৰীয় স্বয়ংসেৱক সংঘয়ো ৰাজাশেখৰণ দললৈ উভতি অহাটো বিচাৰিছিল বুলি বিভিন্ন মহলত আলোচনা চলিছে।
