অসম চৰকাৰে ২০১৭ বৰ্ষৰ শ্ৰীমন্ত শংকৰদেৱ বঁটা বৰপেটা সত্ৰৰ বুঢ়া সত্ৰীয়া বশিষ্ঠ দেৱ শৰ্মা, ২০১৬ আৰু ২০১৯ বৰ্ষৰ মাধৱদেৱ বঁটা ক্ৰমে মায়ামৰা দিনজয় সত্ৰৰ সত্ৰাধিকাৰ যোগানন্দ চন্দ্ৰ গোস্বামী আৰু প্ৰথিতযশা ভাৰতীয় নৃত্য ইতিহাসবিদ পণ্ডিত আৰু সমালোচক ড০ সুনীল কোঠাৰী আৰু ২০১৮ বৰ্ষৰ কালিচৰণ ব্ৰহ্ম বঁটা ওদালগুৰিৰ বৰঙাজুলী শংকৰদেৱ সত্ৰৰ সত্ৰাধিকাৰ হৰেকৃষ্ণ মহন্তলৈ আগবঢ়াইছে।
১৯৩৮ চনত জন্ম গ্ৰহণ কৰা বৰপেটা সত্ৰৰ বুঢ়া সত্ৰীয়া বশিষ্ঠ দেৱ শৰ্মাই সত্ৰীয়া সংস্কৃতিৰ লগতে থিয় নাম, ঘোষা, হলিগীত, নাওখেল গীত, ভাওনা, গুৱাহাটী অনাতাঁৰ কেন্দ্ৰৰ জৰিয়তে প্ৰসাৰৰ ব্যৱস্থা কৰাৰ উপৰি নতুন দিল্লী, পাটনা, হিমাচল প্ৰদেশ দক্ষিণ ভাৰতত প্ৰদৰ্শনৰ মাধ্যমেদি সংস্কৃতি প্ৰসাৰৰ বাবে পদক্ষেপ গ্ৰহণ কৰি আহিছে।
বিভিন্ন বঁটাৰে বিভূষিত বৰপেটা সত্ৰৰ বুঢ়া সত্ৰীয়া বশিষ্ঠ দেৱ শৰ্মাই ২০১১ চনত সাংস্কৃতিক মহাসভাৰ তৰফৰ পৰা জীৱনজোৰা সাংস্কৃতিক সাধনা বঁটা, ২০১২ চনত অসম জাতীয় বিদ্যালয়ৰ ফেল’শ্বিপ, ২০১৩ চনত শাখা সত্ৰ সমাজ বৰপেটাৰ পৰা মথুৰাদাস বুঢ়া আতা বঁটা, ২০১৪ চনত বদলা আতা সেৱা সমিতি, কমলাবাৰী সত্ৰ অসমৰ তৰফৰ পৰা বদলা পদ্মআতা সন্মান, ২০১৬ চনত সঞ্চাৰণ, যোৰহাটৰ তৰফৰ পৰা আগবঢ়োৱা শংকৰ মাধৱ সন্মান লাভ কৰিছে।
মাধৱ দেৱ বঁটাৰ বাবে নিৰ্বাচিত মায়ামৰা দিনজয় সত্ৰ চাবুৱাৰ সত্ৰাধিকাৰ যোগানন্দ চন্দ্ৰ গোস্বামী শ্বিলঙৰ চেইণ্ট এন্থনিজ কলেজৰ স্নাতক। গোস্বামীয়ে ৰাষ্ট্ৰীয় পৰ্যায়ত সত্ৰীয়া সংগীতৰ স্বীকৃতি লভাৰ বাবে বিভিন্ন পদক্ষেপ গ্ৰহণ কৰাৰ লগতে সত্ৰীয়া সংস্কৃতিৰ বিভিন্ন দিশ কাকত-আলোচনীত লিখনীৰ জৰিয়তে প্ৰকাশ কৰি আহিছে।
বিশিষ্ট নৃত্য সমালোচক পণ্ডিত তথা অধ্যাপক ড০ সুনীল কোঠাৰীয়ে ভাৰতীয় ধ্ৰুপদী নৃত্য আৰু ইয়াৰ সৈতে জড়িত বিভিন্ন নৃত্য শৈলী সম্পৰ্কে ১২ খন মূল্যৱান গ্ৰন্থ ৰচনা কৰি ভাৰতীয় সংগীত সাহিত্যক সমৃদ্ধ কৰিছে। ২০০১ চনত পদ্মশ্ৰী সন্মান লাভ কৰা কোঠাৰীয়ে ১৯৯৫ চনত সংগীত নাটক একাডেমী বঁটাও লাভ কৰিছিল।
আনহাতে কালিচৰণ ব্ৰহ্ম বঁটাৰ বাবে নিৰ্বাচিত হৰেকৃষ্ণ মহন্তই ২০১১-১২ চনত পিতাম্বৰদেৱ গোস্বামী ৰাষ্ট্ৰীয় বঁটা, ২০১২ চনত অপূৰ্ব সিংহ বঁটা আৰু বৰপেটা সত্ৰৰ পৰা ‘সত্ৰভূষণ’ উপাধি লাভি কৰিছে।
