অনুসূচিত জাতিক দীৰ্ঘদিন ধৰি প্ৰতাৰণা আৰু প্ৰৱঞ্চনা কৰি অহা বিজেপি চৰকাৰৰ বিৰুদ্ধে অহা ১৫ মাৰ্চৰ পৰা এলানি ধাৰাবাহিক আন্দোলনৰ কাৰ্য্যসূচীৰ ঘোষণা কৰিছে অনুসূচিত জাতি যুৱ ছাত্ৰ পৰিষদে। নৰ্থ-ইষ্ট নাওৰ সৈতে হোৱা টেলিফোনিক বাৰ্তালাপত এই কথা জানিবলৈ দিয়ে সংগঠনটোৰ ৰাজ্যিক সভাপতি ৰুবুল দাসে।
চলিত বৰ্ষৰ ৰাজ্য চৰকাৰৰ বাজেটত অনুসূচিত জাতিৰ উন্নয়নৰ বাবে কোনোধৰণৰ আঁচনি বা বিশেষ পুজিৰ ব্যৱস্থা নকৰাৰ অভিযোগ তুলি সংগঠনটোৱে ধাৰাবাহিক আন্দোলনৰ কাৰ্য্যসূচী ৰূপায়ণ কৰিব।
অহা ১৫ মাৰ্চৰ দিনা সংগঠনটোৱে প্ৰত্যেকখন জিলাৰ উপায়ুক্তৰ কাৰ্য্যালয়ৰ সন্মুখত পুৱা ১১ বজাৰ পৰা বিয়লি ২ বজালৈ অৱস্থান ধৰ্মঘট কাৰ্য্যসূচী ৰূপায়ণ কৰাৰ লগতে তেওঁলোকৰ দাবীসমূহ সম্বলিত এক স্মাৰক পত্ৰ মুখ্য মন্ত্ৰী আৰু প্ৰধান মন্ত্ৰীলৈ প্ৰেৰণ কৰিব।
ইয়াৰোপৰি সংগঠনটোৱে ২২ মাৰ্চৰ পৰা ২৬ মাৰ্চলৈ জিলা সমিতিসমূহৰ উদ্যোগত প্ৰত্যেকখন আঞ্চলিক আৰু গাওঁ পৰ্য্যায়ত কেন্দ্ৰীয় তথা জিলা পৰ্য্যবেক্ষকৰ উপস্থিতিত সজাগতা সভা অনুষ্ঠিত কৰিব। লগতে ৩০ আৰু ৩১ মাৰ্চৰ দিনা নগাওঁ জিলা সমিতিৰ সৌজন্যত কেন্দ্ৰীয় সাংগঠনিক অভিৱৰ্তন অনুষ্ঠিত কৰিব।
৬ এপ্ৰিলৰ দিনা সংগঠনটোৰ দিলা সমিতিৰ উদ্যোগত গ্ৰামাঞ্চলত বাইক ৰেলী আৰু সন্ধিয়া জোঁৰ সমদল কাৰ্য্যসূচী ৰূপায়ণ কৰিব বুলিও ৰাজ্যিক সভাপতিগৰাকীয়ে জানিবলৈ দিয়ে। লগতে অহা ১০ এপ্ৰিলৰ দিনা কেন্দ্ৰীয় সমিতিৰ উদ্যোগত অনুসূচিত জাতিৰ বিভিন্ন দাবীৰ সমৰ্থনত নাগৰিক সভা অনুষ্ঠিত হ’ব।
আনহাতে, এপ্ৰিল মাহৰ শেষৰফালে দিল্লীৰ যন্তৰ-মন্তৰত সংগঠনটোৱে প্ৰতিবাদী কাৰ্য্যসূচী ৰূপায়ণ কৰিব বুলি দাসে জানিবলৈ দিয়ে।
তদুপৰি স্বাধীনতাৰ ৭০ বছৰ ধৰি কোনো এখন চৰকাৰেই অনুসুচিত জাতিৰ কল্যাণৰ বাবে সুদূৰপ্ৰসাৰী কাৰ্য্যব্যৱস্থা গ্ৰহণ নকৰা বুলি আমাৰ সাংবাদিকৰ আগত দাসে কয়।
তেওঁ লগতে কয় ‘একমাত্ৰ সংৰক্ষণ ব্যৱস্থাৰ যোগেদি অনুসূচিত জাতিৰ সামগ্ৰিক উন্নয়ন আৰু সমবিকাশ সম্ভৱ নহয়। জাতিটোৰ কল্যাণৰ বাবে স্ব-গোষ্ঠীয় ৰাজনৈতিক ব্যৱস্থা নথকাৰ বাবে এনেধৰণে কণা হাঁহক পতান দিয়াৰ দৰে অনুসুচিত জাতিৰ লোকক বাৰম্বাৰ বঞ্চিত কৰি অহা হৈছে।‘
