বিজেপি আৰু অগপৰ মিত্ৰতাক সাধাৰণভাৱে ল’ব পৰা নাই অগপৰ তৃণমূল কৰ্মীসকলে। আজি অগপৰ আমবাৰীস্থিত মুখ্য কাৰ্য্যালয়ৰ সন্মুখত প্ৰতিফলন ঘটিল মিত্ৰতা বিৰোধী অগপৰ সাধাৰণ সমৰ্থকৰ প্ৰতিবাদী কণ্ঠৰ।
আনহাতে, মিত্ৰতাৰ বিৰোধিতাৰে মুখ্য কাৰ্য্যায়লয়ৰ সন্মুখত প্ৰতিবাদ সাব্যস্ত কৰিবলৈ অহা অগপৰ সমৰ্থক সকলৰ লগত হতাহতিত লিপ্ত হ’ল অগপ-বিজেপিৰ মিত্ৰতাক সমৰ্থন কৰা দলৰ কিছু সংখ্যক সদস্য।
একে গোত্ৰৰ দুয়োটা ফৈদৰ কৰ্মী-সমৰ্থকসকলৰ হতাহতিত উত্তপ্ত হৈ পৰে আমবাৰীৰ অগপৰ মুখ্য কাৰ্য্যালয়ৰ চৌহদ। নৰ্থ-ইষ্ট নাওৰ মহানগৰ সংবাদদাতাৰ হাতত আহি পৰা তথ্য অনুসৰি আবু জাহান বুলবুলি নামৰ হোজাইৰ পৰা অহা অগপৰ প্ৰতিবাদী সমৰ্থক জনক নিৰ্মমভাৱে প্ৰহাৰ কৰে মিত্ৰতাপন্থী অগপ কৰ্মী সুশীল ডেকাই।
আনহাতে, মহিলা প্ৰতিবাদকাৰী সকলৰ ওপৰতো হাত দিয়াৰ অভিযোগ উত্থাপিত হৈছে সুশীল ডেকাৰ ওপৰত। তাৎপৰ্য্যপূৰ্ণভাৱে ঘটনাৰ লগত জড়িত থকা সুশীল ডেকা অগপৰ কৰ্মী নহয় আৰু বহু দিনৰ পূৰ্বে তেওঁক দলৰ পৰা বহিস্কাৰ কৰা হৈছে বুলি দায়সৰা মন্তব্য কৰে অগপৰ মুখপাত্ৰ তপন দাসে।
মিত্ৰতাপন্থী অগপ কৰ্মীৰ আক্ৰমণত আহত আবু জাহান বুলবুলিক লতাশিল আৰক্ষীয়ে আটক কৰে।
উল্লেখযোগ্য যে, মিত্ৰতাপন্থী অগপ কৰ্মী সকলে অগপৰ মুখ্য কাৰ্য্যালয়ৰ সন্মুখত প্ৰতিবাদ সাব্যস্ত কৰিবলৈ অহা কৰ্মী সকলক আক্ৰমণ কৰি অতুল বৰা জিন্দাবাদ, কেশৱ মহন্ত জিন্দবাদ ধ্বনি দি পৰিবেশ অস্থিৰ কৰি তোলে।
আনহাতে, প্ৰতিবাদকাৰীসকলে দলৰ স্বাৰ্থত আৰু মুখলজ্জ্যাত নিজকে কোনো দলৰ সমৰ্থক নহয় মাত্ৰ জাতিক ভালপোৱা সাধাৰণ নাগৰিক হিচাপে পৰিচয় দি নাগৰিকত্ব বিধেয়ক বিজেপিয়ে গৃহীত কৰিম বুলি কোৱাৰ পাছতো কিয় অগপই দলটোৰ সৈতে মিত্ৰতা কৰিলে বুলি প্ৰশ্ন কৰে।
অগপ দলৰ কাৰ্য্যালয়ত থকা সদস্য সকলে অৱশ্যে সমগ্ৰ ঘটনাৰ পৰা দায় সাৰিব চেষ্টা কৰি প্ৰতিবাদকাৰী সকলক কংগ্ৰেছৰ দালাল আখ্যা দিয়ে।
বিষয় যিয়েই নহওক অগপ কৰ্মীৰ আজিৰ দিনটোৰ আচৰণে হিমন্ত বিশ্বই অগপ কাৰ্য্যালয়ক বিবাহ ভৱন আখ্যা দিয়া কথাষাৰকে যেন আৰু এক মাত্ৰা প্ৰদান কৰিলে।
