অসমৰ অবিচ্ছেদ্য অংগ বৰাক উপত্যকাত পুনৰ বিচ্ছিন্নতাবাদী মানসিকতাৰ উকমুকনি ঘটিছে। বৰাকৰ য়ুনিয়ন টেৰিটৰি ডিমাণ্ড কমিটি নামৰ এটা সংগঠনৰ নেতৃত্বত এই পৃথক বৰাকৰ দাবী উত্থাপিত হৈছে। কালি এই সংগঠনটোৰ নেতৃত্বত প্ৰায় চাৰি হাজাৰ লোকে পৃথক কেন্দ্ৰশাসিত ৰাজ্যৰ দাবীৰে সমদল বাহিৰ কৰে।
উল্লেখযোগ্য যে এই সংগঠনটোৱে জন্ম পাইছিল সন্তোষ মোহন দেবৰ পৃষ্ঠপোষকতাত আশীৰ দশকতে। মূলত বৰাকৰ বাঙালীসকলৰ স্বাৰ্থক অগ্ৰাধিকাৰ দি গঠিত হোৱা এই সংগঠনটোৱে মাজে মাজে অসম বিৰোধী স্থিতি লৈ আত্মপ্ৰকাশ কৰি আহিছে যদিও বৰাকবাসীৰ ব্যাপক সঁহাৰি লাভ কৰা নাছিল। কিন্তু এন আৰ চি প্ৰক্ৰিয়াৰ প্ৰথমখন খচৰা প্ৰকাশৰ পিছত বৰাকৰ বৃহৎ সংখ্যক লোকৰ নাম বাদ পৰা বুলি ওলোৱা খবৰত অসন্তুষ্ট হৈ উপত্যকাটোৰ বহুতো লোক ক্ষুভিত হৈ পৰে। ইয়াৰে সুযোগ লৈ এই সংগঠনটোৱে নিজৰ খোপনি বৃদ্ধি কৰিছে। ইয়াত হাত উজান দিছে কংগ্ৰেছী সাংসদ সুস্মিতা দেবকে ধৰি বৰাকৰ কেইবাজনো নেতা তথা বুদ্ধিজীৱীয়ে।
কালি উলিওৱা সমদলটোৱে বেনাৰ, প্লকাৰ্ড লৈ বৰাকৰ তিনিখন জিলা, ক্ৰমে হাইলাকান্দি, কৰিমগঞ্জ আৰু কাচাৰক লৈ এক পৃথক কেন্দ্ৰশাসিত ৰাজ্য গঠনৰ দাবী তোলে। তেওঁলোকে অসম চুক্তি বাতিল কৰা আৰু সমগ্ৰ বৰাক উপত্যকাটোক এন আৰ চি প্ৰক্ৰিয়াটোৰ বাহিৰত ৰখাৰ দাবী তোলে।
আনহাতে প্ৰতিবাদকাৰীসকলে সমদল উলিওৱাৰ পিছত চহিদ খুদিৰাম বসুৰ প্ৰতিমূৰ্তিৰ তলত সমবেত হয়। ইয়াত কেইবাজনেও ভাষণ দিয়ে। ভাষণত বক্তাসকলে প্ৰধানকৈ আছুক তেওঁলোকৰ উগ্ৰ জাতীয়তাবাদী মানসিকতাৰ বাবে সমালোচনা কৰা হয়। লগতে আলফাৰ প্ৰতিও একে অভিযোগৰ আঙুলি টোঁৱায়। তেওঁলোকে আছু আৰু আলফাৰ ষড়যন্ত্ৰতে এন আৰ চি প্ৰক্ৰিয়া চলিছে বুলি অভিযোগ কৰে আৰু উচ্চতম ন্যায়ালয়ৰ ভয় দেখুৱাই আছুৱে নিজৰ উগ্ৰ জাতীয়তাবাদক ৰূপায়ণ কৰিছে বুলি কয়।
ইয়াৰ উপৰি মুখ্য মন্ত্ৰী সৰ্বানন্দ সোণোৱালকো কঠোৰ সমালোচনা কৰা হয়। বৰাক-ব্ৰহ্মপুত্ৰ উপত্যকাৰ সমন্বয়ৰ কথা কোৱা সোণোৱালে প্ৰকৃততে উগ্ৰ জাতীয়তাবাদীসকলৰহে স্বাৰ্থ ৰক্ষা কৰিছে বুলি অভিযোগ কৰে। আনহাতে অঞ্চলটোৰ ৰাজনৈতিক নেতাসকলকো সমালোচনা কৰা হয়। অঞ্চলটোৰ ৰাজনৈতিক নেতাসকলে বৰাকত এটা কয় আৰু ব্ৰহ্মপুত্ৰ উপত্যকাত গৈ তেওঁলোকে সুৰ সলনি কৰে বুলি অভিযোগ আনে।
উল্লেখযোগ্য যে এন আৰ চি প্ৰক্ৰিয়াৰ প্ৰথমখন খচৰাৰ পিছত বৰাকৰ বাংলাভাষী মানুহৰ মাজত যথেষ্ট ক্ষোভৰ উদগিৰণ হোৱা দেখা গৈছে। এন আৰ চি কৰ্তৃপক্ষ তথা চৰকাৰে এই প্ৰক্ৰিয়াটোত আস্থা ৰাখিবলৈ আৰু দ্বিতীয়খন খচৰা প্ৰকাশ পোৱালৈ ধৈৰ্য্য ধৰিবলৈ বাৰম্বাৰ আহ্বান জনাইছে যদিও বহুতকে আশ্বস্ত কৰিব পৰা নাই তেনে আহ্বানে। লগতে পশ্চিম বংগৰ মুখ্য মন্ত্ৰী মমতা বেনাৰ্জীয়েও অসমৰ বাঙালীসকলক এন আৰ চি প্ৰক্ৰিয়াই সংকটত পেলাব বুলি কৰা মন্তব্যয়ো এই ক্ষেত্ৰত ভূমিকা গ্ৰহণ কৰিছে। এনে পৰিপ্ৰেক্ষিতত এন আৰ চি প্ৰক্ৰিয়াই অসমক আন এক বিভাজনৰ দিশত লৈ যাব নেকি বুলি শংকা ব্যক্ত কৰিছে বহুতো সচেতন লোকে।
