তচনচ হোৱাৰ পথত গেৰুৱা দল বিজেপিৰ উত্তৰ-পূব দখলৰ স্বপ্ন। মঙলবাৰে সন্ধিয়া বিজেপি এৰি নেশ্যনেল পীপলছ পাৰ্টিত সমূহীয়াভাৱে যোগদান কৰিলে অৰুণাচল প্ৰদেশৰ দুজন মন্ত্ৰী আৰু ১২জনকৈ বিধায়কে। একেলগে এন পি পিত যোগ দিছে কালি টিকট নাপাই অসন্তুষ্ট হৈ দলটো ত্যাগ কৰা বিজেপিৰ ৰাজ্যিক সাধাৰণ সম্পাদক জাৰপুম গামলিনে।
ইটানগৰত আজি সন্ধিয়া এন পি পিৰ ৰাষ্ট্ৰীয় সাধাৰণ সম্পাদক থমাছ চাংমাৰ উপস্থিতিত দলটোত যোগ দিয়ে ৰাজ্যখনৰ জাৰপাম গামলিন আৰু মন্ত্ৰী-বিধায়ককেইজনে। এওঁলোকৰ ভিতৰত আছে ৰাজ্যখনৰ গৃহ মন্ত্ৰী কুমাৰ ৱাই আৰু পৰ্য্যটন মন্ত্ৰী জাৰকাৰ গামলিন।
এই প্ৰতিবেদকৰ সৈতে হোৱা টেলিফোনিক বাৰ্তালাপত কালি গেৰুৱা দলটো ত্যাগ কৰা জাৰপাম গামলিনে এই কথা প্ৰকাশ কৰিছে।
১৪জনকৈ মন্ত্ৰী-বিধায়কে দলত্যাগ কৰাৰ পিছত ৬০জনীয়া বিধানসভাত বিজেপিৰ শক্তি থাকিলগৈ (৪৮-১৪) ৩৪জন। ১৮জন বিধায়কেৰে এন পি পি হ’লগৈ দ্বিতীয় বৃহৎ দল। কংগ্ৰেছৰ ৬জন আৰু নিৰ্দলীয়ৰ আছে ২জন বিধায়ক।
ৰাজ্যখনৰ আগন্তুক বিধানসভা আৰু লোকসভা নিৰ্বাচনৰ আগমুহূৰ্তত এইদৰে বৃহৎ সংখ্যক বিজেপি নেতা তথা মন্ত্ৰী-বিধায়কে দলত্যাগ কৰাটো বিজেপিৰ বাবে মোক্ষম আঘাত বুলি বিবেচিত হৈছে।
উল্লেখযোগ্য যে কালি নিশাই জাৰপুম গামলিনৰ লগত বিজেপিৰ এটা ৭জনীয়া মন্ত্ৰী-বিধায়কৰ দল আহি গুৱাহাটীৰ হোটেল তাজ ভিভাণ্টাত বাহৰ পাতিছিল। নিশাই হোটেলখনত আহি উপস্থিত হৈছিল মেঘালয়ৰ মুখ্য মন্ত্ৰী তথা এন পি পিৰ মুৰব্বী কনৰাড চাংমা। চাংমাৰ সৈতে হোটেল তাজ ভিভাণ্টাত দলটোৰ কেইবাঘণ্টাজোৰা এক বৈঠকো অনুষ্ঠিত হৈছিল। কালিয়েই এক বিশেষ সূত্ৰৰ পৰা লাভ কৰা তথ্যৰ ভিত্তিত নৰ্থ-ইষ্ট নাওত এই বাতৰি প্ৰকাশ পাইছিল।
কালি নিশাৰ বৈঠকৰ পাছত আজি জাৰপুম গামলিন আৰু মন্ত্ৰী-বিধায়কৰ দলটো ইটানগৰলৈ উভতি যায়। পাছত তাত উপস্থিত হোৱা এন পি পিৰ ৰাষ্ট্ৰীয় সাধাৰণ সম্পাদক থমাচ চাংমাৰ উপস্থিতিত আজি এই বৃহৎ সংখ্যক বিজেপি মন্ত্ৰী-বিধায়কে এন পি পিত যোগ দিয়ে।
