নিজেই যি বিচাৰে তাকে কৰিব পাৰে, ৰাষ্ট্ৰীয় নেতৃত্বই তেওঁক পুৰস্কৃত কৰিবলৈ যিকোনো সময়তে সাজু থাকে বুলি ভবা অসমৰ শক্তিশালী মন্ত্ৰী হিমন্ত বিশ্বই যোৱা দুই-তিনি দিন সম্পূৰ্ণ নীৰৱতা অৱলম্বন কৰা দেখা গৈছে, যিটো তেওঁৰ স্বভাৱৰ ব্যতিক্ৰম।
ৰাজ্যিক নেতৃত্বই প্ৰস্তুত কৰা প্ৰাৰ্থী পেনেলত তেজপুৰ সমষ্টিৰ পৰা কেৱল মন্ত্ৰী হিমন্তৰ নাম প্ৰেৰণ কৰা সত্ত্বেও তেওঁক গ্ৰহণ নকৰিলে কেন্দ্ৰীয় নেতৃত্বই। বৰং তেওঁ কোনো সমষ্টিৰ পৰাই নিৰ্বাচনত উঠিব নালাগে বুলিহে নিৰ্দেশ আহিল মোদী-শ্বাহৰ পৰা। এই কথাত মন্ত্ৰীজনৰ মুখেৰে কোনো প্ৰতিক্ৰিয়া ওলোৱা নাই এই পৰ্য্যন্ত। কিন্তু ব্যতিক্ৰম নীৰৱতাত যথেষ্ট ইংগিত বিচাৰি ল’ব পাৰি। মন কৰিব লগীয়া যে ১৯ মাৰ্চত মন্ত্ৰীজনে নিজৰ টুইটাৰ প্ৰফাইল পিকচাৰ সলাই এটা অসন্তুষ্ট, ক্ৰোধিত অভিব্যক্তিৰ ফটো লগোৱা দেখা গৈছে, য’ত অৱনত শিৰে থকা দেখা গৈছে মন্ত্ৰীজনক।
লোকসভা নিৰ্বাচনত যিকোনো এটা সমষ্টিৰ পৰা প্ৰতিদ্বন্দ্বিতা কৰিবলৈ আশা কৰি থকা মন্ত্ৰীজনে যোৱা কেইদিনত সংবাদ মাধ্যমকো এৰাই চলা দেখা গৈছে। ক’তো কোনো মন্তব্য দিয়া নাই তেওঁৰ প্ৰাৰ্থিত্ব কেন্দ্ৰীয় নেতৃত্বই প্ৰত্যাখ্যান কৰা সন্দৰ্ভত।
বিজেপিত যোগদান কৰাৰ পিছত ৰাজ্যত দলটোৰ হৰ্তাকৰ্তা হৈ পৰা মন্ত্ৰীজনে প্ৰথমবাৰৰ বাবে দলৰ মজিয়াত অপমানিত বোধ কৰিলে নেকি?
মন কৰিব লগীয়া কথাটো হ’ল, মন্ত্ৰীজনে নিজেই অত্যুক্তিৰে নিজৰ এটা কৃত্ৰিম ভাবমূৰ্তি তৈয়াৰ কৰাৰ চেষ্টা কৰি আহিছিল। আনকি তেওঁ এইটোও প্ৰচাৰ কৰাইছিল যে ৰাষ্ট্ৰীয় নেতৃত্বই তেওঁৰ কামৰ পুৰস্কাৰ স্বৰূপে নিৰ্বাচনত অৱতীৰ্ণ হ’বৰ বাবে দেশৰ যিকোনো এটা সমষ্টি বাছি ল’বলৈ অনুৰোধ কৰিছে।
কিন্তু ৰঞ্জিত দাসৰ দ্বাৰা প্ৰচাৰিত এই বিয়াগোম খবৰটো মানুহৰ মুখে মুখে চৰ্চা হোৱাৰ দুদিন পিছতে খবৰ আহিল যে ৰাষ্ট্ৰীয় নেতৃত্বই হিমন্তক নিৰ্বাচনত অৱতীৰ্ণ হোৱাৰ পৰা বাধা দিছে। লগে লগে পূৰ্বে প্ৰচাৰিত খবৰটো যে এটা তৈয়াৰী, মিছা খবৰ আছিল ফাঁচ হৈ পৰিল। লগতে চেঁচা পানী পৰিল মন্ত্ৰীজনৰ দিল্লীৰ ৰাজনীতিলৈ যোৱাৰ আকাংক্ষাতো।
মন্ত্ৰীজন ৰাষ্ট্ৰীয় নেতৃত্বই তেওঁৰ ইচ্ছাক বিনাচৰ্তে মূল্য দিয়াৰ ক্ষেত্ৰত ইমানেই আত্মবিশ্বাসী আছিল যে তেওঁ সভাই-সমিতিয়ে ৰাজ্যৰ ৰাজনীতিক এক প্ৰকাৰৰ বিদায় দিয়া বুলি ঘোষণা কৰি ফুৰিছিল। আনকি কেইদিনমান পূৰ্বে যোৰহাট মেডিকেল কলেজলৈ যাওঁতে তাত ৰাজহুৱাকৈ সম্বোধন কৰি কৈছিল, ”মই হয়তো স্বাস্থ্য মন্ত্ৰী হিচাপে আকৌ নাহিম ইয়ালৈ”।
কিন্তু ৰাষ্ট্ৰীয় নেতৃত্বই তেওঁক এই নিৰ্দেশহে দিয়া বুলি দলটোৰ ৰাজ্যিক সভাপতি ৰঞ্জিত দাসৰ মন্তব্যৰ পৰা জানিব পৰা গৈছে যে ‘নেডা’ৰ আহ্বায়ক হিচাপে নেতৃত্ব লৈ সমগ্ৰ উত্তৰ-পূবত বিজেপিৰ প্ৰাৰ্থীক জিকাই অনাৰ দায়িত্ব ল’ব লাগে মন্ত্ৰীজনে।
ইয়াৰ পৰাই এটা কথা স্পষ্ট হ’ল যে বিজেপিয়ে হিমন্তক দলৰ ৰাজনৈতিক লাভৰ বাবেহে ব্যৱহাৰ কৰিব বিচাৰে। কংগ্ৰেছৰ দিনত দুৰ্নীতিত অভিযুক্তসকলৰ ভিতৰত অন্যতম বুলি মুকলিকৈ ঘোষণা কৰিও দলটোৱে হিমন্তক নিজৰ দললৈ নিয়াৰ আঁৰৰ উদ্দেশ্য ইয়াতে স্পষ্ট হয়। চতুৰ ৰাজনীতিকজনৰ পৰা সৰ্বাধিক কাম আদায় কৰাই দলটোৰ লক্ষ্য। তেওঁৰ লাভৰ বাবে দলটোৱে তেওঁক আদৰি নিয়া নাই -এই বাৰ্তাই যেন দিলে ৰাষ্ট্ৰীয় নেতৃত্বই।
অৱশ্যে তেওঁক ৰাজ্যসভাৰ সাংসদ কৰি নিয়াৰ প্ৰতিশ্ৰুতি দিয়া বুলি আন এটা সান্ত্বনামূলক খবৰো উলিয়াই দিয়া হৈছে। তথাপি মন্ত্ৰীজনৰ নীৰৱতা মন কৰিব লগীয়া।
