পুনৰ সংস্থাপনৰ নামত চৰকাৰী বঞ্চনাত অতিষ্ঠ হৈ তিনিচুকীয়া জিলাৰ জাগুন আঞ্চলিক বন বিষয়া কাৰ্যালয়ৰ অন্তৰ্গত টিংকুপানী সংৰক্ষিত বনাঞ্চলত আশ্ৰয় ল’বলৈ যোৱা ডিব্ৰু ছৈখোৱা ৰাষ্ট্ৰীয় উদ্যানৰ ভিতৰৰ দধিয়া বনগাওঁ বাসীৰ ওপৰত কালি অৰ্থাৎ ২১ মাৰ্চত জঁপিয়াই পৰিছিল জাতি-মাটি-ভেটিৰ শ্ল’গান দিয়া বিজেপি চৰকাৰৰ আৰক্ষী, চি আৰ পি এফ বাহিনী৷
আৰক্ষী-চি আৰ পি এফৰ লগতে বনকৰ্মীৰ নিৰ্বিচাৰ লাঠী চালনাত মিচিং ছাত্ৰ সংগঠন টি এম পি কেৰ কৰ্মীসহ শতাধিক লোক আহত হৈছিল। এই ঘটনাৰ পিছত আজি মাৰ্ঘেৰিটা মহকুমা প্ৰশাসনৰ আহ্বানত মিচিং ছাত্ৰ সংগঠন টি এম পিকৰে এখন বৈঠক অনুষ্ঠিত হয়৷ উক্ত বৈঠকত টি এম পিকেৰ কৰ্মীক প্ৰহাৰ কৰা কাৰ্যত দুখ প্ৰকাশ কৰি প্ৰশাসনে ভুল স্বীকাৰ কৰে৷ তদুপৰি আগন্তক লোকসভা নিৰ্বাচনলৈকে ৰাইজক অপেক্ষা কৰাৰ আহ্বানেৰে টি এম পি কেক বুজনি দিবলৈ প্ৰশাসনে অনুৰোধ জনায়৷
আনহাতে এক বিবৃতিত টি এম পি কেৰ তিনিচুকীয়া জিলা সমিতিৰ উপদেষ্টা মিণ্টুৰাজ মৰাঙে কয় যে দিনে নিশাই অবৈধ কয়লা খননেৰে নামফাই সংৰক্ষিত বনাঞ্চলৰ অস্তিত্ব বিপন্ন কৰি একাংশ কয়লা মাফিয়াক ৰক্ষাণাবেক্ষণ দিয়া প্ৰশাসনে ভূমিহীন সৰ্বস্বান্ত দধিয়াবাসীৰ ওপৰত চলোৱা এনে অতিশাৰ্য দুৰ্ভাগ্যজনক৷ মিচিং ছাত্ৰ নেতা গৰাকীয়ে কালিৰ এই বৰ্বৰ আক্ৰমণৰ ঘটনাৰ উচ্চ পৰ্যায়ৰ তদন্ত দাবী কৰাৰ লগতে আগন্তুক সময়ত মুখ্য মন্ত্ৰীৰ বাসগৃহ অৱৰোধ কৰি বিভিন্ন প্ৰতিবাদী কাৰ্যসূচী গ্ৰহণৰ হুংকাৰ দিছে৷ তদুপৰি মুখ্যমন্ত্ৰীৰ গৃহ সমষ্টিবাসীক চৰকাৰে কৰা এনে বৰ্বৰতাৰ ফল বিজেপিয়ে আগন্তক নিৰ্বাচনত ভুগিব লাগিব বুলিও সকীয়াই দিয়ে৷
উল্লেখযোগ্য যে মুখ্য মন্ত্ৰী সৰ্বান্দ সোণোৱালৰ গৃহ পঞ্চায়তৰ অন্তৰ্গত দধিয়াবাসীক বিগত ২০১৭ চনৰ ২১জুলাইত চৰকাৰে ৮ মাহৰ ভিতৰত সংস্থাপন দিয়াৰ প্ৰতিশ্ৰুতি প্ৰদান কৰিছিল৷ কিন্তু সেই প্ৰতিশ্ৰুতিৰ সময়সীমা উকলি যোৱাৰ পাছত দধিয়াবাসীয়ে আন্দোলনৰ কাৰ্যসূচীৰ লগতে বিগত পঞ্চায়ত নিৰ্বাচন বৰ্জনেৰে প্ৰতিবাদ সাব্যস্ত কৰিছিল৷
পিছত মুখ্য মন্ত্ৰীয়ে টি এম পি কেৰ সৈতে আলোচনাত মিলিত হৈ দধিয়াবাসীক চলিত বৰ্ষৰ খৰালিৰ ভিতৰতে পুনৰ সংস্থাপনৰ চূড়ান্ত প্ৰতিশ্ৰুতি দিছিল৷ কিন্তু সম্প্ৰতি বাৰিষাৰ আগমণৰ প্ৰাকমুহূৰ্তলৈকে দধিয়াবাসীক চৰকাৰে দিয়া পুনৰ সংস্থাপনৰ প্ৰতিশ্ৰুতি প্ৰতিশ্ৰুতি হৈয়ে থাকিল।
ফলত চৰকাৰৰ প্ৰতাৰণাত ক্ষুব্ধ হৈ কালি দধিয়াৰ প্ৰায় তিনিশতাধিক পুৰুষ-মহিলা, সন্তানসহ ডিগবৈ বন সংমণ্ডলৰ অধীনৰ তথা মাৰ্ঘেৰিটা মহকুমাৰ জাগুন আঞ্চলিক বন বিষয়া কাৰ্যালয়ৰ অন্তৰ্গত টিংকুপানী সংৰক্ষিত বনাঞ্চলখনৰ প্ৰায় ২ হেক্টৰ বনভূমিৰ গছ বন কাটি বেদখল কৰি পলিথিন ট্ৰিপালেৰে অস্থায়ী ঘৰ সাজি আশ্ৰয়ৰ প্ৰচেষ্টা চলায়৷ লগতে অস্থায়ী শিবিৰ নামেৰে এখন বেনাৰো আঁৰি লয়।
ইফালে বনাঞ্চলত দধিয়াবাসীৰ বেদখলৰ খবৰ লাভ কৰি পুৱা ৯ বজাত মাৰ্ঘেৰিটা মহকুমা মহকুমাধিপতি, মহকুমা আৰক্ষী বিষয়া, ডিগবৈ বন সংমণ্ডলৰ ডি এফ অ’, জাগুন আঞ্চলিক বন বিষয়া পদুম বৰপাত্ৰ গোঁহাইকে ধৰি বিষয়া সকল ঘটনাস্থলীত উপস্থিত হৈ ৰাইজক বনাঞ্চল এৰি যাবলৈ আহ্বান জনাই যদিও ৰাইজে বনাঞ্চল ত্যাগ নকৰাৰ সিদ্ধান্তত অটল হৈ থাকে।
পিছত সন্ধিয়া প্ৰায় ৬ বজাত দুৰ্ভগীয়া ৰাইজৰ ওপৰত জঁপিয়াই পৰে আৰক্ষী, চি আৰ পি এফ, বন বিভাগৰ কৰ্মী। আৰক্ষী চি আৰ পি এফ, বন কৰ্মী বাহিনীৰ নিৰ্বিচাৰ লাঠীচালনাত আহত হয় শতাধিক পুৰুষ-মহিলা৷ চি আৰ পি এফ বাহিনীয়ে আনকি মহিলাকো প্ৰহাৰ কৰি বৰ্বৰতা প্ৰদৰ্শন কৰাৰ লগতে শৰীৰৰ কাপোৰ পৰ্যন্ত ফলাৰ অভিযোগ উঠিছে৷
আনহাতে এই ঘটনাৰ খবৰ পায় ঘটনাস্থলীলৈ যোৱা টি এম পি কেৰ কৰ্মী গংগী দলেও লাঠীচালনাত গুৰুতৰভাৱে আহত হৈ সম্প্ৰতি তিনিচুকীয়া অসামৰিক চিকিৎসালয়ত চিকিৎসাধীন হৈ আছে৷ এনে সময়তে উত্তেজিত ৰাইজে আৰক্ষী, চি আৰ পি এফ, বন কৰ্মী ওপৰত শিলগুটি, ইটাৰে আক্ৰমণ কৰাত কেইবাজনো জোৱান সামন্য পৰিমাণে আহত হয়৷
