ডিব্ৰুগড় জিলা প্ৰশাসনে বানপানীত বিস্থাপিত হোৱা দধিয়া বন গাঁৱৰ লোকসকলৰ পুনৰ সংস্থাপনৰ বাবে আজি চাবুৱাৰ দধিয়া এম ই স্কুলত এখন সভা অনুষ্ঠিত কৰে।
ডিব্ৰু-ছৈখোৱা ৰাষ্ট্ৰীয় উদ্যানত বাস কৰি অহা ১২০৬ টা পৰিয়ালক ধেমাজিৰ জোনাইলৈ স্থানান্তৰিত হোৱাৰ বাবে প্ৰশাসনে কৰা অনুৰোধ লোকসকলে প্ৰত্যাখ্যান কৰা বুলি উল্লেখ কৰি উপায়ুক্তগৰাকীয়ে কয় যে, ‘আমি তেওঁলোকক ধেমাজিলৈ যাবলৈ জোৰ কৰিব নোৱাৰো। আমি ইয়ালৈ তেওঁলোকৰ মতামত লবলৈ আহিছিলো। কিন্তু মানুহবিলাকে তিনিচুকীয়া জিলাৰ বিভিন্ন স্থানলৈ স্থানান্তৰিত হোৱাৰ সিদ্ধান্ত লৈছে।’
আজি এই সন্দৰ্ভত এন ই নাওৰ সৈতে হোৱা কথা-বতৰাত উপায়ুক্তগৰাকীয়ে কয় যে, ‘এই লোকসকল ডিব্ৰু-ছৈখোৱা ৰাষ্ট্ৰীয় উদ্যানত বাস কৰি আছে। আমি তেওঁলোকক অন্য স্থানলৈ স্থানান্তৰিত হ’বলৈ অনুৰোধ কৰিছিলো কাৰণ তেওঁলোকে উদ্যানখনৰ প্ৰধান অংশটোত বাস কৰি আহিছে- যিটো অনুমতিসাধ্য নহয়।’
সভাখনত উপস্থিত ৰাইজে উপায়ুক্তগৰাকীৰ হাতত মুখ্যমন্ত্ৰীলৈ বুলি এখন স্মাৰকপত্ৰও প্ৰদান কৰে।
উল্লেখযোগ্য যে অসমৰ মুখ্যমন্ত্ৰী সৰ্বানন্দ সোনোৱালে দধিয়াৰ বানবিধ্বস্ত লোকসকলৰ পুনৰ সংস্থাপন সন্দৰ্ভত এখন আলোচনা সভা পতাৰ বাবে ডিব্ৰুগড়ৰ জিলা উপায়ুক্ত লায়া মাদুৰিক নিৰ্দেশ দিছিল।
আজিৰ আলোচনা সভাখনত উপায়ুক্তগৰাকীৰ লগত আৰক্ষী অধীক্ষক গৌতম বৰাৰ উপৰি অনান্য বিভাগৰ মুৰব্বীসকলো উপস্থিত আছিল।
