১২ নং যোৰহাট লোকসভা সমষ্টি উজনি অসমৰ ব্ৰহ্মপুত্ৰৰ দক্ষিণ পাৰৰ এটা অসংৰক্ষিত সমষ্টি। ভোটাৰৰ সংখ্যাৰ দিশৰ পৰা অসমৰ ১৪টা সমষ্টিৰ ভিতৰত এই সমষ্টিটো দ্বাদশ স্থানত আছে।
- মুঠ ভোটাৰৰ সংখ্যা ১৩,৪৩,৮৭২জন
- পুৰুষ ভোটাৰ : ৬,৮২,৩৪৮জন
- মহিলা ভোটাৰ : ৬,৬১,৫১৭গৰাকী
- তৃতীয় লিংগৰ ভোটাৰ: ৭গৰাকী
মুঠ ভোটকেন্দ্ৰ আছে ২১৭৪টা
১৯৫১ চনৰ প্ৰথমটো সাধাৰণ নিৰ্বাচনত কংগ্ৰেছৰ দেৱেশ্বৰ শৰ্মা সমষ্টিটোৰ প্ৰথমজন সাংসদ হিচাপে নিৰ্বাচিত হৈছিল।
সমষ্টিটো বৰ্তমান বিজেপিৰ দখলত আছে। সাংসদ কামাখ্যা প্ৰসাদ তাছা। তাছা ২০১৪ চনত প্ৰথমবাৰৰ বাবে সাংসদ হিচাপে নিৰ্বাচিত হৈছে।
যোৰহাট সমষ্টিত বিধানসভাৰ ১০টা সমষ্টি অন্তৰ্গত। সেইকেইটা ক্ৰমে-
১। যোৰহাট (বিজেপিৰ দখলত, বিধায়ক হিতেন গোস্বামী)
২। তিতাবৰ (কংগ্ৰেছৰ দখলত, বিধায়ক তৰুণ গগৈ)
৩। মৰিয়নি (কংগ্ৰেছৰ দখলত, বিধায়ক ৰূপজ্যোতি কুৰ্মী)
৪। টীয়ক (অগপৰ দখলত, বিধায়ক ৰেণুপমা ৰাজখোৱা)
৫। আমগুৰি (অগপৰ দখলত, বিধায়ক প্ৰদীপ হাজৰিকা)
৬। নাজিৰা (কংগ্ৰেছৰ দখলত, বিধায়ক দেৱব্ৰত শইকীয়া)
৭। মাহমৰা (বিজেপিৰ দখলত, বিধায়ক যোগেন মহন)
৮। সোণাৰি (বিজেপিৰ দখলত, বিধায়ক তপন কুমাৰ গগৈ)
৯। শিৱসাগৰ (কংগ্ৰেছৰ দখলত, বিধায়ক প্ৰণৱ গগৈ)
১০। থাওৰা (বিজেপিৰ দখলত, বিধায়ক কুশল দুৱৰী)
১৯৮৪ আৰু ২০১৪ চনৰ নিৰ্বাচনৰ বাদে আটাইকেইটা নিৰ্বাচনত সমষ্টিটো কংগ্ৰেছৰ দখলত আছিল।
১৯৮৪ চনৰ সাধাৰণ নিৰ্বাচনত সমষ্টিটোৰ পৰা পৰাগ চলিহা অগপ দলৰ পৰা নিৰ্বাচিত হৈছিল। ১৯৯১ চনত তেওঁৰ পৰা কংগ্ৰেছৰ বিজয়কৃষ্ণ সন্দিকৈয়ে সমষ্টিটো দখল কৰে। তাৰ পিছতো সন্দিকৈ একেৰাহে আন পাঁচবাৰ দখল কৰে। কিন্তু ২০১৪ চনত সমষ্টিটো বিজেপিৰ দখললৈ যায়। কামাখ্যা প্ৰসাদ তাছা জয়ী হয় সন্দিকৈক হৰুৱাই। তাছাই ৪,৫৬,৪২০টা ভোট পায় আৰু দ্বিতীয় স্থানত থকা সন্দিকৈক প্ৰায় ১ লাখ ভোটত পিছত ৰাখে।
২০১৯ চনৰ দেশৰ সপ্তদশ লোকসভা নিৰ্বাচনৰ প্ৰথম পৰ্য্যায়ত সমষ্টিটোত ভোটগ্ৰহণ সম্পন্ন হ’ব। প্ৰথম পৰ্য্যায়ৰ ভোটগ্ৰহণ অহা ১১ এপ্ৰিলত।
নিৰ্বাচনৰ বাবে সমষ্টিটোত মুঠ ৮জন প্ৰাৰ্থীৰ মনোনয়ন বৈধ বিবেচিত হৈছে (নিৰ্বাচন আয়োগৰ ৱেবছাইটৰ তথ্য)। তেওঁলোক হ’ল ক্ৰমে- চি পি আইৰ কনক গগৈ, কংগ্ৰেছৰ সুশান্ত বৰগোহাঁই, বিজেপিৰ তপন গগৈ, এন পি পি কমলা ৰাজকোঁৱৰ, তৃণমূল কংগ্ৰেছৰ ৰিবুলয়া গগৈ, অল ইণ্ডিয়া ফ’ৰৱাৰ্ড ব্লকৰ ৰাজকুমাৰ দুৱৰা, নিৰ্দলীয় অৰবিন্দ কুমাৰ বৰুৱা আৰু নিৰ্দলীয় নন্দিতা নাগ।
