আসন্ন লোকসভা নিৰ্বাচনৰ দিন চমু চাপি অহাৰ সময়তে বৰ্তমানৰ সাংসদসকলৰ প্ৰদৰ্শন সম্পৰ্কীয় বাতৰিয়ে শিৰোণাম দখল কৰিছে।
তথ্য অনুসৰি, ডিব্ৰুগড়ৰ বৰ্তমানৰ বিজেপি সাংসদ তথা আগন্তুক লোকসভা নিৰ্বাচনৰো ডিব্ৰুগড় সমষ্টিৰ বিজেপি প্ৰাৰ্থী ৰামেশ্বৰ তেলীয়ে সংসদীয় সমষ্টিটেৰ উন্নয়নৰ বাবে নিৰ্দ্ধাৰিত তেওঁৰ সাংসদ পুঁজিৰ ধন ব্যয় কৰাত ব্যৰ্থ হৈছে।
জানিব পৰা মতে, পাঁচ বছৰত সমষ্টি উন্নয়নৰ বাবে এগৰাকী সাংসদে ২৫কোটি টকা লাভ কৰে যদিও তেলীৰ সাংসদ পুঁজিৰ ১২.৫০ কোটি টকা ব্যৱহাৰ নোহোৱাৰ বাবে উভতি যায়।
‘’সাংসদ ৰামেশ্বৰ তেলীয়ে পুঁজি ব্যৱহাৰ কৰিব নোৱাৰিলে আৰু ব্যৱহাৰ কৰিব নোৱাৰাৰ বাবে সেই পুঁজি ঘুৰি গ’ল তেওঁ ডিব্ৰুগড় সমষ্টিৰ উন্নয়নৰ বাবে একো নকৰিলে,’’-ডিব্ৰুগড়ৰ এগৰাকী জ্যেষ্ঠ কংগ্ৰেছী নেতাই এইদৰে অভিযোগ কৰে।
২০১৪ চনৰ লোকসভা নিৰ্বাচনত ৰামেশ্বৰ তেলীয়ে কংগ্ৰেছৰ জ্যেষ্ঠ নেতা তথা প্ৰাক্তন কেন্দ্ৰীয় ডনাৰ মন্ত্ৰী পবন সিং ঘাটোৱাৰক ১,৮৫,৩৪৭ টা ভোটৰ ব্যৱধানত পৰাজিত কৰিছিল।
বিজেপিৰ দলীয় সূত্ৰ অনুসৰি, বিজেপিৰ কৰ্মীসকল ৰামেশ্বৰ তেলীক লৈ অসন্তুষ্ট কিয়নো তেওঁ দলীয় কাৰ্যালয়ৰ দৈনন্দিন খৰচৰ বাবেও ধন ব্যয় নকৰে। এইবাৰ দলীয় কৰ্মীসকলৰ মাজত উৎসাহ-উদ্দীপনা হ্ৰাস পাইছে।
যোৱা শনিবাৰে মৰাণত প্ৰধান মন্ত্ৰী নৰেন্দ্ৰ মোডীৰ নিৰ্বাচনী সভাত বিশাল জনসমাগম দেখা গৈছিল।
প্ৰধান মন্ত্ৰী নৰেন্দ্ৰ মোডীয়ে ডিব্ৰুগড়ৰ বৰ্তমানৰ বিজেপি সাংসদ ৰামেশ্বৰ তেলী আৰু যোৰহাট সমষ্টিৰ প্ৰাৰ্থী তপন কুমাৰ গগৈৰ নিৰ্বাচনী প্ৰচাৰ সভাত অংশ লৈছিল।
ডিব্ৰুগড়ত নিৰ্বাচনত চাহ জনজাতি সম্প্ৰদায়ে এক গুৰুত্বপূৰ্ণ ভূমিকা পালন কৰে কিয়নো ডিব্ৰুগড় লোকসভা সমষ্টিত চাহ জনজাতি সম্প্ৰদায়ৰ চাৰি লাখ লোক আছে। ইয়াৰ পূৰ্বে ডিব্ৰুগড় কংগ্ৰেছৰ দুৰ্গ হিচাপে পৰিচিত আছিল। কিন্তু ২০১৪ত বিজেপিয়ে প্ৰসিদ্ধ কংগ্ৰেছী নেতা পবন সিং ঘাটোৱাৰক উৎখাত কৰি চাহ জনগোষ্ঠীৰ মাজত ভেটি গঢ়িবলৈ সক্ষম হৈছিল।
‘’২০১৪ চনৰ লোকসভা নিৰ্বাচনত বিজেপি ক্ষমতালৈ আহিলে চাহ বাগানৰ শ্ৰমিকৰ মজুৰি ৩৫০ টকালৈ বৃদ্ধি কৰাৰ প্ৰতিশ্ৰুতি দিছিল যদিও এতিয়ালৈকে বিজেপিয়ে শ্ৰমিকৰ মজুৰি বৃদ্ধিৰ প্ৰসংগত একো নকৰিলে,’’-মাইজান চাহ বাগিচাৰ এজন শ্ৰমিক কমল তাঁতীয়ে কয়।
তাঁতীয়ে কয়,’’ প্ৰাক্তন কেন্দ্ৰীয় মন্ত্ৰী পবন সিং ঘাটোৱাৰ ডিব্ৰুগড় লোকসভা সমষ্টিৰ পৰা পাঁচবাৰকৈ সাংসদ নিৰ্বাচিত হৈছিল যদিও তেওঁ চাহ সম্প্ৰদায়ৰ বাবে একো নকৰিলে। কোনোৱে আমাৰ বাবে নাভাৱে কিয়নো স্বাধীনতাৰ ইমান বছৰ পাছতো আনকি আমাৰ সম্প্ৰদায়টো পিছ পৰিয়েই থকিল।‘’
ডিব্ৰুগড় লোকসভা সমষ্টিত আঠগৰাকী প্ৰাৰ্থীয়ে মনোনয়ন দাখিল কৰিছে যদিও নিৰ্বাচনী যুঁজখন বিজেপি আৰু কংগ্ৰেছৰ মাজতে সীমাবদ্ধ থাকিব।
বকেল চাহ বাগিচাৰ এগৰাকী ৫১ বছৰীয়া বিধৱা নিমা ৰবি দাসে কয়,’’ আমি উন্নয়নৰ পক্ষে ভোট দিম। আমি সেই দলকে ভোট দিম যিয়ে আমাৰ বাবে কাম কৰে। স্বাধীনতাৰ আগৰে পৰা আমাৰ পূৰ্বপুৰুষ ইয়াত বাস কৰিছিল কিন্তু উন্নয়নে এতিয়াও চুব পৰা নাই।‘’
