অসমত নিৰ্বাচনত উজনি অসমৰ প্ৰায়বোৰ অঞ্চলতে চাহ জনগোষ্ঠীৰ লোকসকলে এক নিৰ্ণায়ক ভূমিকা পালন কৰে। কিন্তু জনগোষ্ঠীটোৰ শৈক্ষিক, সামাজিক আৰু অৰ্থনৈতিক উন্নয়ণৰ ক্ষেত্ৰত চৰকাৰে কিমান গুৰুত্ব দিছে সেই লৈ বিভিন্ন সময়ত প্ৰশ্ন উত্থাপিত হয়।
চাহ জনগোষ্ঠীৰ লোকৰ বসতিপ্ৰধান অঞ্চল বিশেষকৈ চাহ বাগিচাসমূহত শিক্ষা ব্যৱস্থা অতি পিচপৰি থকাৰ কথাটো উল্লখনীয়। কিন্তু এইক্ষেত্ৰত চৰকাৰে কি ব্যৱস্থা হাতত লৈছে সেয়া লক্ষণীয়।
অসম চৰকাৰে যোৱা বছৰ অসমৰ বাগিচাসমূহৰ বাবে ১০০খন উচ্চ মাধ্যমিক বিদ্যালয় স্থাপন কৰাৰ কথা মুখ্য মন্ত্ৰী সৰ্বানন্দ সোণোৱালে ঘোষণা কৰিছিল। কিন্তু এটা বিত্তীয় বৰ্ষ শেষ হোৱাৰ পাছতো এই পৰ্যন্ত এখনো উচ্চ মাধ্যমিক বিদ্যালয় ৰাজ্যৰ কোনো চাহ বাগিচাত স্থাপন নহ’ল।
বিগত বছৰৰ ২৯ জুনত মুখ্য মন্ত্ৰী সৰ্বানন্দ সোণোৱালে জনতা ভৱনত এখন বৈঠকত এই ঘোষণা কৰিছিল। তেওঁ শিক্ষা বিভাগক এই কাম খৰতকীয়াভাৱে আগবঢ়াবলৈও নিৰ্দেশ দিছিল। চাহ বাগিচাৰ বিদ্যালয়সমূহত প্ৰয়োজনীয় আন্তঃগাঁথনিৰ অভাৱত ছাত্ৰ-ছাত্ৰীসকল উপযুক্ত শিক্ষাৰ পৰা বঞ্চিত হৈ আহিছে বুলি উল্লেখ কৰি নতুনকৈ স্থাপন কৰিবলগীয়া বিদ্যালয়সমূহক ‘আদৰ্শ শিক্ষানুষ্ঠান’ হিচাপে গঢ় দিবলৈ বিভাগটোক নিৰ্দেশ দিছিল।
কিন্তু এতিয়ালৈকে এখনো বিদ্যালয় স্থাপন নোহোৱাত বিষয়টোক লৈ চৰকাৰৰ বিৰুদ্ধে সৰৱ হৈছে বিৰোধী কংগ্ৰেছ। মঙলবাৰে গুৱাহাটীৰ ৰাজীৱ ভৱনত এখন সংবাদমেল সম্বোধন কৰি প্ৰদেশ কংগ্ৰছৰ উপ সভাপতি ভগীৰথ কৰণে এখন সংবাদমেল সম্বোধন কৰি কয়, ‘বিজেপি চৰকাৰৰ দিনত ৰাজ্যৰ চাহ বাগিচাৰ শিক্ষা ব্যৱস্থাই বিধ্বস্ত ৰূপ লৈছে। সৰ্বানন্দ সোণোৱাল চৰকাৰে বিদ্যালয় স্থাপন কৰা হ’ব বুলি ঢাক-ঢোল বজাই আছে যদিও প্ৰচাৰৰ বাহিৰে বাস্তৱত বাগিচাৰ শিক্ষাৰ ক্ষেত্ৰত কোনো পৰিৱৰ্তন নাহিল’।
ভগীৰথ কৰণে ভাৰত চৰকাৰৰ মানৱ সম্পদ উন্নয়ন বিভাগৰ তথ্যৰ উদ্ধৃতি দি ৰাজ্যৰ চাহ বাগিচা আৰু প্ৰাক্তন চাহ শ্ৰমিক বসতিপ্ৰধান অঞ্চলত মুঠ ১৯৮৩খন বিদ্যালয় আছে। ইয়াৰে মাত্ৰ ১০খন মধ্য ইংৰাজী আৰু মাত্ৰ দুখন উচ্চ মাধ্যমিক বিদ্যালয়।
একেটা তথ্যতে প্ৰকাশ পোৱা মতে ৰাজ্যৰ বাগিচাত কোম্পানিৰদ্বাৰা পৰিচালিত ৩৩খন বিদ্যালয় আৰু ১১৯খন অ-প্ৰাদেশিকৃত বিদ্যালয়ত এজন শিক্ষকেই পাঠদান কৰিব লাগে বুলিও ভগীৰথ কৰণে প্ৰকাশ কৰে। তেওঁ লগতে কয় যে চাহ বাগিচাৰ ৭০ শতাংশ শিশুৱেই বিদ্যালয়লৈ যায় যদিও প্ৰায় ৫০ শতাংশই আধাতেই পঢ়িবলৈ এৰে।
ইপিনে, সদৌ অসম চাহ জনজাতি ছাত্ৰ সন্থাৰ সাধাৰণ সম্পাদক পৱন বেদিয়ায়ো চাহ জনগোষ্ঠীৰ লোকৰ বসতিপ্ৰধান অঞ্চলসমূহত শিক্ষাৰ কোনো পৰিৱৰ্তন হোৱা নাই বুলি আক্ষেপ প্ৰকাশ কৰে। তেওঁ কয় যে চৰকাৰে উচ্চ মাধ্যমিক বিদ্যালয় স্থাপনৰ ঘোষণা কেৱল ঘোষণাই হৈ আছে।
অৱশ্যে বেদিয়াই লগতে কয় যে এই অঞ্চলসমূহত প্ৰাথমিক শিক্ষাৰ মানহে উন্নত কৰাৰ যথেষ্ট প্ৰয়োজন আছে। প্ৰাথমিক স্তৰৰ শিক্ষানুষ্ঠানসমূহত আন্তঃগাঁথনিৰ অভাৱ দূৰ কৰাৰ ক্ষেত্ৰতো চৰকাৰৰ ভূমিকা সন্তোষজনক নহয় বুলিও তেওঁ মন্তব্য কৰে।
