কংগ্ৰেছৰ অধ্যক্ষ তথা বিৰোধী দলপতি ৰাহুল গান্ধী আজি নিৰ্বাচনী প্ৰচাৰত অংশগ্ৰহণ কৰাৰ উদ্দেশ্যে অসমলৈ আহিব। প্ৰদেশ কংগ্ৰছৰ সূত্ৰই জনোৱামতে, গান্ধীয়ে অসমত মুঠ পাঁচটা লোকসভা সমষ্টিৰ বাবে কেইবাখনো নিৰ্বাচনী সভাত ভাগ ল’ব। গান্ধীয়ে ডিব্ৰুগড়, কলিয়াবৰ, লখিমপুৰ, কৰিমগঞ্জ আৰু শিলচৰত দলীয় প্ৰাৰ্থীসকলৰ বাবে প্ৰচাৰ চলোৱাৰ কথা।
কংগ্ৰেছৰ অধ্যক্ষজনৰ এই ভ্ৰমণত অসমৰ লগতে নাগালেণ্ডো অন্তৰ্ভুক্ত আছে। আজি অসমত উপস্থিত হৈয়ে প্ৰথমে তেওঁ ডিমাপুৰলৈ যাব আৰু তাত ১০:৪৫ বজাত হ’ব লগীয়া নিৰ্বাচনী সভাত নাগালেণ্ডৰ একমাত্ৰ সমষ্টিটোৰ দলীয় প্ৰাৰ্থী কে এল চিচিৰ হৈ প্ৰচাৰ চলাব।
ইয়াৰ পিছতে অসমৰ বোকাখাতলৈ আহি দুপৰীয়া কলিয়াবৰৰ প্ৰাৰ্থী গৌৰৱ গগৈৰ হৈ প্ৰচাৰ চলাবলৈ বোকাখাত স্প’ৰ্টছ কমপ্লেক্স গ্ৰাউণ্ডত নিৰ্বাচনী সভাত অংশ ল’ব।
গান্ধী তাৰ পৰা লখিমপুৰলৈ উৰা মাৰিব আৰু তাত চৰকাৰী উচ্চতৰ মাধ্যমিক বিদ্যালয়ৰ খেলপথাৰত লখিমপুৰ সমষ্টিৰ প্ৰাৰ্থী অনিল গোহাঁইৰ হৈ নিৰ্বাচনী প্ৰচাৰ চলাব।
লখিমপুৰৰ সভাৰ পিছতে পিছবেলা তেওঁ ডিব্ৰুগড়লৈ যাব আৰু তাতো এখন নিৰ্বাচনী প্ৰচাৰ সভাত অংশ ল’ব। ডিব্ৰুগড়ৰ পৰা শ্বিলঙলৈ গৈ তাতে ৰাতিটো কটাই পিছদিনা আকৌ অসমলৈ ঘূৰি আহিব।
দিল্লীলৈ ঘূৰি যোৱাৰ পূৰ্বে বৃহস্পতিবাৰে কংগ্ৰেছৰ অধ্যক্ষজন বৰাক উপত্যকাৰ কৰিমগঞ্জ আৰু শিলচৰ সমষ্টিৰ প্ৰাৰ্থীকেইজনৰ বাবে প্ৰচাৰ চলাবলৈ ক্ৰমে কৰিমগঞ্জ আৰু শিলচৰত নিৰ্বাচনী সভাত ভাগ ল’ব বুলি জানিবলৈ দিয়ে সূত্ৰটোৱে।
উল্লেখযোগ্য যে প্ৰধান মন্ত্ৰী মোদীও নিৰ্বাচনী প্ৰচাৰ চলোৱাৰ উদ্দেশ্যে আজি যোৱা নিশাই অসমত উপস্থিত হৈছেহি আৰু তেওঁ আজি ডিব্ৰুগড়ৰ পৰা অৰুণাচললৈ নিৰ্বাচনী প্ৰচাৰ চলাবলৈ যাব। এটা সপ্তাহৰ ভিতৰত অৰুণাচললৈ মোদীৰ এয়া দ্বিতীয়টো ভ্ৰমণ।
আনহাতে কংগ্ৰেছৰ সাধাৰণ সম্পাদিকা প্ৰিয়ংকা গান্ধীও অসমলৈ নিৰ্বাচনী প্ৰচাৰ চলাবলৈ অলপতে অহাৰ কথা।
