বৃহস্পতিবাৰে দেশত অনুষ্ঠিত হোৱা সপ্তদশ লোকসভা নিৰ্বাচনৰ প্ৰথম পৰ্য্যায়ৰ ভোটগ্ৰহণ হৈছিল ২০ খন ৰাজ্যৰ ৯১ টা সমষ্টিত। আটাইকেইখন ৰাজ্যত ভোটদানৰ হাৰলৈ লক্ষ্য কৰিলে দেখা যায় যে দেশৰ আন অংশৰ ৰাজ্যৰ তুলনাত অভিলেখ সংখ্যক ভোটদান সম্পন্ন হয় উত্তৰ-পূবৰ ৮ ৰাজ্যত।
উত্তৰ-পূবৰ আঠোখন ৰাজ্যৰ ভিতৰত ত্ৰিপুৰাত দেশৰ প্ৰথম পৰ্য্যায়ৰ ৯১ খন আসনৰ ভিতৰতে অভিলেখ সংখ্যক ৮১.৮০ শতাংশ ভোটদান সম্পন্ন হয়। ত্ৰিপুৰাত প্ৰথম পৰ্য্যায়ত কেৱল এখন লোকসভা আসনৰ বাবে ভোটদান সম্পন্ন হৈছিল।
ত্ৰিপুৰাৰ পাছতে স্থান অসমৰ। অসমত ৭৮.২৩ শতাংশ লোকে ভোটাধিকাৰ সাব্যস্ত কৰে। ৰাজ্যখনৰ ৫ খন আসনৰ বাবে প্ৰথম পৰ্য্যায়ৰ ভোটগ্ৰহণ অনুষ্ঠিত হৈছিল।
অসমৰ পাছতেই স্থান লাভ কৰা মণিপুৰত ৭৮.২০ শতাংশ লোকে ভোটদান সাব্যস্ত কৰে। মণিপুৰতো এখন আসনৰ বাবে প্ৰথম পৰ্য্যায়ৰ ভোটগ্ৰহণ অনুষ্ঠিত হৈছিল। ৰাজ্যখনৰ মুঠ ১৫৬২ টা ভোটগ্ৰহণ কেন্দ্ৰত ভোটাৰ সকলে শান্তিপুৰ্ণভাৱে ভোটদান কৰে।
তদুপৰি, ছিকিমত ৬৯, মিজোৰামত ৬০, নাগালেণ্ডত ৭৮, মেঘালয়ত ৬৭.১৬ আৰু অৰুণাচল প্ৰদেশত ৬৬ শতাংশ ভোটাৰে ভোটদান কৰিছে।
মন কৰিবলগীয়া যে, দেশৰ অন্য ৰাজ্যসমূহৰ তুলনাত উত্তৰ পূবৰ ৰাজ্যকেইখনৰ ভোটৰ হাৰ সৰ্বাধিক। বিহাৰত দেশৰ ভিতৰতে ভোটৰ হাৰ কম। বিহাৰত ভোটৰ হাৰ মাত্ৰ ৫০ শতাংশ। পশ্চিমবংগত ৮১ শতাংশ ভোটৰ হাৰ যদিও উত্তৰ প্ৰদেশত ৬৩.৬৯, উত্তৰাখণ্ডত ৫৭.৮৫ শতাংশ। লগতে জম্মু কাশ্মীৰত ৫৪.৪৯, ছত্তিশগড়ত ৫৬ শতাংশ আৰু অন্ধ্ৰপ্ৰদেশত ৬৬ শতাংশ।
যিসময়ত উত্তৰ-পূৰ্বাঞ্চল দেশৰ অন্য প্ৰান্তৰ বাবে এতিয়াও অস্পৃশ্য, তেনে সময়তে অঞ্চলটোৰ বাসিন্দাসকলে সৰ্বোত্তম গণতান্ত্ৰিক ব্যৱস্থাটোৰ প্ৰতি ব্যাপক সঁহাৰি প্ৰদৰ্শন কৰি এক উদাহৰণ দাঙি ধৰিলে।
তদুপৰি, সততে ভাৰতীয় মূল সুঁতিৰ পৰা আঁতৰি থকা বুলি অভিযোগ উত্থাপিত হৈ অহাৰ পাছতো ‘নিৰ্বাচনৰ ভোটদান প্ৰক্ৰিয়াটোত ব্যাপক মাত্ৰাত ভোট দান কৰি সচেতনতাৰ পৰিচয় দাঙি ধৰিছে।
