লোকসভা নিৰ্বাচনৰ দ্বিতীয় পৰ্যায়ৰ ভোটগ্ৰহণ চলি থকা স্বায়ত্তশাসিত জিলা সমষ্টিৰ অন্তৰ্গত ডিমা হাচাওৰ কেইবাটাও কেন্দ্ৰত আজি ই ভি এম বিকল হোৱাত পলমকৈ আৰম্ভ হৈছে ভোটদান প্ৰক্ৰিয়া।
বিশেষকৈ হাফলঙৰ হাগজেৰ নগৰৰ ১৬৫নং এল পি স্কুল ভোটকেন্দ্ৰত ১ ঘন্টা ১৫ মিনিট পলমকৈ ভোটদান প্ৰক্ৰিয়া আৰম্ভ হৈছে। ইপিনে ই ভি এম বিকল হোৱা কাৰণে ল’ৱাৰ মৌলহৈ এল পি স্কুলতো পলমকৈ আৰম্ভ হৈছে ভোটগ্ৰহণ পৰ্ব। একেই অৱস্থা মাইবাং এইচ এছ স্কুল আৰু মাইবাং নামঘৰ সংলগ্ন কীৰ্তিপুৰ এল পি স্কুলৰ ভোটকেন্দ্ৰত।
আনহাতে মাইবাং মহকুমাৰ ৩নং মান্দাৰদিচা এল পি স্কুলতো ই ভি এমৰ গণ্ডগোলৰ বাবে বাতৰি লিখা পৰলৈকে ভোটদান প্ৰক্ৰিয়া আৰম্ভ হোৱা নাই। বিকল হোৱা ই ভি এম বদলি কৰাৰ পিছতহে ভোটগ্ৰহণ আৰম্ভ হ’ব।
ইফালে উগ্ৰপন্থী সংগঠন ডিমাচা নেশ্যনেল লিবাৰেশ্যন আৰ্মিয়ে আহ্বান জনোৱা ৩৬ ঘন্টীয়া ডিমা হাচাও আৰু কাৰ্বি আংলং জিলা বন্ধৰ প্ৰভাৱ হাফলংত পৰিলক্ষিত হৈছে। যাৰ ফলত পুৱা ৯ বজালৈকে লৈকে ভোটকেন্দ্ৰ সমূহত ভোটাৰৰ সেৰেঙা লাইন দেখিবলৈ পোৱা গৈছে।
