অৰুণাচল প্ৰদেশৰ লংদিঙত দুজনকৈ এনপিপি সমৰ্থকক নাগা বিদ্ৰোহী সংগঠন “এন এছ চি এন-কে”ই অপহৰণ কৰাৰ অভিযোগ উঠিছে।
নিৰ্বাচনী বৈতৰণী পাৰ হ’বলৈ শাসকীয় বিজেপিৰ একাংশ প্ৰাৰ্থীয়ে নাগা বিদ্ৰোহী সংগঠনটোৰ সৈতে গোপন বুজাবুজি কৰি প্ৰতিদ্বন্দ্বী প্ৰাৰ্থীৰ সমৰ্থকক হাৰাশাস্তি কৰাত নামি পৰিছে৷ এই অভিযোগ অৰুণাচল প্ৰদেশৰ লংডিং জিলাৰ লংডিং পুমাও বিধান সভা সমষ্টিৰ এন পি পি দলৰ প্ৰাৰ্থী থাংৱাম বাংহামৰ।
প্ৰাৰ্থীগৰাকীয়ে লংডিং থানাত দাখিল কৰা এজাহাৰত অভিযোগ কৰিছে– এন পি পিৰ দুই সমৰ্থক আপং ৱাংচু আৰু য়াটুন ৱাংচাক বুধবাৰে এন এছ চি এন (কে)ই অপহৰণ কৰি নিছে৷
ঘটনাটো সন্দৰ্ভত লংডিং আৰক্ষী থানাত ভাৰতীয় দণ্ডবিধিৰ ৩০৫ / ৫০৬ / ৩৪ ধাৰাত আৰু ডব্লিউ এছ ১০ / ১৩ ইউ এ পি আইনৰ অধীনত এটা গোচৰ ৰুজু হৈছে৷
এজাহাৰত তেওঁৰ প্ৰতিদ্বন্দ্বী বিজেপি দলৰ প্ৰাৰ্থীগৰাকীয়ে উগ্ৰপন্থীৰ সৈতে গোপন বুজাবুজি কৰি তেওঁৰ দলৰ কৰ্মীসকলক হাৰাশাস্তি কৰাৰ কথা উল্লেখ কৰি বিজেপি প্ৰাৰ্থী গৰাকীৰ বিৰুদ্ধে বিহিত ব্যৱস্থা গ্ৰহণৰ দাবী জনাইছে।
এজাহাৰখনত ৱাংহামে উল্লেখ কৰিছে যে লংডিং জিলাৰ লংখাউ ভিলে’জ এলেকাত ৩০গৰাকী এন এছ চি এন (কে)ৰ কেডাৰ আৰু ১০ গৰাকী এন এছ চি এন (আই এম)ৰ কেডাৰে বাহৰ পাতি বিজেপি দলৰ হৈ কাম কৰি আছে৷
ইপিনে বিজেপি-এন পি পি সমৰ্থকৰ মাজত সৃষ্ট বিবাদৰ বাবে ভোটগ্ৰহণ স্থগিত ৰখা সমষ্টিটোৰ লংখাউ ভোটকেন্দ্ৰত অনুষ্ঠিত হ’বলগীয়া পুনৰ ভোটগ্ৰহণত পৰ্যাপ্ত নিৰাপত্তাৰক্ষী নিয়োগ কৰাৰ দাবী জনাইছে ৱাংহামে৷
আনহাতে ৱাংচু ছাত্ৰ সন্থা আৰু সদৌ ৱাংচু মহিলা কল্যাণ সমাজ নামৰ আগশাৰীৰ সংগঠন দুটাই এন এছ চি এন (আই এম) নাগা আৰ্মীৰ ব্লু স্কাই অপাৰে’চনৰ কমাণ্ডাৰক লংখাউ ভিলে’জৰ পৰা তেওঁলোকৰ কেডাৰ উঠাই নিবলৈ আহ্বান জনাই পত্ৰ প্ৰেৰণ কৰিছে৷
লংখাউত অনুষ্ঠিত হ’ব লগা পুনৰ ভোটগ্ৰহণৰ দিনা কোনো অপ্ৰীতিকৰ ঘটনা সংঘটিত হ’লে ইয়াৰ বাবে এন এছ চি এনয়েই জগৰীয়া হ’ব বুলি সকীয়াই দিছে সংগঠন দুটাই।
