আজি দিচপুৰ প্ৰেছ ক্লাবত সাংবাদিকৰ সৈতে মত বিনিময় অনুষ্ঠানত ৭ নং গুৱাহাটী লেকসভা সমষ্টিৰ কংগ্ৰেছ প্ৰাৰ্থী ববিতা শৰ্মাই কয় যে নাগৰিকত্ব সংশোধনী বিধেয়কৰ বাবে সংকল্প লোৱা বাবেই বিজেপিক অসমীয়া মানুহে ভোট দিব নালাগে।
“CAB-ক লৈ বিজেপিয়ে যি ল’ৰা-ধেমালি কৰিছে, তাৰ উত্তৰ অসমীয়া মানুহে ২৩ এপ্ৰিলৰ দিনা দিব”, ববিতা শৰ্মাই কয়।
বিজেপিয়ে হিন্দু বাংলাদেশী আনিব বিচাৰিছে| এইখনৰ সৈতে অসমৰ ভাষা-কলা-সংস্কৃতিৰ কথা জড়িত হৈ আছে| তেওঁ কয়।
বিধেয়কখনক লৈ বিগত সময়ত অসমৰ লগতে উত্তৰ-পূব অস্থিৰ হোৱাৰ কথাও উল্লেখ কৰে প্ৰাৰ্থীগৰাকীয়ে। বিজেপিক প্ৰশ্ন কৰি তেওঁ কয়, “যিখন বিধেয়ক অসমৰ ৰাইজে বিচৰা নাই সেইখন কিয় জাপি দিব বিচাৰিছে?”
প্ৰাৰ্থীগৰাকীৰ নৰেন্দ্ৰ মোদীলৈ প্ৰশ্ন, “বাংলাদেশৰ নাগৰিকৰ বাবে ইমান কিয় তেওঁ চিন্তা কৰে। কিমান সমস্যা আছে, দুই কোটি চাকৰি ক’ত গ’ল? ১৫ লাখ টকা পালে জানো? নিজৰ দেশৰ নাগৰিকৰ উন্নয়নৰ কথা মোদীয়ে চিন্তা নকৰে কিয়? ”
আনহাতে প্ৰাৰ্থী হিচাপে গুৱাহাটী সমষ্টিটোৰ অন্তৰ্গত গোটেইকেইটা বিধানসভা সমষ্টিলৈ তেওঁ যাবলৈ চেষ্টা কৰিছে বুলি উল্লেখ কৰি কয়, “যোৱা ১০ বছৰ বিজেপিৰ সাংসদেই আছিল, কিমান কাম কৰিবলৈ বাকী আছে ৰাজ্যবাসীয়ে গম পাইছে| মই ভ্ৰমণ কৰা সমষ্টিসমূহ সমস্যাৰে জৰ্জৰিত|”
হাজোত শিমলু গছ বহুত আছে বুলি কৈ অঞ্চলটোত এটা কটন উদ্যোগৰ সম্ভাৱনা দাঙি ধৰে প্ৰাৰ্থীগৰাকীয়ে। এইটো কৰিব পাৰিলে নিবনুৱা যুৱক-যুৱতীক সংস্থাপন দিব পৰা যাব|
“যদি সাংসদ হিচাপে জয়ী হওঁ তেন্তে বানপানী আৰু গৰাখহনীয়াক ৰাষ্ট্ৰীয় সমস্যা হিচাপে স্বীকৃতি দিয়াবলৈ চেষ্টা কৰিম|” নিজৰ ভৱিষ্যত কাৰ্যপন্থাৰ ৰূপৰেখা দাঙি ধৰি শৰ্মাই কয়।
দাৰিদ্ৰ্য সীমাৰেখাৰ জনসাধাৰণে যাতে সেই অৱস্থানৰ পৰা ওপৰলৈ আহিব পাৰে তাৰ বাবে চেষ্টা কৰা, পৰ্য্যটন ক্ষেত্ৰৰ উন্নীতকৰণ, হাজো, বকো, ছয়গাওঁ ইত্যাদি অঞ্চলত সাংস্কৃতিক পৰ্যটন গঢ় দিয়াৰ ক্ষেত্ৰত গুৰুত্ব আৰোপ কৰা নিজৰ কাৰ্য্যপন্থা হিচাপে দাঙি ধৰে প্ৰাৰ্থীগৰাকী।
“খোৱা পানীৰ সমস্যাটো মহানগৰীত দীৰ্ঘদিনীয়া| কংগ্ৰেছ চৰকাৰৰ দিনত খোৱা পানী যোগান আঁচনিৰ কাম আৰম্ভ কৰিছিল যদিও চৰকাৰখন পুনৰ শাসনলৈ নহা বাবে এই কাম সম্পূৰ্ণ কৰিব নোৱাৰিলে|” সাংস্কৃতিক কৰ্মী হিচাপেও সুনাম থকা ববিতা শৰ্মাই কয়।
তেওঁ বিজেপি প্ৰাৰ্থী কুইন ওজাতকৈ বহু বেছি ভোট পাই জয়ী হোৱাৰ আশা প্ৰকাশ কৰে|
