ডকাইতিলৈ ওলাওঁতেই মঙলদৈ আৰক্ষীৰ হাতোৰাত বুধবাৰে নিশা বন্দী হৈছে এটা বৃহৎ গেং।
নিশা প্ৰায় ৩.৩০ বজাত এখন গাড়ীৰ সৈতে ডকাইতৰ দলটোৰ ৫জন সদস্যক আৰক্ষীয়ে আটক কৰিছে।
আৰক্ষীৰ মতে, গোপন সূত্ৰৰ আধাৰত যোৱা এটা পহৰাদাৰী দলে মঙলদৈৰ বিদ্যালয় উপ পৰিদৰ্শকৰ কাৰ্য্যালয়ৰ সন্মুখত পাৰ্কিং কৰি থোৱা অৱস্থাত বহুসংখ্যক লোক থকা এখন ছুইফট দিজায়াৰ গাড়ী দেখা পায় আৰু লগে লগে গাড়ীখনৰ তালাচী লয়।
তালাচীত গাড়ীখন (AS13G-7907)ৰ পৰা খুকুৰি, টৰ্চ লাইটকে ধৰি বিশেষভাৱে নিৰ্মিত বহুকেইডাল ৰদ আৰক্ষীয়ে জব্দ কৰে। ডকাইতৰ দলটো আন্ধাৰৰ সুযোগ লৈ পলোৱাৰ চেষ্টা কৰিছিল যদিও মঙলদৈ সদৰ থানাৰ নেতৃত্বত যোৱা আৰক্ষীৰ দলটোৱে খেদি গৈ দলটোৰ ৫জনক আটক কৰিবলৈ সক্ষম হয়।
চহৰখনত ডকাইতি কৰিবলৈ ওলোৱা বুলি প্ৰাথমিক জেৰাত ডকাইতকেইজনে প্ৰকাশ কৰিছে, আৰক্ষী সূত্ৰৰ দাবী।
ধৃত ডকাইতকেইজন— মঙলদৈ বাঘপুৰী গাঁৱৰ আকবৰ আলী (২৮), মঙলদৈ মোৱামাৰীৰ বিপুল দত্ত (২৮), ধূলা বালাবাৰীৰ হাচমত আলী (২৪), ওজাগাঁৱৰ চাদেক আলী (২৩) আৰু বেচিমাৰীৰ আব্বাছ আলী (৩৩) বুলি চিনাক্ত কৰা হৈছে। দলটোৰ লগত জৰিত বাকীসকলৰ সন্ধান উলিওৱাৰ বাবে আৰক্ষীয়ে জেৰা অব্যাহত ৰাখিছে।
দলটো পূৰ্বে কেইবাটাও ডকাইতিত জৰিত বুলি সন্দেহ কৰা হৈছে।
“ডকাইতি, ব্যৱসায়িক প্ৰতিষ্ঠান লুটকে ধৰি বহুকেইটা অপৰাধত কুখ্যাত গেংটো জৰিত বুলি সন্দেহ কৰা হৈছে। সত্য উদ্ধাৰৰ বাবে জেৰা চলাই থকা হৈছে,” নৰ্থ ইষ্ট নাওক জনায় দৰঙৰ আৰক্ষী অধীক্ষক অমৃত ভূঞাই।
