ক্ৰমাৎ সুস্থ হৈ উঠিছে অসমৰ জনপ্ৰিয় কন্ঠশিল্পী সুবাসনা দত্ত। ব’হাগৰ আৰম্ভণিতে দুৰ্ঘটনাত পতিত হৈ কেইবাখনো মঞ্চৰ অনুষ্ঠান বাতিল কৰিবলগীয়া হৈছিল যদিও অহা ৩০ মে’ৰ পৰা ১২ মে’ লৈকে একালেঠাৰিয়ে কেইবাখনো মঞ্চত দৰ্শক তথা অনুৰাগীসকলক আপ্লুত কৰিবলৈ সাজু হৈছে শিল্পীগৰাকী। দত্তৰ ব্যক্তিগত পৰিচালকে নৰ্থ ইষ্ট নাওক এই কথা জানিবলৈ দিয়ে।
উল্লেখ্য যে, যোৱা ১৯ এপ্ৰিলৰ দিনা পুৱতি নিশা বঙাইগাঁৱত সংগীতানুষ্ঠান সামৰি আহি থকা অৱস্থাতে ৰঙিয়াৰ উদীয়ানাত শিল্পীগৰাকীৰ ডাস্তাৰ বাহনখন দুৰ্ঘটনাত পতিত হয়। ফলত শিল্পী সুবাসনাৰ লগতে তেওঁৰ মেনেজাৰ শেখৰজ্যোতি বৈশ্য গুৰুতৰভাৱে আহত হয়।
মহানগৰীৰ এক্সেল কেয়াৰ হাস্পতালত চিকিৎসাধীন হ’বলগীয়া হোৱা বাবে শিল্পীগৰাকীয়ে ১৯ এপ্ৰিলৰ পৰা ২৯ এপ্ৰিললৈকে বহুকেইখন সংগীতানুষ্ঠান বাতিল কৰিবলগীয়া হয়। তাৰ বাবে সংশ্লিষ্ট উদ্যোক্তা আৰু তেওঁৰ অনুৰাগীসকলক নিৰাশ নহ’বলৈ অনুৰোধ জনাই ফেইচবুক পেইজৰ জৰিয়তে অনুৰোধ জনাইছিল দত্তই।
তদুপৰি, কালিৰে পৰা শিল্পীগৰাকীৰ পুনৰ বুকিং আৰম্ভ হৈছে বুলি তেওঁৰ মেনেজাৰে আমাক জনায়। সংগীতানুষ্ঠান নতুনকৈ বুকিং কৰিব বিচৰাসকলে 7002118771 অথবা 9613000350 নম্বৰত ফোন কৰিব পাৰে বুলিও তেওঁ আমাৰ আগত সদৰী কৰে।
ইপিনে, অহা ২৯ এপ্ৰিলৰ দিনা চিকিৎসকে দত্তক এক স্বাস্থ্য পৰীক্ষা কৰিব বুলিও মেনেজাৰে জানিব দিয়ে। অহা ৩০ এপ্ৰিলৰ পৰা ১২ এপ্ৰিললৈকে তেজপুৰ, মৰাণ, পাঠশালা, কাছবাৰী(বাইহাটা চাৰিআলি), জামগুৰিহাট ইত্যাদি ঠাইত সংগীতানুষ্ঠান আছে শিল্পীগৰাকীৰ।
আনহাতে, শিল্পীগৰাকী সুস্থ হৈ উঠা বুলি জনাত ব’হাগৰ বতৰত অনুৰাগী আৰু শ্ৰোতা দৰ্শকেও তেওঁৰ কন্ঠৰ গীত শুনিবৰ বাবে অধীৰ আগ্ৰহেৰে বাট চাই আছে। তাৰ সমান্তৰালকৈ শিল্পীগৰাকীয়েও ‘আপোনালোকৰ মৰম আৰু মিনতিৰ বাবেই মই ক্ৰমে সুস্থ হৈ উঠিছো৷’ বুলি ফেইচবুকযোগে সদৰী কৰিছে।
