নগাঁও কাগজ কলৰ কৰ্মচাৰী বিশ্বজিৎ মজুমদাৰৰ মৃত্যুৰ বাবে দায়ী ভাৰত চৰকাৰ। নিজৰ ঘৰৰ ফ্ৰিজৰ ওপৰত এনেদৰে আত্মহত্যাৰ কাৰণ লিখি যোৱা ২৯ এপ্ৰিলত চিৰবিদায় লৈছিল বিগত ২৭ মাহ ধৰি দৰমহা বঞ্চিত হৈ অহা নগাঁও কাগজ কলৰ কৰ্মচাৰীজনে।
আত্মহত্যাৰ দৰে চৰম পথ বাচি লোৱৰ পূৰ্বে মজুমদাৰে- ‘মই আহিলো। মোৰ মৃত্যুৰ বাবে ভাৰত চৰকাৰেই দায়ী’ (I quit. GOI (Government of India) is responsible for my death) বুলি লিখি থৈ যায়।
মাত্ৰ দুষাৰী ইংৰাজী বাক্যত লিখা এই চুইচাইড টোকাই উদঙাই দিছে ভাৰত চৰকাৰ আৰু ৰাজ্য চৰকাৰৰ কাগজ কলৰ কৰ্মচাৰীসকলৰ প্ৰতি থকা দায়বদ্ধতা। চৰকাৰে কাগজ কলটো পুনৰজ্জীৱিতকৰণৰ কোনো ব্যৱস্থা নোলোৱাৰ ফলতেই ইজনৰ পিছত সিজন কৰ্মচাৰীয়ে মৃত্যুৰ পথ বাচি ল’ব লগা হৈছে।
বিশ্বজিৎ মজুমদাৰে আত্মহত্যা কৰাৰ পিছৰে পৰা কাগজ কলৰ কৰ্মচাৰী সকল পুনৰ প্ৰতিবাদমুখৰ হৈ পৰিছে। প্ৰতিবাদী কাৰ্যসূচীৰ জৰিয়তে কাগজ কলটো জীয়াই তুলিবলৈ আকৌ এবাৰ কাতৰে অনুৰোধ জনায় চৰকাৰী পক্ষক।
ইয়াৰ উপৰি কাগজ কলটো বন্ধ হোৱাৰ দিনৰে পৰা এই পৰ্যন্ত মৃত্যু হোৱা প্ৰায় ৫৫জন লোকৰ মৃত্যুৰ বাবে চৰকাৰেই দায়ী বুলি একাংশ কৰ্মচাৰীয়ে মন্তব্য কৰে।
উল্লেখ্য যে আজি প্ৰায় দুবছৰ ধৰি বন্ধ হৈ আছে নগাঁও কাগজ কল আৰু কাছাৰ কাগজ কল। কল দুটাৰ কৰ্মচাৰীসকলে বাৰম্বাৰ চৰকাৰক অনুনয় বিনয় কৰাৰ পাছতো কোনো ফল ধৰা দেখা নগ’ল। যাৰ পৰিপ্ৰেক্ষিতত কল দুটাত কৰ্মৰত কৰ্মচাৰীসকলে যন্ত্ৰনাময় জীৱন অতিবাহিত কৰিব লগা হৈছে।
