মুখ্য ন্যায়াধীশ ৰঞ্জন গগৈৰ বিৰুদ্ধে চলিত গোচৰৰ তদন্তকাৰী সমিতিৰ সৈতে ন্যায়াধীশদ্বয় আৰ এফ নৰিমন আৰু দি ৱাই চন্দ্ৰচূড়ৰ সাক্ষাতৰ বাতৰি সজোৰে খণ্ডন কৰিছে ভাৰতৰ উচ্চতম ন্যায়ালয়ে।
ইন্দিয়ান এক্সপ্ৰেছ-এ দেওবাৰে প্ৰকাশ কৰা বাতৰিটো “সম্পূৰ্ণৰূপে অশুদ্ধ” বুলি অভিহিত কৰি সৰ্বোচ্চ ন্যায়ালয়ে এক বিবৃতি জাৰি কৰিছে।
সৰ্বোচ্চ ন্যায়ালয়ৰ সচিব প্ৰধানৰ বিবৃতিটোত কোৱা হৈছে মুখ্য ন্যায়াধীশ ৰঞ্জন গগৈৰ বিৰুদ্ধে উত্থাপিত যৌন নিৰ্য্যাতনৰ তদন্তকাৰী সমিতিখনে “গোচৰটো সন্দৰ্ভত নিজাববীয়াকৈ সুচিন্তা কৰিব আৰু সৰ্বোচ্চ ন্যায়ালয়ৰ আন কোনো ন্যায়াধীশৰে পৰামৰ্শ গ্ৰহণ নকৰে।”
একপক্ষীয় (ex parte)ভাৱে গোচৰটোৰ তদন্তত আগবঢ়া উচিত নহ’ব বুলি ন্যায়াধীশদ্বয় নৰিমন আৰু চন্দ্ৰচূড়ে সমিতিক সাক্ষাৎ কৰি জনোৱা বুলি প্ৰকাশিত বাতৰিটোত কোৱা হৈছিল।
ন্যায়াধীশ ববদে’ নেতৃত্বাধীন তদন্ত সমিতিখনৰ সন্মুখত থিয় দিবলৈ ইতিমধ্যে অস্বীকাৰ কৰিছে অভিযোগকাৰী মহিলাগৰাকীয়ে।
বাতৰিটোত লগতে কোৱা হৈছিল যে ন্যায়াধীশদ্বয়ে গোচৰটোত এগৰাকী এমাইকাছ কিউৰিয়াই (amicus curiae) নিয়োগ কৰি তেওঁৰ পৰামৰ্শমতে সমিতিখনক আগবঢ়াৰ কথা কৈছে।
উচ্চতম ন্যায়ালয়ৰ দ্বিতীয় জ্যেষ্ঠ ন্যায়াধীশ ববদে’ৰ নেতৃত্বত ন্যায়াধীশদ্বয় ইন্দু মালহ’ত্ৰা আৰু ইন্দিৰা মুখাৰ্জীক লৈ তদন্ত সমিতিখন গঠিত হৈছে।
