“গুৱাহাটী চেণ্ট্ৰেল”ৰ বিস্ফোৰণৰ মূল অভিযুক্ত তথা আলফা স্বাধীনৰ কেডাৰ বিজয় অসমক আজি তিনিচুকীয়াৰ ডুমডুমাৰ পৰা গ্ৰেপ্তাৰ কৰিছে অসম আৰক্ষীয়ে।
প্ৰায় এক ডজন লোক আহত হোৱা ১৫ মে’ৰ বিস্ফোৰণটোত বিজয় অসমেই গ্ৰেনেডটো দলিয়াইছিল বুলি অসম আৰক্ষীয়ে সন্দেহ কৰি আহিছে। যোৱা ১৮ মে’ত গুৱাহাটী মহানগৰৰ আৰক্ষী আয়ুক্ত দীপক কুমাৰে বিজয় অসম জড়িত থকাৰ কথা সংবাদমেলত সদৰী কৰিছিল।
বিজয় অসমে বিস্ফোৰণৰ দুই-এদিন পূৰ্বে চিকিৎসা লোৱা গুৱাহাটী মহানগৰীৰ ডাউন টাউন হস্পিটেলৰ এটা চি চি টিভি ফুটেইজে এই ক্ষেত্ৰত তদন্তকাৰী আৰক্ষীক সহায় কৰে।
গুৰুত্বপূৰ্ণ ভিডিঅ’ ফুটেইজটোত দেখা যায়, চিকিৎসালয়খনৰ পৰা ওলাই যাওঁতে বিজয় অসম বুলি চিহ্নিত যুৱকজনক এজন পুৰুষ আৰু এগৰাকী মহিলাই সংগ দিয়ে। দুয়োজন ব্যক্তিৰ ক্ৰমে প্ৰাণময় ৰাজগুৰু আৰু জাহ্নৱী শইকীয়াৰ সৈতে চেহেৰাৰ সাদৃশ্য দেখা গৈছে।
দুধৰ্ষ কেডাৰজনৰ গ্ৰেপ্তাৰে ঘটনাটোৰ তদন্তত অসম আৰক্ষীয়ে গুৰুত্বপূৰ্ণ অগ্ৰগতি লাভ কৰিছে। বিস্ফোৰণটোত জড়িত থকাৰ অভিযোগত ইতিপূৰ্বে ৫জন লোকক আৰক্ষীয়ে গ্ৰেপ্তাৰ কৰিছিল। তেওঁলোক আছিল, আলফা নেতা প্ৰাণময় ৰাজগুৰু, সহায়কাৰী তথা সমৰ্থক জাহ্নৱী শইকীয়া, প্ৰাক্তন আলফা গোলাঘাটৰ অমিত বল্লভ গোস্বামী, নগাঁৱৰ ইন্দ্ৰমোহন বৰা আৰু গুৱাহাটীৰ চিন্ময় লহকৰ।
গুৱাহাটী মহানগৰৰ আৰক্ষী আয়ুক্ত দীপক কুমাৰে নৰ্থ-ইষ্ট নাওৰ আগত কয়, “কেৱল মহানগৰ আৰক্ষীয়ে নহয়, নগাঁও, ডিব্ৰুগড়, গোলাঘাট, চৰাইদেউ আৰু তিনিচুকীয়া জিলাৰ আৰক্ষী মিলি অপৰাধীক কৰায়ত্ত কৰা হৈছে। ঘটনাৰ তদন্ত প্ৰায় শেষ পৰ্যায় পাইছেহি”
কাইলৈ বিজয় অসমক গুৱাহাটীলৈ অনা হ’ব। জানিব পৰামতে, বিজয় অসম কেইবাটাও ৰোগত আক্ৰান্ত হৈ আছে।
