নতুন মোদী কেবিনেটত যদিও তুৰা সমষ্টিৰ সাংসদ আগাথা কে চাংমাই মন্ত্ৰীত্ব লাভ কৰিবলৈ সক্ষম নহ’ল তথাপি গাৰো পাহাৰৰ খেতিয়কসকল সম্পূৰ্ণৰূপে আশাহত হোৱা নাই।
কেবিনেটতত পঞ্জাৱৰ সাংসদ হৰচিমৰৎ কৌৰ বাদলক খাদ্য সংসাধন মন্ত্ৰী আৰু অসমৰ সাংসদ ৰামেশ্বৰ তেলীক বিভাগটোৰ ৰাজ্যিক মন্ত্ৰী হিচাপে দায়িত্বভাৰ অৰ্পন কৰাৰ পাছত ৰাজ্যখনৰ খেতিয়কসকলৰ মনত নতুন আশাৰ সঞ্চাৰ হৈছে।
বাদল আৰু তেলীয়ে যুতীয়াভাবে কাম কৰি গাৰো পাহাৰৰ খেতিয়কসকলৰ সপোন দিঠকত পৰিণত কৰিব বুলি এতিয়া সকলোৱে আশাবাদী।
মেঘালয়ৰ উত্তৰ গাৰো পাহাৰৰ আদোকগ্ৰেৰ গাৰো জনজাতীয় খেতিয়কলকল হ’ল দক্ষিণ এচিয়াৰ ভিতৰত সৰ্বাধিক জৈৱিক পদ্ধতিৰে কল উৎপাদন কৰা খেতিয়ক। ১৫,০০০ তকৈও অধিক জনজাতীয় খেতিয়ক প্ৰত্যক্ষ অথবা পৰোক্ষ ভাবে কল খেতিৰ লগত জড়িত হৈ আছে।
সাধাৰণতে, গাৰো পাহাৰৰ কল খেতিয়কসকলে তেওঁলোকৰ উৎপাদিত কলসমূহ এচিয়াৰ সৰ্ববৃহৎ কলৰ বজাৰ অসমৰ গোৱালপাৰা জিলাৰ দৰংগিৰীত বিক্ৰী কৰে। বেছিভাগ সময়তে জনজাতীয় কল খেতিয়কসকল সদায় মধ্যভোগীৰ দ্বাৰা প্ৰতাৰিত হৈ আহিছে।
গাৰো কল খেতিয়ক সকল যাতে মধ্যভোগীসকলৰ দ্বাৰা প্ৰতাৰিত হ’বলগীয়া নহয় সেই সম্পৰ্কত মেঘালয়ৰ মুখ্য মন্ত্ৰী কনৰাড চাংমা আৰু গাৰো পাহাৰৰ খেতিয়কসকলৰ এটা প্ৰতিনিধিৰ দলে ২০১৭ চনৰ আগষ্ট মাহত খাদ্য সংসাধন দপ্তৰৰ কেন্দ্ৰীয় মন্ত্ৰী হৰচিমৰৎ কৌৰ বাদলক সাক্ষাৎ কৰিছিল।
বাদলক সাক্ষাৎ কালত কনৰাড চাংমা আৰু প্ৰতিনিধি দলটোৰ সদস্য ৰূপেৰ্ট মোমিনে বাদলক উত্তৰ গাৰো পাহাৰৰ জৈৱিক কলৰ খেতিৰ বিষয়ে বিস্তাৰিত ৰূপত অৱগত কৰিছিল।
যিহেতু অঞ্চলটোত কলৰ উৎপাদন বছৰটোৰ এটা নিৰ্দিষ্ট সময়তহে বেছিকৈ হয় (মূলত আগষ্টৰ পৰা অক্টোৱৰ মাহলৈ) সেয়েহে কলৰ উৎপাদন আৰু যোগান নিয়মীয়া কৰাৰ বাবে প্ৰতিনিধি দলটোৱে কেন্দ্ৰীয় মন্ত্ৰীগৰাকীক অঞ্চলটোত এটা শীতল ভাণ্ডাৰ আৰু সংসাধন গোট স্থাপনৰ বাবে আহ্বান জনাইছিল।
যদিও নতুন দিল্লীৰ কেন্দ্ৰীয় চৰকাৰে এতিয়ালৈ শীতল ভাণ্ডাৰ আৰু খাদ্য সংসাধন গোট স্থাপনত কোনোধৰণৰ কাৰ্য্যব্যৱস্থা হাতত লোৱা নাই তথাপি শুকুৰবাৰে বাদল আৰু ৰামেশ্বৰ তেলীয়ে বিভাগটোৰ দায়িত্ব পোৱাত খেতিয়কলকলৰ মনত নতুন আশা যোগ হয়।
একাংশ গাৰো কল খেতিয়কে মেঘালয়ৰ মুখ্য মন্ত্ৰী কনৰাড চাংমা আৰু খাৰকুত্তাৰ বিধায়ক ৰূপেৰ্ট মোমিনে দুয়োগৰাকী বিভাগীয় মন্ত্ৰীক অঞ্চলটোৰ কল খেতিয়কসকলৰ দাবী পুৰণ কৰাৰ ক্ষেত্ৰত প্ৰভাৱিত কৰিবলৈ সক্ষম হ’ব বুলি বিশ্বাসী হৈ আছে।
মেঘালয়ৰ মুখ্য মন্ত্ৰী চাংমাই বিগত দুটা মাহত তেওঁলোকৰ সমস্যাসমূহ সমাধান কৰাৰ বাবে চেষ্টা কৰি আছে আৰু মেঘালয় চৰকাৰে কৃষি আৰু জৈৱিক উৎপাদন বৃদ্ধি কৰাৰ বাবে নতুনকৈ খাদ্য সঞ্চালকালয় বিভাগ এটাও স্থাপন কৰিছে।
