বাংলাদেশৰ স্বাধীনতাৰ সোণালী জয়ন্তী উদযাপন আৰু বংগবন্ধু শ্বেখ মজিবুৰ ৰহমানৰ জন্ম শতবাৰ্ষিকীত অংশগ্ৰহণ কৰা ইচ্ছা ভাৰতে শুকুৰবাৰে ব্যক্ত কৰিছে।
প্ৰধান মন্ত্ৰী নৰেন্দ্ৰ মোদীয়ে শুকুৰবাৰে নতুন দিল্লীত বাংলাদেশৰ ৰাষ্ট্ৰপতি আব্দুল হামিদৰ সৈতে অনুষ্ঠিত এক বৈঠকত এই ইচ্ছাৰ কথা অৱগত কৰে।
বাংলাদেশৰ ৰাষ্ট্ৰপতি আব্দুল হামিদ বৃহস্পতিবাৰে ৰাজধানীত দ্বিতীয়টো কাৰ্যকালৰ বাবে প্ৰধান মন্ত্ৰী নৰেন্দ্ৰ মোদী আৰু তেওঁৰ মন্ত্ৰীসভাৰ আন সদস্যসকলৰ শপত গ্ৰহণ অনুষ্ঠানত ভাগ ল’বলৈ আহি উপস্থিত হৈছিল।
শুকুৰবাৰে আবেলি বাংলাদেশৰ ৰাষ্ট্ৰপতি আব্দুল হামিদে মোদীক সাক্ষাৎ কৰে আৰু দুয়োখন দেশ জড়িত থকা দ্বিপাক্ষিক বিষয়ৰ সন্দৰ্ভত আলোচনা কৰে।
বাতৰি অনুসৰি, বাংলাদেশৰ ৰাষ্ট্ৰপতিৰ প্ৰেছ সচিব এম জয়নাল আবেদিনৰ উদ্ধৃতিৰে কোৱা হৈছে যে প্ৰধান মন্ত্ৰী নৰেন্দ্ৰ মোদীয়ে বৈঠকত নিজৰ দৃষ্টিভংগী দাঙি ধৰি কয় যে যদি দুয়োখন দেশে বাংলাদেশৰ স্বাধীনতাৰ সোণালী জয়ন্তী আৰু বংগবন্ধু শ্বেখ মজিবুৰ ৰহমানৰ জন্ম শতবাৰ্ষিকী উদযাপন কৰিবলৈ এক যৌথ প্ৰচেষ্টা গ্ৰহণ কৰে তেতিয়াহ’লে ই বিশ্বৰ মনযোগ লাভ কৰিব।
জানিব পৰা মতে, মোদীয়ে এই ব্যৱস্থাই দ্বিপাক্ষিক তথা বিভিন্ন দিশৰ সম্পৰ্কৰ বিকাশত এক ভূমিকা পালন কৰিব বুলিও বিশ্বাস ব্যক্ত কৰে।
শুকুৰবাৰে বিয়লি বাংলাদেশ ৰাষ্ট্ৰপতি হামিদ আৰু দেশখনৰ প্ৰতিনিধি দলটো স্বদেশলৈ উভতি যায়।
উল্লেখযোগ্য যে অহা ২০২০’ত বাংলাদেশে দেশখনৰ জনকগৰাকীৰ ১০০সংখ্যক জন্ম বাৰ্ষিকী পালন কৰিব। তদুপৰি, ইয়াৰ এবছৰ পাছতে অৰ্থাৎ ২০২১’ৰ ২৬ মাৰ্চত দেশখনে ইয়াৰ স্বাধীনতাৰ সোণালী জয়ন্তী উদযাপন কৰিব।
বাংলাদেশৰ জনক, বংগবন্ধু শ্বেখ মজিবুৰ ৰহমানৰ ১৯২০ চনৰ ১৭ মাৰ্চত গোপালগঞ্জৰ তুংগীপাৰাত জন্ম হৈছিল। তেওঁ দেশখনৰ স্বাধীনতা সংগ্ৰামৰ নেতৃত্ব দিছিল আৰু বাংলাদেশে ১৯৭১ চনত পাকিস্তানৰ পৰা আঁতৰি আহি এখন স্বাধীন দেশ হিচাপে প্ৰতিষ্ঠা লাভ কৰে। বাংলাদেশৰ স্বাধীনতা যুদ্ধত ভাৰতে এক নিৰ্ণায়ক ভূমিকা গ্ৰহণ কৰিছিল।
