যোগাসনৰ জৰিয়তে ৰাষ্ট্ৰীয় পৰ্যায়ত সন্মান কঢ়িয়াই আনিবলৈ সক্ষম হোৱা নগাঁও জিলাৰ পুৰণিগুদামৰ মুঢ়ানি গাঁৱৰ গোলাপ শইকীয়া আৰু স্বপ্না শইকীয়াৰ একমাত্ৰ জিয়ৰী অংকিতা শইকীয়া এইবাৰ যোগা অলিম্পিয়াডত অংশ লোৱাৰ বাবে সাজু হৈ উঠিছে।
নতুন দিল্লীত অনুষ্ঠিত হ’ব লগা যোগা অলিম্পিয়াডত অসমৰ পৰা জুনিয়ৰ শাখাত অংশগ্ৰহণৰ সুবিধা লাভ কৰিছে প্ৰতিভাৱান অংকিতা শইকীয়াই।
উল্লেখ্য যে পুৰণিগুদাম বিদ্যানিকেতনৰ ষষ্ঠ শ্ৰেণীৰ ছাত্ৰী অংকিতাই প্ৰথম শ্ৰেণীত পঢ়ি থকাৰ পৰাই বিদ্যালয়ৰ যোগাসনৰ শিক্ষয়িত্ৰী অঞ্জনা কলিতাৰ তত্ত্বাৱধানত যোগাসনৰ শিক্ষা গ্ৰহন কৰিছিল।
ইয়াৰ পিছতে বিভিন্ন স্থানত যোগাসনৰ জৰিয়তে নিজৰ প্ৰতিভা প্ৰকাশ কৰিবলৈ সক্ষম হোৱা অংকিতাই ২০১৬ চনত ঝাৰখণ্ডত আন্তঃৰাষ্ট্ৰীয় পৰ্যায়ত অনুষ্ঠিত হোৱা ৪১ তম যোগাসন প্ৰতিযোগিতাত ষষ্ঠ স্থান দখল কৰিবলৈ সক্ষম হয়। ইয়াৰ পিছত ২০১৭ চনত উত্তৰ প্ৰদেশৰ গাজিয়াবাদত অনুষ্ঠিত হোৱা ৪২ তম আন্তঃৰাষ্ট্ৰীয় যোগাসন প্ৰতিযোগিতাত ষষ্ঠ স্থান পুনৰ দখল কৰিবলৈ সক্ষম হয়।
২০১৭ চনতে কেৰালাত অনুষ্ঠিত ৰাষ্ট্ৰীয় পৰ্যায়ৰ যোগাসন ফেডাৰেশ্যন কাপত চতুৰ্থ স্থান দখল কৰিবলৈ সক্ষম হয়। সেইটো বৰ্ষতে কৰ্নাটকত অনুষ্ঠিত আন্তঃৰাষ্ট্ৰীয় যোগাসন প্ৰতিযোগিতাত ভাৰতৰ হৈ প্ৰতিনিধিত্ব কৰি দ্বিতীয় স্থান দখল কৰিবলৈ সক্ষম হৈছিল।
অতি কম বয়সতে ইমানবোৰ সফলতা আহৰণ কৰা অংকিতাই অলিম্পিয়াডতো ভাল ফলাফল লাভ কৰাৰ উদ্দেশ্যেৰে বৰ্তমান নগাঁও নেহেৰু যুৱ কেন্দ্ৰৰ দ্বাৰা পৰিচালিত “নিৰ্বানত” প্ৰভাত বৰাৰ নেতৃত্বত যোগৰ প্ৰশিক্ষণ গ্ৰহণ কৰি আছে।
পুৰণিগুদামৰ এইগৰাকী মেধাৱী ছাত্ৰী অংকিতাই যোগাসনত দেখুৱাই অহা পাৰদৰ্শিতাই সমগ্ৰ পুৰণিগুদাম অঞ্চললৈ আশাৰ বাৰ্তা কঢ়িয়াই আনিবলৈ সক্ষম হৈছে। যোগাসনৰ উপৰি নৃত্য, নাটক আদিত নিজৰ প্ৰতিভা বিকাশ কৰিবলৈ সক্ষম হোৱা অংকিতাক লৈ এতিয়া আশাবাদী পুৰণিগুদামবাসী।
