আজি ৰূপকোঁৱৰ জ্যোতিপ্ৰসাদ আগৰৱালাৰ জন্মভূমি আৰু কৰ্মভূমি তামোলবাৰী চাহ বাগিছাত শিল্পীগৰাকীৰ ১১৭ সংখ্যক জন্ম দিৱস উপলক্ষে তামোলবাৰী টি কোম্পানী প্ৰাইভেট লিমিটেডে আয়োজন কৰা জ্যোতি জন্ম জয়ন্তী অনুষ্ঠানত মুখ্য অতিথি হিচাপে অংশ গ্ৰহণ কৰি মুখ্য মন্ত্ৰী সৰ্বানন্দ সোণোৱালে জ্যোতিপ্ৰসাদৰ আৱক্ষ মুৰ্তি উন্মোচন কৰে।
অনুষ্ঠানত অংশগ্ৰহণ কৰি দিয়া ভাষণত সোণোৱালে জ্যোতিপ্ৰসাদৰ আদৰ্শৰে অসমীয়া জাতিয়ে ভাৰতৰ বুকুত সামাজিক, সাংস্কৃতিক আৰু আধ্যাত্মিক শক্তিশালী ৰূপত আত্মপ্ৰকাশ কৰাৰ প্ৰয়াস চলাই আহিছে বুলি মন্তব্য কৰে। তেওঁ অনভিজ্ঞ শিল্পীক লৈ প্ৰথম অসমীয়া চলচ্চিত্ৰ ‘জয়মতী’ নিৰ্মাণ কৰি অসমীয়া চলচ্চিত্ৰৰ যাত্ৰাৰ সূচনা কৰিছিল বুলিও মুখ্য মন্ত্ৰী গৰাকীয়ে উল্লেখ কৰে।
আনহাতে, ‘জয়মতী’ নিৰ্মাণৰ জৰিয়তে জ্যোতি প্ৰসাদে মহিলা সৱলীকৰণৰৰ বাবেও বলিষ্ঠ পদক্ষেপ লৈছিল বুলি সোণোৱালে কয়। মুখ্য মন্ত্ৰীয়ে অসমৰ উঠি অহা প্ৰজন্মক জ্যোতিপ্ৰসাদৰ আদৰ্শৰে অসমৰ বৰ্ণাঢ্য সাংস্কৃতিক জগতখনত আগুৱাই নিবলৈ আহ্বান জনায়।
তদুপৰি, অসমৰ সমাজ জীৱনৰ বাবে স্থাপন কৰিবলগীয়া জ্যোতি তীৰ্থ সন্দৰ্ভত অসম সাহিত্য সভাৰ প্ৰাক্তন সভাপতি তথা বিশিষ্ট সাহিত্যিক ড০ নগেন শইকীয়াই ‘জ্যোতি তীৰ্থ’ক মাজুলীত স্থাপন কৰা সাংস্কৃতিক বিশ্ববিদ্যালয়ৰ এক চৌহদ হিচাপে স্বীকৃতি প্ৰদানৰ বাবে যি পৰামৰ্শ আগবঢ়াইছে সেয়া অতি গুৰুত্বপূৰ্ণ বুলি কয়।
মুখ্য মন্ত্ৰীৰ উপৰিও অনুষ্ঠানত ভাষণ প্ৰদান কৰে বিশিষ্ট সাহিত্যক নগেন শইকীয়া, তামোলবাৰী টি কোম্পানী প্ৰাইভেট লিমিটেডৰ সঞ্চালক দেৱীপ্ৰসাদ বাগড়োদিয়াই। দুয়োগৰাকী বিশিষ্ট ব্যক্তিয়ে জ্যোতিপ্ৰসাদৰ ৰচনাৱলী তথা সাহিত্যাৰাজি বিভিন্ন ভাষালৈ অনুবাদ কৰাৰ লগতে এইবোৰ শ্ৰেণী বিভক্ত কৰি প্ৰণালীবদ্ধভাৱে সংৰক্ষণ কৰাৰ বাবে আহ্বান জনায়।
আজিৰ অনুষ্ঠানত তামোলবাৰী চাহ বাগিছাত জ্যোতিপ্ৰসাদৰ আৱক্ষ মুৰ্তি উদ্বোধন কৰাৰ লগতে দেৱী প্ৰসাদ বাগড়োদিয়া আৰু নগেন শইকীয়াই লিখি উলিওৱা ক্ৰমে ‘জ্যোতি প্ৰসাদ আগৰৱালা-এনচেষ্টাৰ্চ এণ্ড তামোলবাৰী’ আৰু ‘ভাৰতীয় ঐতিহ্য’ শীৰ্ষক গ্ৰন্থ দুখন উন্মোচন কৰা হয়।
অনুষ্ঠানত মুখ্য মন্ত্ৰীৰ লগতে বিধায়ক প্ৰশান্ত ফুকন, ঋতুপৰ্ণ বৰুৱা, জ্যোতিপ্ৰসাদ আগৰৱালাৰ কন্যা জয়শ্ৰী চলিহা, সত্যাশ্ৰী দাস, জ্ঞানশ্ৰী পাঠক, শ্ৰীমন্ত শংকৰদেৱ বিশ্ববিদ্যালয়ৰ উপাচাৰ্য্য ড০ কন্দৰ্প ডেকাকে ধৰি ভালেসংখ্যক গণ্য-মান্য ব্যক্তিসকল উপস্থিত আছিল।
