সোমবাৰে সাংসদ হিচাপে শপত গ্ৰহণ কৰে ৰাজ্য চৰকাৰৰ দুই মন্ত্ৰী পল্লৱ লোচন দাস আৰু তপন কুমাৰ গগৈয়ে। দুয়োগৰাকী সাংসদে শপত লোৱাৰ পিছতো কিয় এতিয়াও ৰাজ্যৰ মন্ত্ৰীৰ দায়িত্ব এৰা নাই তাকে লৈ এতিয়া ভিভিন্ন মাধ্যমত চলিছে চৰ্চা।
এইবাৰৰ লোকসভা নিৰ্বাচনত তেজপুৰৰ পৰা পল্লৱ লোচন আৰু যোৰহাট সমষ্টিৰ পৰা তপন গগৈ নিৰ্বাচিত হয়। ইয়াৰ পাছতে দুয়োজনে অসম বিধানসভাৰ সদস্য পদৰ পৰা পদত্যাগো কৰে।
বিধায়ক পদ এৰি সাংসদ হিচাপে শপত গ্ৰহণ কৰিলে ঠিকেই কিন্তু এতিয়াও দুয়োজনে চম্ভালি আছে ৰাজ্য চৰকাৰৰ গুৰুত্বপূৰ্ণ মন্ত্ৰী পদ। এই সম্পৰ্কত দুয়োজনৰ পৰা জানিব বিচৰাত কয় যে মুখ্য মন্ত্ৰীয়ে তেওঁলোকক মন্ত্ৰীৰ দায়িত্বত নিয়োজিত কৰিছে। গতিকে মুখ্য মন্ত্ৰীয়ে যেতিয়াই তেওঁলোকক মন্ত্ৰীৰ দায়িত্বৰ পৰা ইস্তাফা দিবলৈ ক’ব তেতিয়াই পদত্যাগ কৰিব।
মুখ্য মন্ত্ৰীৰ কোনো নিৰ্দেশ নহালৈকে দুয়োজনে সাংসদ পদৰ লগতে মন্ত্ৰীৰ দায়িত্ব নিয়াৰিকৈ পালন কৰি যাব বুলি কয়।
উল্লেখ্য যে পল্লৱলোচন দাসে শ্ৰম, চাহ জনজাতি কল্যাণ বিভাগৰ স্বতন্ত্ৰ ৰাজ্যিক মন্ত্ৰী আৰু শিক্ষা বিভাগৰ ৰাজ্যিক মন্ত্ৰীৰ দায়িত্বত আছে। সেইদৰে তপন গগৈয়ে শক্তি বিভাগৰ স্বতন্ত্ৰ ৰাজ্যিক মন্ত্ৰী আৰু গড়কাপ্তানী বিভাগৰ ৰাজ্যিক মন্ত্ৰীৰ দায়িত্বত আছে।
