নাগালেণ্ডৰ সীমান্তৱৰ্তী গোলাঘাট জিলাৰ পিছত এতিয়া শিৱসাগৰ জিলা ড্ৰাগচৰ ঘাটি হিচাপে পৰিগনিত হৈছে। শিৱসাগৰ আৰক্ষীয়ে বুধবাৰে ড্ৰাগচসহ দুজন যুৱকক আটক কৰে। আটক কৰা দুই যুৱকৰ পৰা বহুকেইটা ব্ৰাউন চুগাৰৰ পেকেট উদ্ধাৰ কৰে আৰক্ষীয়ে।
প্ৰাপ্ত তথ্য মতে এক গোপন সূত্ৰৰ খবৰৰ ভিত্তিত আৰক্ষীৰ এটা দল চহৰৰ গনকপট্টী তিনি আলিৰ স্কাইচেফ হোটেলৰ সন্মুখত ৰৈ থকা অৱস্থাত গনকপট্টীৰ দিশৰ পৰা আহি থকা এ এছ ০৪ কিউ ৩৫৭১ নম্বৰৰ ৰঙা ৰঙৰ এল্ট গাড়ীখন আগ ভেটি ধৰে। গাড়ীত থকা দুই আৰোহীৰ লগতে আৰক্ষীয়ে গাড়ীখনৰ তালাচী চলোৱাত কেইবা পেকেট ড্ৰাগচ উদ্ধাৰ কৰা হয়।
আটকাধীন যুৱক দুজনক অংকুৰজ্যোতি বৰুৱা আৰু মানৱজ্যোতি গগৈ বুলি চিনাক্ত কৰা হৈছে। আৰক্ষীয়ে পিছত দুয়োজনকে সোধা-পোচাৰ বাবে থানালৈ লৈ যায়।
উল্লেখযোগ্য যে, শিৱসাগৰ জিলাৰ অসম নাগালেণ্ড সীমান্তৰ বিহুবৰৰ পৰা ড্ৰাগচৰ বেহা নিয়ন্ত্ৰিত হৈ আহিছে। এক অসাধু চক্ৰই বিভিন্ন এজেন্টৰ জৰিয়তে সেৱনকাৰীক ড্ৰাগচৰ যোগান ধৰে। বিহুবৰৰ পৰা চূনপূৰা পৰ্যন্ত আহি এজেন্টে ড্ৰাগচ যোগান দি যায়হি।
আজি শিৱসাগৰ আৰক্ষীয়ে আটক কৰা অংকুৰজ্যোতি আৰু মানৱজ্যোতিয়ে বিহুবৰৰ এজেন্টৰ পৰা চূনপূৰাত ড্ৰাগচ সংগ্ৰহ কৰি উভতি আহিছিল বুলি স্বীকাৰ কৰে।
