গোলাঘাটৰ বিশেষ আদালতে এজন শিশু ধর্ষণকাৰী অপৰাধীৰ বিৰুদ্ধে দহ বছৰৰ সশ্ৰম কাৰাদণ্ডৰ ৰায় দান কৰিছে। আদালতৰ পৰা লাভ কৰা তথ্য অনুসৰি উক্ত অপৰাধীটো গোলাঘাট জিলাৰ সৰুপথাৰ আৰক্ষী থানাৰ অন্তৰ্গত খনিকৰ গাঁৱৰ নিবাসী মৃত প্ৰদ্যুম্য শুক্লবৈদ্যৰ পুত্ৰ প্ৰেমাংশু শুক্লবৈদ্য বুলি জানিব পৰা গৈছে।
উক্ত অপৰাধীজনৰ বিৰুদ্ধে ২০১৭ চনৰ ২২ অক্টোবৰৰ বিয়লি প্ৰায় তিনি বজাত স্থানীয় এজনী দহ বছৰীয়া ছোৱালীক ফুচুলাই নি ধর্ষণ কৰাৰ অভিযোগ উত্থাপন হৈছিল।
শিশুটিৰ মাতৃৰ লিখিত অভিযোগৰ ভিত্তিত ২০১৭ চনৰ ২৪ অক্টোবৰত সৰুপথাৰ আৰক্ষীয়ে উক্ত অপৰাধীজনৰ বিৰুদ্ধে ভাৰতীয় দণ্ডবিধিৰ ৩৭৬(i)/৫০৬ আৰু যৌন নিৰ্যাতনৰ পৰা শিশু সুৰক্ষা আইনৰ ৬ নং ধাৰাৰ অধীনত ১৪০/১৭ নম্বৰত এক গোচৰ পঞ্জীয়ন কৰে।
ইয়াৰ পাছত ২০১৮ চনৰ ১০ এপ্ৰিলৰ পৰা গোলাঘাটৰ বিশেষ আদালতত( special pocso গোচৰ নং ২/২০১৮)যৌন নিৰ্যাতনৰ পৰা শিশু সুৰক্ষা আইনৰ ৬ নং ধাৰাত উক্ত গোচৰৰ সাক্ষ্য প্ৰমাণ গ্ৰহণ প্ৰক্ৰিয়া আৰম্ভ হয় আৰু বুধবাৰে বিশেষ ন্যায়াধীশ সত্যজিৎ খাউণ্ডৰ আদালতে অপৰাধীজনক দোষী সাব্যস্ত কৰি উক্ত ৰায় ঘোষণা কৰে।
আদালতৰ ৰায় অনুসৰি অপৰাধীজনে এক হাজাৰ টকা জৰিমনা দিব লাগিব, জৰিমনা অনাদায়ে অতিৰিক্ত এক মাহৰ কাৰাবাস খাটিব লাগিব।
আনহাতে, আদালতে ভুক্তভোগী শিশুটিক যথাযোগ্য ক্ষতিপূৰণ প্ৰদানৰ বাবে গোলাঘাট জিলা আইন সেৱা প্ৰাধিকাৰীক নিৰ্দেশ দিছে বুলিও জানিব পৰা গৈছে।
