ৰাষ্ট্ৰীয় নাগৰিক পঞ্জীৰ (এন আৰ চি) তালিকাৰ পৰা ১ লাখ লোক বাদ পৰা অতিৰিক্ত তালিকা প্ৰকাশ পাছতে কেন্দ্ৰীয় গৃহ মন্ত্ৰালয়ে জানিব দিয়ে যে যিসকলৰ নাম বাদ পৰিছে তেওঁলোকে অহা ৩১ জুলাইত প্ৰকাশ পাবলগীয়া চূড়ান্ত তালিকাৰ পূৰ্বে অহা ১৫ দিনৰ ভিতৰত নাগৰিকত্ব প্ৰমানৰ বাবে অন্তিম সুযোগ লাভ কৰিব।
উল্লেখযোগ্য যে ২০১৮ৰ জুলাইত প্ৰকাশিত এন আৰ চিৰ খচৰাত প্ৰায় ৪০ লাখ লোকৰ নাম বাদ পৰিছিল। যোৱা ২৬ জুনত এন আৰ চিৰ ৰাজ্যিক সমন্বয়কে আৰু ১,০২,৪৬২ জন লোকৰ নাম কৰ্তন হোৱা এখন অতিৰিক্ত তালিকা প্ৰকাশ কৰিছে।
চৰকাৰী বিষয়াৰ সূত্ৰই জানিব দিয়া মতে ৰাজ্যখনৰ ৩১খন জিলাত সিচৰিত হৈ থকা এন আৰ চিৰ পৰা শেহতীয়াভাৱে বাদ পৰা এই ১ লাখৰো অধিক লোকে পুনৰ নাগৰিকত্ব দাবী কৰিব পাৰিব আৰু অহা ৫ জুলাইৰ পৰা ইয়াৰ শুনানি আৰম্ভ হ’ব।
অসমত থকা অবৈধ বিদেশী অনুপ্ৰবেশকাৰীসকলক চিনাক্তকৰণৰ বাবে প্ৰথমবাৰৰ বাবে ১৯৫১ চনৰ পাছত ৰাষ্ট্ৰীয় নাগৰিকপঞ্জী উন্নীতকৰণৰ কাম কৰি থকা হৈছে। উচ্চতম ন্যায়ালয়ৰ নিৰীক্ষণত থকা সম্পূৰ্ণ নাগৰিকপঞ্জীখন অহা মাহত প্ৰকাশ পাব। বৰ্তমানলৈ প্ৰায় ৩.২৯ কোটি লোকে নিজৰ নাম এন আৰ চিত অন্তৰ্ভূক্ত কৰাৰ বাবে আবেদন কৰিছে আৰু ইয়াৰ ভিতৰত ২.৯ কোটি লোকৰ নাম যোগ্য হিচাপে বিবেচিত হৈছে।
বিদেশী হিচাপে ঘোষিত, সন্দেহযুক্ত ভোটাৰ আৰু বিদেশী ন্যায়াধীশত গোচৰ চলি থকা লোকৰ অতিৰিক্ত ১১ লাখ লোকৰ নাম ড্ৰাফ্ট এন আৰ চিৰ পৰা বাদ দিয়া হৈছে বুলি বিভাগৰ পৰা প্ৰকাশ কৰা হৈছে। দাবী আৰু আপত্তি প্ৰক্ৰিয়াৰ শুনানিত যিসকল লোক অযোগ্য হিচাপে বিবেচিত হৈছে তেওঁলোকৰ নামো এন আৰ চি তালিকাৰ পৰা শেহতীয়াভাবে বাদ দিয়া হৈছে।
আনহাতে, বিগত দুই আঢ়ৈ মাহৰ ভিতৰত এন আৰ চি সেৱা কেন্দ্ৰ, উপায়ুক্তৰ কাৰ্য্যালয়, এচ ডি অ’ কাৰ্য্যালয় আদিত ড্ৰাফ্ট এন আৰ চিৰ পৰা নাম বাদ পৰা প্ৰায় ৪০ লাখ লোকৰ শুনানি গ্ৰহণ কৰা হয় বুলি বিভাগীয় কৰ্তৃপক্ষৰ পৰা প্ৰকাশ কৰা হয়।
৩১ জুলাইৰ পূৰ্বে বিদেশী ন্যায়াধীকৰণত চলি থকা গোচৰসমূহ নিষ্পত্তি কৰাৰ বাবে ইতিমধ্যে গৃহ মন্ত্ৰালয়ে মানৱসম্পদ নিয়োগ কৰাৰ বাবে কাৰ্য্যব্যৱস্থা হাতত লৈছে আৰু ইয়াৰ বাবে সমগ্ৰ ৰাজ্যত নতুনকৈ ১০০০ বিদেশী ন্যায়াধীকৰণ খোলা হ’ব বুলি ৰাজ্য চৰকাৰে সিদ্ধান্ত গ্ৰহণ কৰিছে।
