উচ্চতম ন্যায়ালয়ে ইংৰাজী ভাষাৰ উপৰিও অন্যান্য আঞ্চলিক ভাষা অসমীয়া, হিন্দী, কন্নড়, মাৰাঠী, ওড়িয়া আৰু তেলেগু ভাষাত ইয়াৰ ৰায়দানৰ প্ৰতিলিপি প্ৰস্তুত তথা প্ৰকাশ কৰাৰ সিদ্ধান্ত গ্ৰহণ কৰিছে।
জুলাই মাহৰ শেষৰপৰাই উচ্চতম ন্যায়ালয়ৰ ৱেবছাইটত ন্যায়ালয়ৰ বিভিন্ন ৰায়দানৰ প্ৰতিলিপি ইংৰাজী ভাষাৰ উপৰিও আন ছয়টা ভাষাত উপলব্ধ হ’ব বুলি ন্যায়ালয়ে উল্লেখ কৰাৰ কথা বিশেষ সূত্ৰৰ পৰা জানিব পৰা গৈছে।
উচ্চতম ন্যায়ালয়ে বিভিন্ন ভাষাত প্ৰকাশিত হ’বলগীয়া ৰায় সমূহৰ বাবে ইতিমধ্যে উচ্চতম ন্যায়ালয়ৰ ইলেক্ট্ৰনিক ছফটৱেৰ উইঙে এটা ছফটৱেৰো প্ৰস্তুত কৰি উলিয়াইছে।
উল্লেখযোগ্য উচ্চমত ন্যায়ালয়ৰ মুখ্য ন্যায়াধীশ ৰঞ্জন গগৈৰ পৰিকল্পনা অনুসৰিয়ে এনেধৰণৰ পদক্ষেপ গ্ৰহণ কৰা হৈছে বুলি খবৰ লাভ কৰা গৈছে।
আনহাতে, সৰ্বোচ্চ ন্যায়ালয়ত গোচৰৰ ৰায়দানৰ দিনাখনে ৰায়ৰ ইংৰাজী ৰূপ প্ৰকাশ পাব যদিও ইয়াৰ এসপ্তাহৰ ভিতৰত ৰায়দানৰ অনুবাদিত ৰূপসমূহ ছয়টা ভাষাত উচ্চতম ন্যায়ালয়ৰ ৱেবছাইটত উপলব্ধ হ’ব বুলি বিভাগীয় কৰ্তৃপক্ষই প্ৰকাশ কৰিছে।
উচ্চতম ন্যায়ালয়ৰ এনে সিদ্ধান্তৰ ফলত ইংৰাজী ভাষাৰ লগত যিসকল লোক স্বচ্ছন্দ নহয় তেওঁলোকৰ বাবে গোচৰৰ ৰায়দান বুজি পোৱাত অধিক সহজ হৈ পৰিব বুলি আশা কৰা হৈছে।
প্ৰাৰম্ভিক অৱস্থাত ইংৰাজীৰ উপৰি আন ছয়টা ভাষাত উচ্চতম ন্যায়ালয়ৰ ৰায়দান প্ৰকাশ হোৱাৰ পৰৱৰ্তী সময়ত আৰু অধিক আঞ্চলিক ভাষাত উচ্চতম ন্যায়ালায়ৰ ৰায়দান প্ৰকাশ হোৱাৰ সম্ভাৱনা আছে।
