যোৱা দুদিন ধৰি হৈ থকা বৰষুণৰ মাজতে আজি গুৱাহাটী মহানগৰীৰ যোৰাবাটত এক ভূমিস্খলনৰ ঘটনা সংঘটিত হৈছে। যোৰাবাট আৰক্ষী চকীৰ অন্তৰ্গত ১১ মাইলত সংঘটিত উক্ত ভূমিস্খলনত এজন লোক গুৰুতৰভাৱে আহত হ’ব লগীয়া হয়।
আহত লোকজনক হেমেশ্বৰ বৰা ওৰফে বি বৰা বুলি চিনাক্ত কৰা হৈছে।
প্ৰাপ্ত তথ্য মতে মঙ্গলবাৰে বিয়লি ভাগত ৬০ বছৰীয়া হেমেশ্বৰ বৰাই ৩৭ নং ৰাষ্ট্ৰীয় ঘাইপথৰ কাষতে থকা নিজা চাহৰ দোকানত কাম কৰি থকাৰ সময়তে হঠাতে এই ভূস্খলনৰ ঘটনাটো সংঘটিত হয়।
দুৰ্ঘটনাটোৰ ফলত হেমেশ্বৰ বৰাৰ দুয়োখন ভৰি মাটিৰ তলত সোমাই যায়। আনহাতে ঘটনাৰ খবৰ পাই যোৰাবাট আৰক্ষীয়ে ততালিকে ঘটনাস্থলীত উপস্থিত হৈ স্থানীয় লোকৰ সহযোগত বৰাক উদ্ধাৰ কৰি গুৱাহাটী মেডিকেল কলেজ হস্পিতাললৈ প্ৰেৰণ কৰে।
বৰ্তমান প্ৰশাসনৰ লোকে জে চি বি ৰে ভূমিস্খলনৰ ফলত খহি অহা শিল, বালি, মাটি উক্ত স্থানৰ পৰা আঁতৰাই আছে। অৱশ্যে ৰাষ্ট্ৰীয় ঘাইপথৰ দাঁতিত এই ভূমিস্খলনৰ ঘটনা সংঘটিত হয় যদিও ঘাইপথটোৰে যান-বাহন অহা যোৱা কৰাত কোনো অসুবিধাৰ সৃষ্টি হোৱা নাই।
