লক্ষ্ণৌৰ কিং জৰ্জ’ছ মেডিকেল য়ুনিভাৰ্ছিটিৰ (কে জি এম য়ু) কৰ্মচাৰীৰ বিগত কেইবাদিন ধৰি চলোৱা অনুসন্ধান তথা প্ৰচেষ্টাৰ পাছত আংশিকভাৱে স্মৃতিশক্তি হেৰুওৱা অসমৰ এগৰাকী ৩০ বছৰীয়া যুৱকে দেওবাৰে নিজৰ পৰিয়ালৰে সৈতে মিলিত হোৱাৰ সুযোগ পায়।
যোৱা ১৮ জুলাইত অৰ্দ্ধ চেতন অৱস্থাত তেওঁক লক্ষ্ণৌৰ কিং জৰ্জ’ছ মেডিকেল য়ুনিভাৰ্ছিটিৰ (কে জি এম য়ু) ট্ৰ্যাউমা চেন্টাৰত ভৰ্তি কৰা হৈছিল। হিন্দুস্তান টাইমছে এই বাতৰি প্ৰকাশ কৰিছে।
‘’যুৱকজনক ট্ৰ্যাউমা চেন্টাৰলৈ ডুবাগ্গা অঞ্চলৰ পৰা কাকৰি আৰক্ষীয়ে লৈ আনিছিল। তেওঁ নিজকে অমৰ হকৰ পুত্ৰ ৰফিক বুলি কৈছিল যদিও তেওঁ দিয়া তথ্য সন্দৰ্ভত সম্পূৰ্ণ বিভ্ৰান্ত আছিল,’’- কে জি এম য়ুৰ নিউৰোছাৰ্জাৰী বিভাগৰ মুৰব্বী তথা মেডিকেল ছুপাৰিনটেন্ডেন্ট ড০ বি কে ওজাই কয়।
বাতৰি অনুসৰি, চিকিৎলা লাভ কৰাৰ এদিন পাছতে যুৱকজনে তেওঁ চোৰঘাটি পেট্ৰ’ল পাম্পৰ সমীপৰ কেম্পবেল পথত বাস কৰা বুলি জানিবলৈ দিছিল।
‘’আমি গুগল মেপত ঠাইটুকুৰা বিচাৰি চাইছিলো আৰু সেই অঞ্চলতে এটা পেট্ৰ’ল পাম্প দেখা পাইছিলো। মোৰ বিভাগৰ কেইজনমান কৰ্মচাৰীয়ে যোৱা ২০ জুলাইত অঞ্চলটোলৈ গৈ ৰাইজৰ সৈতে কথা পাতে যদিও কোনো শুংসূত্ৰ নাপালে,’’- ড০ ওজাই জানিবলৈ দিয়ে।
বাতৰিত উল্লেখ কৰা অনুসৰি, দলটোৱে সন্ধান অব্যাহত ৰাখি অঞ্চলটোৰ ওজৰে পাজৰে থকা মছজিদসমূহলৈ যায়। তেওঁলোকে ইমামসকলক ঘটনাটোৰ বিষয়ে বিবৰি কয়। ইমামসকলে যদিওৱা যুৱকজনৰ বিষয়ে একো নাজানে তথাপি তেওঁৰ আত্মীয়ক বিচাৰি উলিওৱাত সহায় কৰাৰ আশ্বাস দিয়ে।
দেওবাৰে কে জি এম য়ুৰ তিনিজন কৰ্মচাৰীয়ে যুৱকজনক লগত লৈ কেম্পবেল পথলৈ যায় আৰু তেওঁক তিনি পোৱা এজন লোক বিচাৰি পায়। দলটোৱে লোকজনৰ সহায়ত ৰফিকৰ ভনীজোৱায়েকক বিচাৰি উলিয়ায়।
‘’তেওঁৰ অৱস্থা উন্নত হোৱালৈ চাই ভনীজোৱায়েকে তেওঁৰ লৈ যাবলৈ সন্মত হৈছে। তেওঁৰ ডিচাৰ্জৰ প্ৰক্ৰিয়া সম্পন্ন কৰা হৈছে,’’-ড০ ওজাই কয়।
বাতৰি মতে, যুৱকজনে লক্ষ্ণৌত তেওঁৰ ভনীয়েকৰ তালৈ আহিছিল। চিকিৎসকে সন্দেহ কৰা মতে ডুবাপ্পা অঞ্চলত যুৱকজনক মূৰত গধূৰ বস্তুৰে আঘাত কৰা হৈছিল আৰু আৰক্ষীয়ে পাই হাস্পাতালত ভৰ্তি কৰায়।
কে জি এম য়ুৰ প্ৰশাসনৰ ফালৰ পৰা তেওঁক বিনামূলীয়াকৈ ঔষধপাতি আৰু কাপোৰ প্ৰদান কৰা হয়।
