‘কেন্দ্ৰ আৰু ৰাজ্য চৰকাৰৰ দ্বাৰা এন আৰ চিৰ পুনৰ পৰীক্ষণ বিচাৰি উচ্চতম ন্যায়ালয়লৈ প্ৰেৰণ কৰা আবেদন নাকচ কৰাত আচৰিত হ’বলগীয়া একো নাই,‘ প্ৰব্ৰজনবিৰোধী মঞ্চৰ আহ্বায়ক উপমন্যু হাজৰিকাই শুকুৰবাৰে এক বিবৃতিযোগে এইদৰে কয়।
বিবৃতিটোত হাজৰিকাই কয় যে চৰকাৰ দুখনৰ আবেদনত তথ্য সংলগ্নৰে এন আৰ চিৰ বিসংগতি উদঙাই দিয়া হোৱা নাই। ন্যায়ালয়ে আবেদন বা শপতনামাত প্রকাশ কৰা তথ্যৰ ভিত্তিত নিৰ্দেশ দিয়ে। এন আৰ চিৰ বিসংগতি দাঙি ধৰি বা পুনৰ পৰীক্ষণৰ সমৰ্থনত যেতিয়া কোনো তথ্যই দিয়া হোৱা নাই, তেনে অৱস্থাত আবেদন নাকচ কৰাটো স্বাভাৱিক।
‘বিগত এবছৰ চৰকাৰ কেৱল বাদ পৰা সকলক অন্তৰ্ভুক্ত কৰিবলৈ ব্যস্ত আছিল। কিন্তু চূড়ান্ত এন আৰ চি প্ৰকাশৰ বাবে এমাহতকৈ কম সময় বাকী থাকোতে তথ্যৰ অবিহনে আবেদন এখন কৰি ৰাইজক আভুৱা ভাঁৰিবলৈ এখন নাটক ৰচিলে।‘ হাজৰিকাই এইদৰে তেওঁৰ মত ব্যক্ত কৰে।
আনহাতে, তেওঁ উল্লেখ কৰে যে যোৱা ২৬ আগষ্ট ২০১৮ তাৰিখে এন আৰ চিৰ বৃহৎ বিসংগতি উদঙাই ৰাজ্য আৰু কেন্দ্ৰীয় চৰকাৰক তেওঁ এখন স্মাৰকপত্ৰ দিছিল য’ত এন আৰ চিৰ বিসংগতিসমূহ স্পষ্ট ৰূপত প্ৰকাশ কৰা হৈছিল।
উদাহৰণ স্বৰূপে ,তেওঁ দাঙি ধৰা বিসংগতি সমূহৰ ভিতৰত আছিল ৮০ লাখ বিদেশীৰ বিপৰীতে এন আৰ চিত ৪০ লাখ হে বাদ পৰিছিল যি সংখ্যা আৰু হ্ৰাস পাব, সীমান্তৱৰ্তী জিলাত বাদ পৰা গঁড় সংখ্যা ৭.৫% য’ত নেকি ৰাজ্যিক ভিত্তিক হ্ৰাস পোৱা গঁড় সংখ্যা ১২.১৫%।
তেওঁ উনুকিয়াই দিয়ে যে ন্যায়ধীকৰণ প্ৰক্ৰিয়াৰ দ্বাৰা ঘোষিত বিদেশী এন আৰ চিত অন্তৰ্ভুক্ত হোৱাটোৱে প্ৰমাণ কৰিলে যে এন আৰ চিৰ বাছনি প্ৰক্ৰিয়াত বহুতো ত্ৰুতি আছে। ক্ষেত্ৰ অধ্যয়নত নিৰ্ধাৰিত প্রক্রিয়াক উলংঘন কৰি কেৱল তিনি জন সাক্ষীৰ ভিত্তিত এজন ব্যক্তিক এন আৰ চিত অন্তৰ্ভূক্ত কৰা হৈছে।
আনহাতে, কোনো নথি পত্ৰৰ পৰীক্ষণ নোহোৱাকৈ ভুৱা লিগেচী তথ্য দিয়া সকলক অন্তৰ্ভুক্ত কৰা, ১৯৭১ চনৰ পিছত প্ৰতিস্থা হোৱা গাওঁৰ পঞ্চায়তৰ সভাপতি/ সম্পাদকৰ প্ৰমাণপত্ৰৰ ভিত্তিত অন্তৰ্ভুক্ত কৰাৰ লগতে এন আৰ চি প্ৰক্ৰিয়াত জড়িত বহুখিনি বিষয়ববীয়াই ঘোষিত বিদেশীক এন আৰ চিত অন্তৰ্ভূক্ত কৰা বুলিও তেওঁ কয়।
‘এন আৰ চিৰ বিসংগতিৰ সকলো তথ্য জানিও চৰকাৰে তথ্য সমূহ উচ্চতম ন্যায়ালয়ত দাঙি নধৰিলে, পুনৰ পৰীক্ষণ বিচাৰি কেৱল এখন নাটকহে ৰচিলে , আৰু আবেদন নাকচ হোৱাৰ পিছত দোষ আৰু দায়িত্ব উচ্চতম ন্যায়ালয়ৰ ওপৰত ঠেলি দিবলৈ প্ৰচেষ্টা চলাইছে,’-হাজৰিকাই মন্তব্য কৰে।
উচ্চতম ন্যায়ালয়ত চৰকাৰে খিলঞ্জীয়া বিৰোধী স্থিতি অব্যাহত ৰাখিছে। ভিত্তিবৰ্ষৰ ক্ষেত্ৰত ১৯৭১ চনৰ সমৰ্থনত অসমত জন্ম হোৱা বিদেশীৰ সতী-সন্ততিক নাগৰিকত্ব প্ৰদান কৰিবলৈ আৰু শেহতীয়াভাৱে নাটক ৰচি তথ্য অবিহনে পুনৰীক্ষণৰ আবেদন নাকচ কৰোৱা বুলিও তেওঁ দাবী কৰে।
