ঐতিহ্যমণ্ডিত শিৱসাগৰ জিলাৰ শিৱদৌলত পূৰ্বৰ পৰম্পৰা অনুসৰি চলি অহা মহাশিৱৰাত্ৰী পূজা আৰু মেলা এইবাৰ আন্তঃৰাষ্ট্ৰীয় পৰ্যায়ত অনুষ্ঠিত কৰিবলৈ লোৱা হৈছে।
জানিব পৰা মতে শিৱসাগৰ জিলা প্ৰশাসন আৰু শিৱসাগৰ দৌল উন্নয়ন সমিতিৰ যৌথ উদ্যোগত অহা ১৩ ফেব্ৰুৱাৰিৰ পৰা ১৬ ফেব্ৰুৱাৰিলৈকে চাৰিদিনীয়া বৰ্ণাঢ্য কাৰ্য্যসূচীৰে অনুষ্ঠিত হ’বলগীয়া এই আন্তঃৰাষ্ট্ৰীয় শিৱ মহোৎসৱ-২০১৮ শিৱসাগৰ ব’ৰ্ডিং খেলপথাৰত আয়োজন কৰা হৈছে ৷
উল্লেখযোগ্য যে এই মহোৎসৱত এইবাৰ আমেৰিকা, জাপান, অষ্ট্ৰেলিয়া, ফ্ৰান্স, ইটালি, ৰোমানিয়া আদি দেশকে ধৰি বহু দেশী-বিদেশী শিল্পীৰ অনুষ্ঠান দেখিবলৈ পোৱা যাব। তাৰোপৰি ভাৰত তথা ৰাজ্যখনৰ বিভিন্ন প্ৰান্তৰ নৃত্য-কলাৰ লগতে ভাৰতৰ বিভিন্ন প্ৰান্তৰ খাদ্যসম্ভাৰৰো পয়োভৰ ঘটিব।
শিৱসাগৰ ৰাজহ চক্ৰ বিষয়া সম্প্ৰীতি গোস্বামী, দৌল উন্নয়ন সমিতিৰ বিষয়ববীয়া, শিৱসাগৰৰ বিশিষ্ট নাগৰিক ক্ৰমে ড° সৌমাৰ জ্যোতি মহন্ত, কাৰ্তিক দত্ত, বিকাশ দে’, সংবাদসেৱী তথা বেচৰকাৰী সংস্থা “কে’ এম প্ৰডাক্ট” ৰ বিষয়ববীয়া সকলে শিৱসাগৰখন প্লাষ্টিক মুক্ত কৰি ইয়াৰ পৰিৱৰ্তে কাগজৰ মোনা ব্যৱহাৰৰ বাবে সজাগতা আনিবলৈ একগোট হয়। আন্তঃৰাষ্ট্ৰীয় শিৱ মহোৎসৱত এশ শতাংশ প্লাষ্টকমুক্ত কৰাৰ উদ্দেশ্য ৰাইজক সজাগ কৰিবলৈ শিৱদৌললৈ অহা সকলো ব্যক্তিৰ পলিথিনৰ বেগসমূহ এটা ডাষ্টবিনত পেলাবলৈ অনুৰোধ জনাই কাগজৰ ঠোঙা দিব।
আনহাতে এই শিৱৰাত্ৰী মহোৎসৱত প্লাষ্টিকৰ ব্যৱহাৰ এশ শতাংশ নিষিদ্ধ কৰিবলৈ ব’ৰ্ডিং খেলপথাৰৰ মহোৎসৱস্থলীত “কে’ এম প্ৰডাক্ট” নামৰ বেচৰকাৰী সংস্থাৰ কাগজৰ এখনি বিপনী খোলা হ’ব বুলি চক্ৰ বিষয়াই জনোৱাৰ লগতে মহোৎসৱৰ সময়খিনিত কোনো বিপনীত প্লাষ্টিকৰ কেৰীবেগ ব্যৱহাৰ কৰা দেখিলে ২০০০ টকাৰ জৰিমনা ভৰিব লাগিব বুলি জিলা চক্ৰ বিষয়া সম্প্ৰীতি গোস্বামীয়ে জানিবলৈ দিয়ে।
