“সীতাজখলা”ৰ কাষত কৃষক সভা, মহাসভা; বিশ্ব বেংকৰ ধন হৰলুকিৰ আশংকা

সমবায়ভিত্তিক উৎপাদনেৰে স্থানীয় বজাৰ দখলকাৰী সীতাজখলা দুগ্ধ উৎপাদক সমবায় সমিতিৰ আন্দোলনলৈ সমৰ্থন আগবঢ়াইছে কৃষক সভা আৰু কৃষক মহাসভাই।

সমবায়খনৰ সমৰ্থনত থিয় দি দুই কৃষক সংগঠনে সমগ্ৰ জটিলতাটোৰ আঁৰত বিশ্ব বেংকৰ বৃহৎ ধন হৰলুকিৰ “অভিসন্ধি থকাৰ আশংকা” প্ৰকাশ কৰিছে।

আৰু দাবী কৰিছে, ৰাষ্ট্ৰীয় দুগ্ধ বিকাশ ব’ৰ্ড (NDDB), পশ্চিম অসম দুগ্ধ উৎপাদনকাৰী সমবায় ইউনিয়ন লিমিটেড (WAMUL) আৰু অসম চৰকাৰৰ মাজৰ ত্ৰিপাক্ষিক চুক্তিৰ বাতিল। সীতাজখলাৰো একেই দাবী।

ত্ৰিপাক্ষিক চুক্তিখনত স্বাক্ষৰকাৰী WAMUL আছে দুগ্ধ উৎপাদকসকলৰ প্ৰতিনিধি হিচাপে। কিন্তু, আন্দোলনকাৰীসকলৰ মতে, ই সম্পূৰ্ণ নিয়মবৰ্হিভূত আৰু অগণতান্ত্ৰিক।

“কিয়নো অসমত পঞ্জীয়নভুক্ত বহু দুগ্ধ সমবায় সমিতি আছে যিসমূহক এই সম্পৰ্কত অন্ধকাৰত ৰখা হ’ল। অন্যহাতে চুক্তি স্বাক্ষৰকাৰী WAMULএ যোৱা বহু বছৰ ধৰি তেওঁলোকৰ অ’ডিট ৰিপ’ৰ্ট দাখিল কৰা দূৰৰ কথা ব’ৰ্ডখনো পুনৰ গঠন কৰিব পৰা নাই। দুগ্ধ উৎপাদকে এই সম্পৰ্কত আৰ টি আই কৰিও কোনো তথ্য লাভ কৰিবলৈ সক্ষম হোৱা নাই,” কৃষক সংগঠনকেইটাৰ বিবৃতিত প্ৰকাশ।

সেয়ে, “অস্তিত্ববিহীন আৰু কেৱল ফাইলতে থকা সমবায় সমিতি”খনৰ লগত ত্ৰিপাক্ষিক চুক্তি সম্পাদন কৰা ঘটনা সন্দেহজনক, কৃষক সংগঠনকেইটাৰ মতে।

আৰু এই চুক্তিৰ আঁৰত বিশ্ব বেংকৰ বহুকোটি টকা “হৰলুকিৰ গোপন অভিসন্ধি লুকাই থাকিব পাৰে”, তেওঁলোকৰ মন্তব্য।

“কিয়নো NDDBক বিশ্ব বেংকে অসমৰ দুগ্ধ উন্নয়নৰ বাবে ১৭০০ কোটি টকা ধাৰ দিব। তাৰে ২৩৭ কোটি Assam Agribusiness & Rural Transformation Projectৰ অধীনত ইতিমধ্যে WAMULক প্ৰদানৰ যোজা চলোৱা হৈছে, তাৰে বহু কোটি টকা তেওঁলোকে লাভ কৰিছে,” বিবৃতিত প্ৰকাশ।

খবৰ মতে, সীতাজখলাও WAMULৰ সদস্য। সমবায়খন তদানীন্তন অবিভক্ত নগাওঁ জিলাত ১৯৫৮ চনত পঞ্জীয়ন কৰা হৈছিল। WAMUL গঠন হৈছিল ১৯৭৬ চনত।

চাওক, সীতাজখলাৰ বিষয়ে অসম চৰকাৰে বনোৱা ভিডিঅ’

গাখীৰ আৰু আন দুগ্ধজাত সামগ্ৰীৰ লগতে সমবায়খনে শেহতীয়াকৈ মিঠাই উৎপাদনো আৰম্ভ কৰিছে।

সংগঠন দুটাই বিশ্ব বেংকৰ ধাৰৰ বোজা অসমৰ ৰাইজৰ ওপৰত জাপি দিয়া কাৰ্য্য চৰকাৰে অতি শীঘ্ৰে বন্ধ কৰা উচিত বুলি মত প্ৰকাশ কৰি আন্দোলনকাৰী দুগ্ধ পালকসকললৈ অসমৰ ৰাইজক পূৰ্ণ সমৰ্থন জনাবলৈ আহবান জনায়|

তাৰোপৰি, চুক্তিখনৰ আন এক চৰ্ততো কৃষক সংগঠন দুটাই আপত্তি দৰ্শাইছে।

তেওঁলোকৰ মতে, অসমৰ দুগ্ধ উৎপাদকে প্ৰয়োজনীয় গাখীৰ WAMULক যোগান ধৰিব নোৱাৰিলে NDDBএ ভাৰতৰ অন্য ঠাইৰ পৰা গাখীৰ আনিব পাৰিব বুলি চুক্তিত উল্লেখ আছে।

সংগঠনকেইটাৰ মতে, “ইয়াৰ অৰ্থ হৈছে এই চুক্তিয়ে দুগ্ধ উৎপাদনৰ বাবে আমাৰ থলুৱা দুগ্ধ উৎপাদকক সহায় তথা উৎসাহিত কৰাৰ বিপৰীতে তেওঁলোকৰ পৰম্পৰাগত ব্যৱসায়ক ধংসৰ মুখলৈ ঠেলি দিয়াৰ ষড়যন্ত্ৰ ৰচনা কৰা হৈছে।”

মুখ্য মন্ত্ৰী সৰ্বানন্দ সোণোৱালে বিষয়টো সন্দৰ্ভত সমবায়খনৰ সৈতে কথা পাতিবলৈ মন্ত্ৰী ৰিহন দৈমাৰীক যোৱা ১৯ আগষ্টত নিৰ্দেশ দিছে।