‘’জম্মু-কাশ্মীৰৰ পৰা ৩৭০ অনুচ্ছেদ বাতিলৰ পিছত ৰাজ্যখনৰ লাডাখ আৰ জম্মু অঞ্চলৰ পৰিস্থিতি প্ৰায় স্বাভাৱিক অৱস্থালৈ ঘূৰি আহিছে আৰু শ্ৰীনগৰ উপত্যকাৰো পৰিস্থিতি উন্নত হৈছে,’’-এই মন্তব্য ৰাজ্যখনৰ এগৰাকী জ্যেষ্ঠ সাংবাদিক টিটো গঞ্জুৰ।
শুকুৰবাৰে গুৱাহাটী প্ৰেছ ক্লাবৰ সদস্য-সাংবাদিক সকলৰে এক বাৰ্তালাপ অনুষ্ঠানত জম্মুৰ পৰা অংশগ্ৰহণ কৰি গঞ্জুৱে স্পষ্টভাৱে কয় যে এই সিদ্ধান্ত (৩৭০ অনুচ্ছেদ বাতিল) সঠিক আৰু নিৰ্ণায়ক।
এক অস্থায়ী ব্যৱস্থাপনাক বিশেষ অধিকাৰ বুলি প্ৰতীয়মান কৰাৰ অনাহক বিৰ্তকৰ অৱসানে জম্মু-কাশ্মীৰৰ ভৱিষ্যত প্ৰজন্মৰ বাবে এক আশাৰ বতৰা কঢ়িয়াই আনিব বুলিও তেওঁ দোহাৰে।
জম্মুৰ লগতে শ্ৰীনগৰৰ পৰা সকলো বাতৰিকাকত নিয়মীয়াকৈ প্ৰকাশ পাই আছে বুলি উল্লেখ কৰি গঞ্জুৱে অৱশ্যে তাত ইন্টাৰনেট সেৱা কিছু লেহেমীয়া হৈ থকা বুলি জানিব দিয়ে।
ইয়াৰ মাজতে জম্মুৰ পৰা ভিডিও কনফাৰেন্স যোগে তেওঁ গুৱাহাটীৰ সাংবাদিকৰ লগত বাধাহীনভাবে কথা পাতিবলৈ পাই অত্যন্ত সুখী বুলি প্ৰকাশ কৰে।
কাশ্মীৰ সম্পৰ্কত কোনো বিতৰ্কৰ প্ৰয়োজন নাই বুলি উল্লেখ কৰি গঞ্জুৱে দাবী কৰে যে জম্মু-কাশ্মীৰৰ ৰজা হৰি সিঙে ভাৰতৰ লগত চামিল হ’বলৈ লোৱাৰ সিদ্ধান্তৰ পাছতেই সমগ্ৰ কাশ্মীৰ ভাৰতৰ অভিন্ন অংগ হৈ পৰে।
তাত সমস্যাৰ সৃষ্টি কৰিছে কেৱল পাকিস্তানেহে। এই সমস্যাৰ আশু সমাধানৰ পথ সম্প্ৰতি প্ৰশস্ত হোৱা বুলিও তেওঁ দৃঢ়তাৰে কয়।
কাশ্মীৰৰ সমাজ-সংস্কৃতিৰ এক অনন্য দলিল কলহনৰ ‘ৰাজতৰঙ্গিনী’ৰ কথা উল্লেখ কৰি গঞ্জুৱে ভাৰতীয় সমাজ-সংস্কৃতিৰ লগত কাশ্মীৰৰ হাজাৰ বছৰীয়া সান্নিধ্যৰ কথা সোঁৱৰে।
উল্লেখযোগ্য যে, ৰাজতৰঙ্গিনীৰ এক গুৰুত্বপূৰ্ণ চৰিত হ’ল অসম জীয়ৰী অমৃতপ্ৰভা।পাছলৈ কাশ্মীৰৰ এগৰাকী জনপ্রিয় ৰাণী ৰূপেও অমৃতপ্ৰভা প্ৰতিষ্ঠিত হৈছিল।
সাংবাদিকৰ প্ৰশ্নৰ উত্তৰত এপিল’গ আলোচনীৰ সম্পাদক গঞ্জুৱে কাশ্মীৰি পণ্ডিতসকলৰ প্ৰত্যাগমন সহজসাধ্য নহ’ব বুলি উল্লেখ কৰে যদিও পৰিৱৰ্তিত পৰিস্থিতিত তাৰ সম্ভাৱনীয়তা তেওঁ নুই নকৰিলে।
তদুপৰি, কাশ্মীৰি জাতীয়তাবাদৰ নামত এচামে ধৰ্মীয় মৌলবাদক প্ৰশ্ৰয় দি অহা বুলিও তেওঁ দাবী কৰে।
আন এক প্ৰশ্নৰ উত্তৰত পাকিস্তান অধিকৃত কাশ্মীৰৰ কথা উল্লেখ কৰি তেওঁ সেয়া আটাইতকৈ অনুন্নত অঞ্চল বুলি অভিহিত কৰে।
তাত সন্ত্ৰাসবাদীৰ ঘাটি আৰু পাকিস্তানী সেনাৰ শিবিৰক বাদ দি একোৱে নাই বুলি গঞ্জুৱে মত প্ৰকাশ কৰে।
তদুপৰি, পাক-অধিকৃত কাশ্মীৰৰ বাসিন্দাসকলে শেহতীয়াকৈ ইছলামাবাদৰ বিৰুদ্ধে থিয় হোৱাৰ ঘটনাও ঘটা বুলি তেওঁ দাবী কৰে।
