ত্ৰিপুৰা আৰক্ষীয়ে ৰাজ্যখনৰ এগৰাকী উপ পৰিদৰ্শকক নাৰ্ক’টিক ড্ৰাগছ এণ্ড চাইক’ট্ৰপিক চাবছটেন্সেছ গোচৰত জড়িত থকাৰ অভিযোগত গ্ৰেপ্তাৰ কৰিছে।
অভিযুক্ত উপ পৰিদৰ্শক গৰাকী বিশ্বজিৎ দাস বুলি জানিব পৰা গৈছে।
আজি উপ পৰিদৰ্শক গৰাকীক চেপাহিজালা জিলা আদালতত হাজিৰ কৰোৱা হয় আৰু আদালতে আৰক্ষী বিষয়াজনক তিনি দিনৰ আৰক্ষীৰ জিম্মালৈ প্ৰেৰণ কৰে।
আৰক্ষী বিষয়া গৰাকীৰ গ্ৰেপ্তাৰ সন্দৰ্ভত চেপাহিজালা জিলাৰ আৰক্ষী অধীক্ষক কৃষ্ণেন্দু চক্ৰৱৰ্তীয়ে সংবাদ মাধ্যমৰ আগত কয় যে দেওবাৰে আগৰতলা বিমান বন্দৰৰ পৰা নিচাজাতীয় সামগ্ৰীৰ ব্যৱসায় তথা সৰবৰাহৰ সৈতে জড়িত গিয়াছুদ্দিন নামৰ এজন লোকক গ্ৰেপ্তাৰ কৰা হৈছিল।
আৰক্ষীৰ জালত পৰা গিয়াছুদ্দিনে জেৰাৰ সময়ত উপ পৰিদৰ্শক বিশ্বজিৎ দাসৰ কথা উল্লেখ কৰে। নিচাজাতীয় সামগ্ৰীৰ ব্যৱসায় তথা সৰবৰাহত বিশ্বজিৎ দাসে বিভিন্ন ধৰণে সহায় কৰে বুলি গিয়াছুদ্দিনে আৰক্ষীক জানিবলৈ দিয়ে।
গিয়াছুদ্দিনৰ ভাষ্যৰ পাছতে চেপাহজিলা জিলাৰ আৰক্ষী অধীক্ষকৰ নিৰ্দেশ মৰ্মে জিলাখনৰ অতিৰিক্ত আৰক্ষী অধীক্ষক জ্যোতিস্মান দাসৰ নেতৃত্বত যোৱা এটা দলে যোৱা নিশা খোৱাই আৰক্ষী থানাৰ পৰা উপ পৰিদৰ্শক বিশ্বজিৎ দাসক গ্ৰেপ্তাৰ কৰে।
লগতে পঢ়ক : ৰক্ষকেই ভক্ষক : গুৰুতৰ অপৰাধত জড়িত পাঁচগৰাকী আৰক্ষীক নিলম্বন
উল্লেখ্য যে আজি কিছু দিন পূৰ্বে খোৱাই আৰক্ষী থানালৈ বদলি হৈ অহা বিশ্বজিৎ দাসে পূৰ্বে বিশালগড় আৰক্ষী থানাত কৰ্মৰত আছিল।
ইফালে কৃষ্ণেন্দু চক্ৰৱৰ্তীয়ে বিশ্বজিৎ দাসৰ বিৰুদ্ধে পৰ্যাপ্ত পৰিমাণৰ প্ৰমাণ লাভ কৰাৰ লগতে তেওঁৰ বিৰুদ্ধে এটা গোচৰো ৰুজু কৰা হৈছে বুলি জনায়।
