ঘৰুৱা সহায়কাৰী, ড্ৰাইভাৰকে ধৰি অসংগঠিত খণ্ডৰ শ্ৰমিককো পি এফৰ সুবিধা প্ৰদানৰ বাবে আইন সংশোধনৰ যো-জা চলাইছে নৰেন্দ্ৰ মোদী চৰকাৰে।
শ্ৰম মন্ত্ৰ্যালয়ে এমপ্লয়িজ প্ৰভিদেণ্ট ফান্দ এণ্ড মিচেলেনিয়াছ প্ৰভিদেণ্ট এক্ত সংশোধনৰ প্ৰস্তাৱসমূহ বিভিন্ন পক্ষৰ মত গ্ৰহণৰ বাবে ইতিমধ্যে প্ৰেৰণ কৰিছে, বাতৰিত প্ৰকাশ।
প্ৰধান মন্ত্ৰী শ্ৰম যোগী মন ধন পেঞ্চন আঁচনিৰ পথতে অসংগঠিত খণ্ডৰ শ্ৰমিকৰ বাবে এই সংশোধন কৰিব খোজা হৈছে।
বাতৰিটো মতে, পি এফত বৰ্তমানৰ দৰমহাৰ বাধ্যতামূলক ১২% বৰঙনিৰ নিয়মত সংশোধন আনিব খোজা হৈছে।
অৰ্থাৎ, কোনো শ্ৰেণীৰ কৰ্মচাৰীৰ পি এফত বৰঙনি আৰু সময়সীমা কিমান হ’ব সেয়া নিৰ্ধাৰণৰ কৰ্তৃত্ব কেন্দ্ৰই নিজৰ বিবেচনাধীন কৰিব খুজিছে।
পি এফত বৰঙনিৰ ক্ষেত্ৰত নিয়োগকাৰীক পৰিস্থিতি সাপেক্ষে ৰেহাই দিয়াৰ দিহাও আনিব খোজা সংশোধনীৰ লক্ষ্যৰ ভিতৰত আছে বুলি বাতৰিটোত প্ৰকাশ।
কেন্দ্ৰই “যিকোনো শ্ৰেণীৰ কৰ্মচাৰীৰ ক্ষেত্ৰত প্ৰয়োগ হোৱাকৈ বৰঙনিৰ হাৰ আৰু এই বৰঙনি প্ৰয়োগ হ’বলগা সময়সীমা নিৰ্দিষ্ট” কৰিব খুজিছে, সংশোধনী খচৰাৰ উদ্ধৃতিৰে বাতৰিটোত প্ৰকাশ।
২৩ আগষ্টত প্ৰস্তুত কৰা এই খচৰা সন্দৰ্ভত অহা ২২ ছেপ্তেম্বৰলৈকে মতামত গ্ৰহণ কৰা হ’ব।
বৰ্তমান পি এফ আইনৰ অধীনত কৰ্মচাৰী আৰু নিয়োগকৰ্তা দুয়ো পক্ষই দৰমহাৰ ১২% বাধ্যতামূলক বৰঙনি আগবঢ়াব লাগে।
