গুৱাহাটীৰ কুমাৰপাৰাত সংঘটিত হত্যাকাণ্ডটোত জড়িত ৫জন সন্দেহযুক্ত হত্যাকাৰীৰ সম্ভেদ দিওঁতালৈ ২৫ হাজাৰকৈ টকাৰ পুৰস্কাৰ ঘোষণা কৰিছে অসম আৰক্ষীয়ে।
দোকানখনৰ চি চি টিভিৰ ফুটেইজৰ পৰা দুজনৰ ফটো আৰক্ষীয়ে ইতিমধ্যে সংগ্ৰহ কৰিছে আৰু সেয়া ইতিমধ্যে ৰাজহুৱাও কৰিছে।
১২ ছেপ্টেম্বৰত শ্যাম ৰড নামৰ হাৰ্ডৱেৰ দোকানখনত সংঘটিত হত্যাকাণ্ডটোত দোকানৰ গাণনিক শ্যাম শৰ্মা নিহত হৈছিল। মালিকৰ সৈতে নাম আৰু উপাধি একে আছিল নিহত কৰ্মচাৰীজনৰ আৰু মালিকক টাৰ্গেট কৰি ভুলতে কৰ্মচাৰীজনক গুলীওৱা বুলি সন্দেহ কৰিছে আৰক্ষীয়ে।
লগতে পঢ়ক মালিকৰ নামো শ্যাম, গুলীত নিহত কৰ্মচাৰীৰ নামো শ্যাম; আততায়ীৰ টাৰ্গেটক লৈ বিমোৰত আৰক্ষী
দোকানৰ আন কৰ্মচাৰীয়ে জনোৱামতে, হত্যাকাৰী হিন্দীভাষী আছিল আৰু “শ্যামজী কৌন হ্যে” বুলি গুলীওৱাৰ আগত সুধিছিল। ছেণ্ডেল খুলি সোমাবলৈ কোৱাত ছেণ্ডেল খুলি সোমাইছিল হত্যাকাৰী।
আৰক্ষীয়ে ৰাজহুৱা কৰা ফটোকেইখনৰ কৰ্মচাৰীজনৰ এই বিৱৰণৰ সৈতে মিল দেখা যায়। ফটোকেইখন হত্যাকাৰীকেইজন দোকানখনৰ পৰা ওলাই যোৱা মুহূৰ্তৰ। এজনৰ ভৰিত ছেণ্ডেল দেখা যায় আৰু আনজন যুৱকক পিঠিত বেগ লৈ খালী ভৰিৰে দেখা যায়।
দুয়োজনেই চেহেৰা-পাতিত উত্তৰ ভাৰতীয় যেন অনুমান হয়।
ঘটনাটোৰ পৰিস্থিতি অধ্যয়ন আৰু বিশ্লেষণৰ পিছত আৰক্ষী আয়ুক্ত দীপক কুমাৰে ইয়াক ডকাইতিৰ ঘটনা নহয় বুলি স্পষ্ট কৰিছিল। তেওঁ হত্যাৰ উদ্দেশ্য লৈয়ে আততায়ী অহাৰ সন্দেহ প্ৰকাশ কৰিছিল।
