ৰান্ধনিশালৰ এবিধ অতি আৱশ্যকীয় বস্তু হৈছে পিয়াঁজ। পিয়াঁজ অবিহনে গৃহিনীৰ পৰা ভাল খাদ্য সম্ভাৰ বিচাৰিলে আপুনি ককৰ্থনা খোৱাৰ সম্ভাৱনাও নথকা নহয়।
পিয়াঁজৰ মূল্য বৃদ্ধিয়ে আকৌ এবাৰ উপভোক্তাৰ চকুৰ পানী উলিয়াবলৈ সাজু হৈছে। বিগত সপ্তাহতে পিয়াঁজৰ মূল্য প্ৰায় ৪০ শতাংশ বৃদ্ধি পাইছে।
গুৱাহাটীৰ বেলতলা বজাৰতে এতিয়া পিয়াঁজৰ প্ৰতি কিলোত খুচুৰা দৰ ৫০ টকা হৈছে। অচিৰেই এই মূল্য বৃদ্ধি পাব বুলি জানিবলৈ দিছে পাইকাৰী ব্যৱসায়ীয়ে।
জানিব পৰা মতে, দিল্লীৰ পাইকাৰী বজাৰতো বৃহস্পতিবাৰে পিয়াঁজৰ দৰ প্ৰতি কিলোত ৩০ৰ পৰা ৪৫টকালৈ উঠিছে।
ইপিনে মহাৰাষ্ট্ৰৰ নাছিকত পিঁয়াজ ৫০ৰপৰা ৫৫টকালৈ বিক্ৰী হোৱাৰ খৱৰ আহিছে।
ব্যৱসায়ীসকলে জানিব দিয়া মতে, পিয়াঁজৰ ষ্টক হ্ৰাস পোৱাৰ ফলতে পাইকাৰী বজাৰত পিয়াঁজৰ যোগান সীমিত হৈ পৰিছে।
আন এক সূত্ৰৰ মতে, শেহতীয়াভাৱে দক্ষিণ ভাৰতৰ ৰাজ্যসমূহত হোৱা বৰষুণৰ বাবে পিয়াঁজৰ খেতি ক্ষতিগ্ৰস্ত হৈছে আৰু ইয়াৰ ফলত ইয়াৰ দৰ ক্ৰমশ বৃদ্ধি পাবলৈ লৈছে।
কৰ্ণাটক, অন্ধ্ৰ প্ৰদেশ, কেৰালা,তামিলনাডুকে ধৰি দক্ষিণ ভাৰতৰ ৰাজ্যসমূহত পিয়াঁজৰ ষ্টক সীমিত হৈ পৰিছে।
সামগ্ৰিকভাৱে গোটেই দেশতে পিয়াঁজৰ নাটনিয়ে দেখা দিছে। এনে ক্ষেত্ৰত ইয়াৰ ৰপ্তানি কৰা কঠিন হৈ পৰিছে।
বৰ্তমান পাইকাৰী বজাৰসমূহত পিয়াঁজৰ যোগান যথেষ্ট হ্ৰাস পাইছে যাৰ বাবে চাহিদাৰ প্ৰতি লক্ষ্য ৰাখি মূল্য বৃদ্ধি স্বাভাৱিক হৈ পৰিছে।
অসমত বাহিৰৰ পৰা পিয়াঁজৰ যোগান সীমিত হৈ অহাৰ বাবে ইয়াৰ মূল্যই যে অচিৰেই গ্ৰাহকৰ চকুত পানী উলিয়াব সেয়া নিশ্চিত।
