বিজয় হাজাৰে ট্ৰফীত শুকুৰবাৰে অসম আৰু উত্তৰাখণ্ডৰ মাজত অনুষ্ঠিত হোৱা প্লেট গ্ৰুপৰ এখন খেলত উত্তৰাখণ্ডৰ হাতত শোচনীয়ভাৱে পৰাস্ত হয় অসম।
২৮ অভাৰলৈ হ্ৰাস কৰা বৰ্ষাবিঘ্নিত খেলখনত অসমে প্ৰথমে বেট ধৰি ২৮ অভাৰত ৯ টা উইকেট হেৰুৱাই সংগ্ৰহ কৰে ১৭১ ৰাণ।
অসমৰ হৈ প্ৰথমখন খেলত শতৰাণ অৰ্জন কৰা স্বৰূপম পুৰকায়স্থই ৩২ ৰাণ আৰু ৰাহুল হাজৰিকাই ৩৯ ৰাণ সংগ্ৰহ কৰে।
আনহাতে, পুনৰ এবাৰ সম্পুৰ্ণৰূপে ব্যৰ্থ হয় আই পি এলত চমকপ্ৰদ প্ৰদৰ্শন দাঙি ধৰা ৰিয়ান পৰাগ। ৰিয়ান পৰাগে মাত্ৰ ৮ ৰাণ সংগ্ৰহ কৰে।
অসমৰ ১৭১ ৰাণৰ প্ৰত্যুত্তৰত উত্তৰাখণ্ডে ২৬.৪ অভাৰত মাত্ৰ ৩ টা উইকেট হেৰুৱাই প্ৰয়োজনীয় লক্ষ্যত উপনীত হয়।
উত্তৰাখণ্ডৰ হৈ অধিনায়ক উন্মুক্ত চান্দে ৭৮ টা বলত ৭ টা বাউণ্ডেৰী আৰু ৩ টা অভাৰ বাউণ্ডেৰীৰে অপৰাজিত ৮০ ৰাণ সংগ্ৰহ কৰে।
উল্লেখযোগ্য যে, অসমে ২০১৯ বৰ্ষৰ বিজয় হাজাৰে ট্ৰফীৰ প্ৰথমখন খেলত মিজোৰামক বিশাল ব্যৱধানত পৰাস্ত কৰি অভিযান আৰম্ভ কৰিছিল।
